« Hō’ē ’o tē māramarama maita’i », Hoa, Novema 2023, 26–27.
Hō’ē ’o tē māramarama maita’i
’Aita te mau hoa ’o Blair i māramarama i te huru o teie ma’i Crohn.
’Ua tupu teie ’ā’amu i te Fenua Marite.
« E’ita vau e nehenehe e haere mai i teie mahana », te parau ïa a Blair. ’Ua oti roa ’oia i te ha’amā.
’Ua hi’o noa mai tōna mau hoa iāna. « ’Ua parau mai ho’i ’oe ē e haere mai ’oe ! » Te parau ïa a Sammy.
« ’Ua ’ite au. » Hi’o noa atu ra ’o Blair i tōna ’āvae. « E ’ere au i te mea maita’i roa. Tātarahapa mai. »
« Terā ho’i tā ’oe i parau mai i te taime i mairi a’enei », te parau ïa a Jessica.
’Aita ’o Blair i ’ite e nāhea ’oia i te parau. ’Ua hina’aro ho’i ’oia e haere i te fare o Sammy. Terā rā, tē māuiui mau rā tōna ’ōpū i teie mahana. Titauhia iāna ’ia ho’i i tōna fare ’e ’ia ha’amāha i tōna rohirohi.
’Ua ro’ohia ’o Blair i te ma’i Crohn. E māuiui noa tōna ’ōpū, ’e e mea māuiui mau ā. I te rahira’a o te mau mahana e māuiui ri’i tōna ’ōpū. Tē vai ra rā te tahi mau mahana e mea ’ino roa atu i te tahi atu mau mahana. I teie mahana ’o te hō’ē ïa o taua mau mahana ra. ’Āhani e nehenehe tāna e mā’iti e aha te mau mahana tāna e māuiui rahi atu. Mai te huru ra ē, e māuiui rahi roa atu tōna ’ōpū i te mau taime e hina’aro ai ’oia e rave i te tahi ’ohipa ’ārearea.
’Ua parau ’o Sammy ia Jessica : « Mai, haere ana’e ».
I te ho’ira’a ’o Blair i te fare, ’ua rave ’oia i tāna rā’au. ’E i muri iho, ’ua tāmata ’oia i te ta’oto. Terā rā ’ua rahi roa tōna māuiui.
Haere mai nei ’o Māmā ’e ’o Pāpā e hi’o iāna. Pārahi atu ra ’o Pāpā i ni’a i tōna ro’i. « E aha tō ’oe huru ? »
« Maita’i. Tē tauturu ri’i ra te rā’au », te parau ïa a Blair.
’Ua parau ato’a atu ’o Māmā : « ’Ē’ē, e’ita ïa ’oe e nehenehe e haere i te fare o Sammy ».
’Ua tahe te roimata o Blair. « ’Aita e tano ! ’Aita tō’u mau hoa i māramarama e aha mau tō’u. » ’Ua tāora ’o Blair i te tūru’a i ni’a i te papa’i. « ’Ua hina’aro noa vau ē ’ia maita’i atu ā vau. »
’Ua tauahi ’o pāpā ia Blair. « ’Ua ’ite au. ’Ua hina’aro ānei ’oe i te hō’ē ha’amaita’ira’a autahu’ara’a ? »
’Ua ueue te upo’o ’o Blair. I te rahira’a o te taime, e tauturu pāpū te mau ha’amaita’ira’a ’ia noa’a te hau iāna.
’Ua tu’u ’o Pāpā i tōna nā rima i ni’a i te upo’o o Blair ’e ’ua ha’amaita’i iāna, ’ia tāmarū ’e ’ia tāmāhanahana. E mea au maita’i te ha’ama’ta’ira’a ». ’Ua tauturu te reira iāna ’ia ha’amana’o ē, ’ua here mau ā te Metua i te ao ra iāna. Terā rā, tē ’oto’oto noa ra ’oia nō tōna mau hoa.
I muri mai i te ha’amaita’ira’a, ’ua ’āpā ’o Māmā e ’o Pāpā ia Blair nō taua pō rā. ’Ua vaiiho rāua iāna ’ia nehenehe ’oia ’ia ta’oto.
’Ua tāpiri atu ’o Blair i tōna nā mata. ’Ua tauturu te ha’amaita’ira’a iāna, terā rā tē māuiui noa ra ’oia.
’Ua tūturi ’oia i pīha’i iho i tōna ro’i nō te pure. I te ’ōmuara’a e au ïa mai tāna mau pure mātarohia. ’Ua parau ’oia i te Metua i te ao ra i te mea tāna i māuruuru ’e ’ua ani ’oia ē ’ia maita’i ri’i mai ’oia. I teie rā taime, ’ua tāmau noa ’oia.
« E te Metua i te ao ra, tē ’oto roa nei au. Tē mihi nei au i tō’u mau hoa », ’ua parau ’oia. « Tē vai mo’emo’e nei au. ’Aita hō’ē a’e o rātou i ’ite i tō’u māuiui i te mau mahana tāta’itahi. Tē mihi nei au i te huru hou ’a ma’ihia ai au nei. »
Rahi noa atu ā tō Blair purera’a, rahi noa ato’a atu tōna mana’o ē, tē fa’aro’o mai ra te Metua i te ao ra i tāna pure. E’ita tāna e nehenehe e fa’aro’o ’e ’aore rā e hi’o atu iāna, ’ua putapū rā ’oia i tōna here. I ’ite ’oia ē, tē ha’ape’ape’a nei ’oia nō ni’a i te mea tāna e parau ra. ’Aita ’o Blair i hina’aro ’ia hope terā mana’o.
’E ’ua pure ’o Blair ē tae roa atu ’ua parau ’oia i te Metua i te ao ra i te mau mea ato’a tāna i feruri. ’Ua puta mai ra te hō’ē mana’o i roto i tōna ferurira’a. E’ita paha te mau hoa o Blair e ’ite e aha te huru mau nō teie nei ma’i Crohn, ’ua ’ite rā te Metua i te ao ra ’e ’o Iesu Mesia. ’Ua ’ite rāua i tōna māuiui ’e tōna vai-mo’emo’e-ra’a. E ti’a tāmau noa rāua i reira nōna.
Mai te huru ra ē, tē fari’i nei ’o Blair i tē tauahi rahi ’ū’ana. I muri mai i tōna fa’aotira’a i tāna pure, ’ua haere ’oia e ’imi i tōna nā metua nō te fa’a’ite atu ia rāua i te ’ohipa i tupu.
« E aha teie, e ri’a ? » ’Ua ui ’o Māmā.
’Ua ’ata’ata ’o Blair. « ’Aita. ’Ua pure noa vau. »
E mata huru ’ē ihora tō Māmā. « I na’uanei roa ho’i tātou i te ’āpāra’a ia tātou nō te ta’otora’a. ’Ua pure noa ānei ’oe i terā roara’a taime ? »
E mea maoro, terā iho ā ? ’Ua ueue te upo’o ’o Blair. « E au ra ē e tauahira’a rahi i fari’ihia e āna. ’Ua ’ite te Metua i te ao ra ’e Iesu Mesia ra e aha i roto i tō’u ’ā’au. Maoti rāua, ’aita ïa tō’u mana’o mo’emo’e ! »
Fa’ahōho’ara’a nā Tammie Lyon