“Angaʻofa ki he Kilisimasí,” Ko e Kaumeʻá, 4–5 ʻo Tīsema 2023.
Angaʻofa ki he Kilisimasí
Naʻá ne pehē, “ʻE lava pē ke ʻai maʻanautolu ʻeku meʻatokoni hoʻataá.”
Naʻe hoko ʻa e talanoa ko ʻení ʻi Siapani.
Naʻe tokoni ʻa ʻAkali ki hono kiʻi tehina ko Miolí, ʻi he fokotuʻutuʻu ʻenau fakatātā ʻo e ʻAloʻí. Naʻá ne manako ʻi he teuteu ki he Kilisimasí.
Naʻe kakapa hake ʻa e fakatātā ʻo e pēpē ko Sīsuú mei he ʻaiʻangakai ʻo e manú ʻi ha fofonga malimali. Naʻe malimali foki mo ʻAkali. Naʻe hoko ia ke ne fakakaukau ai ki he lahi ʻo e ʻofa ange ʻa Sīsū ʻiate iá. Naʻe tokolahi ha kakai ʻi Siapani naʻe ʻikai ke nau fakamanatua ʻa e ʻaloʻi ʻo Sīsū Kalaisí ʻo hangē ko e fāmili ʻo ʻAkalí. Ka naʻa nau kei foaki pē ha ngaahi meʻaʻofa pea mo feohi mo e fāmilí ʻi he Kilisimasí.
Naʻe tatangi e telefoni ʻa e tangataʻeikí. Naʻá ne toʻo ia ʻo kiʻi talanoa taimi siʻi. Peá ne pehē, “Mālō hono fakamanatu maí.” “Ta toki feʻiloaki ʻi he pongipongi Kilisimasí.” Peá ne tāpuni leva ʻa e telefoní.
“Te ke ʻalu ki he ngāue ʻofá?” Ko e fehuʻi ange ia ʻa ʻAkalí.
Pehē ange ʻa Teti, “Ko ia.” “Te u ʻalu ki Tōkiō ʻo tokoni ʻi hono tufa ʻo e meʻakaí ki he kakai ʻoku nofo tukuhausiá. ʻOku tokoni ha kakai ʻe niʻihi ʻi hotau uōtí ʻi he taʻu kotoa pē.
“ʻE lava nai ke u ʻalu mo au ʻi he taimi ko ʻení?” Ko e fehuʻi ange ia ʻa ʻAkalí.
“ʻIo!” Ko Teti ange ia. “ʻE lava ke haʻu foki mo Mioli.”
ʻI he pongipongi Kilisimasí, naʻe ʻā pongipongia ʻa e fāmili ʻo ʻAkalí ke fakaava ʻa e ngaahi meʻaʻofá. Naʻe saiʻia ʻa ʻAkali ʻi heʻene meʻaʻofá! Naʻá ne fiefia ke toki vaʻinga mo ia ʻamui ange.
Naʻe faʻo ʻe he Fineʻeikí ha meʻatokoni hoʻatā maʻá e taha kotoa pea fāʻofua mo lea māvae ange. Naʻe heka leva ʻa ʻAkali, Teti, mo Mioli ki he lēlué.
ʻI he aʻu ʻa e lēlué ki Tōkioó, naʻe taki ʻe he Tangataʻeikí ʻa ʻAkali mo Mioli ki ha paʻake naʻe lahi ai ʻa e tēnití pea tokolahi mo e kakaí.
Pehē ange e Tangataʻeikí, “Ko e kakai ʻeni ʻoku tau ʻi heni ke tokoniʻí. ʻOku ʻikai ke nau maʻu ha meʻa fēfē, ka ʻe hoko ʻenau maʻu ha meʻakai ʻi he Kilisimasí ko ha tāpuaki kiate kinautolu.
Naʻe fokotuʻutuʻu ʻe ha falukunga kakai ha mā fuopotopoto, ngaahi poulu nūtolo, mo ha hikingaua ʻi he ʻū tēpilé. Naʻe fakatokangaʻi ʻe ʻAkali ha longaʻi fānau ʻe niʻihi ʻi hono toʻú, ʻoku nau tokoni foki mo kinautolu.
“Ko e kakai kotoa ko ʻení mei hotau siasí?” Ko e fehuʻi ange ia ʻa ʻAkali ki he Tangataʻeikí.
“Pehē ange ʻa e Tangataʻeikí, “ʻIkai, ko e konga pē. Hono ʻikai lelei e tokolahi ʻa e kakai ʻoku fie tokoní?”
Naʻe faʻo ʻe ʻAkali, Mioli, mo e Tangataʻeikí ha meʻakai ki ha ngaahi puha. Pea nau toe tokoni ʻi he tufa ʻo e fanga kiʻi puhá ki he kakai ʻi he lainé. Naʻe talaange ʻe ʻAkali ki he taha kotoa, “ʻOfa ke ke Maʻu ha Kilisimasi Fiefia.”
ʻIkai fuoloa kuo ʻosi kotoa e ngaahi puhá. Ka naʻe kei ʻi ai pē ha kakai ia naʻe tuʻu laine ʻo tatali ki ha meʻakai!
Naʻe fakafulofula e Tangataʻeikí. “Mahalo ʻoku ʻikai feʻunga ia.” Naʻá ne tafoki leva ki he kakai naʻe kei tatalí. “Fakamolemole atu. Kuo ʻosi e meʻakaí.”
Naʻe ʻikai loto ʻa ʻAkali ke foki ʻa e kakai ko ʻení, hala ha meʻakai. Naʻe ʻi ai nai ha meʻa te ne lava ʻo fai?
Naʻá ne pehē ange leva, “ʻE lava pē ke ʻai maʻanautolu ʻeku meʻatokoni hoʻataá.”
“Fakakaukau lelei ia!” Ko e Tangataʻeikí ange ia. “Tau ʻoange kotoa ʻetau meʻatokoni hoʻataá.” Naʻe kamokamo ʻa e kau tokoni kehé. Naʻa nau toʻo kituʻa ʻa e meʻatokoni hoʻatā naʻa nau ʻomi maʻanautolú. Naʻe maʻu kotoa ʻe he kakai naʻe tuʻu lainé ha meʻakai!
Naʻe kiʻi fiekaia ʻa ʻAkali, ka naʻe SAI PĒ ia. Naʻe fiemaʻu lahi ange ʻe he kakai ʻi he paʻaké ʻa e meʻakaí ʻiate ia.
Naʻe talaange ʻe he Tangataʻeikí ʻi he lēlué ʻi heʻenau foki ki ʻapí, “ʻOku ou laukau ʻaki koe.” “Meʻa lelei ia siʻo fie vahevahe hoʻo meʻakaí.”
Pehē ange ʻa ʻAkali, “Ko e meʻa ia naʻe mei fai ʻe Sīsuú.”
Naʻe ongoʻi loto māfana mo fiefia ʻa ʻAkali ʻi he toenga ʻo e ʻahó. Pea naʻe ʻikai ʻuhingá pē koeʻuhí ko e Kilisimasí! Naʻá ne fiefiá ko ʻene lava ke vahevahe ʻa e ʻofa ʻa e Fakamoʻuí.
Tā fakatātaaʻi ʻe Amanda Yoshida