“Ofi ki he Kilisimasí,” Ko e Kaumeʻá, Tīsema 2023, 10–11.
Ofi ki heKilisimasí
Ko e tukufakaholo ʻoku saiʻia taha ai ʻa Matí ko hono tutu ʻo e teʻelangó ki he Kilisimasí.
Naʻe hoko ʻa e talanoá ni ʻi Siamane.
“Mati! ʻEmiliani!” Ko e ui ia ʻa e Fineʻeikí. “Kuo taimi ke tutu ʻa e teʻelango ʻi he palé.”
Naʻe tuku leva ʻe Mati ʻene tohí ki lalo kae lele ki he loto falé. Naʻe muimui atu ai hono kiʻi tehina ko ʻEmilianí.
Naʻe lahi ʻa e ngaahi meʻa naʻe saiʻia ai ʻa Mati fekauʻaki mo e Kilisimasí. Naʻe saiʻia ʻi he ngaohi kūkisi lepukusení. Naʻe saiʻia ke teuteuʻi ʻa e fuʻu ʻakaú. Ka ko hono mamaná ʻa e tutu ʻo e ngaahi foʻi teʻelangó ke teuteu ki he Kilisimasí.
Naʻa nau ui ʻeni ko e pale Fakatūʻutá. Naʻe ʻi ai ha foʻi teʻelango ʻe fā ʻi he palé ʻa ia naʻe tuʻu ʻi ha fanga kiʻi vaʻa lanumata. ʻI Siamané, ʻoku tutu ai ʻe he kakaí ʻa e teʻelangó ʻi he Sāpate kotoa pē ʻi he māhina kimuʻa ʻi he Efiafi Kimuʻa ʻi he Kilisimasí. ʻI he ʻuluaki uiké, naʻa nau tutu ai ha foʻi teʻelango ʻe taha. Ko e uike hono hokó, naʻa nau tutu ai ha foʻi teʻelango ʻe ua. Ko e uike tolú, naʻa nau tutu ai e tolu. Pea ko e Sāpate kimuʻa ʻi he Efiafi Kimuʻa he Kilisimasí, naʻa nau tutu kotoa ʻa e fā.
Naʻe sio ʻa Mati ki hono tokoniʻi ʻe he Tangataʻeikí ʻa ʻEmiliani ʻi hono tutu ha foʻi teʻelango ʻe ua. Naʻe hā fakafiefia ʻena ulo lahí.
“Mami, ko e hā hono ʻuhinga ʻo e [fakatūʻuta] ?” Ko e fehuʻi ia ʻa Matí.
“Ko e Fakatūʻutá ko e taimi ia kimuʻa ʻi he Kilisimasí,” ko e tali ia ʻa e Fineʻeikí. “ʻOku tokoni ʻa e teʻelangó ke tau lau ʻa e ngaahi ʻaho ʻoku toé. Pea ʻoku pehē pē mo ʻetau ongo tohi māhina Fakatūʻutá!”
Naʻe ala atu leva ʻa e Fineʻeikí ki he kiʻi fale ʻakau fakaʻofoʻofa ʻi he funga tukuʻanga tohí. ʻO ne hili ia ki he funga tēpilé. Naʻe fiefia ʻa Mati ʻi heʻene mamata pē ki aí.
Naʻe ʻi ai haʻanau tohi māhina Fakatūʻuta ʻe ua ʻi he taʻú ni. Naʻe ʻikai ko ha ongo tohi māhina angamaheni. Ko ha ongo tohi māhina mekehe, ki he Kilisimasí ʻataʻatā pē! Ko e ʻuluakí ko e kiʻi fale ʻakau ʻoku matapā ʻe 24—ko e matapā ʻe taha ki he ʻaho takitaha kimuʻa ʻi he Kilisimasí.
“Ko ho taimi ʻeni ke ke fakaava ai ha matapaá!” Ko ʻene faʻeé ange ia.
Naʻe malimali ʻa Mati mo ne fakaava ʻa e matapā ki he ʻaho ní. Naʻe ʻi ai ha ongo kiʻi foʻi lole ʻi loto! Naʻá ne foaki ʻa e taha kia ʻEmiliani.
Pehē ange leva ʻa e Tangataʻeikí, “ʻOku mou ʻilo, ʻoku toe ʻuhinga ʻa e[fakatūʻutá] ko e hoko mai ʻa ha taha pe meʻa mahuʻinga. ʻOku mou manatuʻi pe ko e tūʻuta mai ʻa hai ʻoku tau fakamanatuá?”
“Sīsū!” Ko e tali fakataha ange ia ʻa Mati mo ʻEmilianí.
Naʻe kamokamo ʻa e fineʻeikí. “Kuo tatali ʻa e kakaí ʻi ha taʻu ʻe lauiafe ke hāʻele mai ʻa Sīsū Kalaisi. ʻOku tau fakamanatua Hono ʻaloʻí ʻi he Kilisimasí. Pea ʻe ʻi ai e ʻaho, te Ne toe hāʻele mai ai ki māmani.”
Naʻe fakakaukauloto ʻa Mati pē ʻe fēfē nai ʻa e taimi ʻe toe hāʻele mai ai ʻa Sīsuú. Naʻá ne ongoʻi loto māfana ai.
“Mati, fakaava ʻa e tohi māhina ʻe tahá!” Ko e lea ange ia ʻa ʻEmilianí.
“ʻIO!” Ne ala atu leva ʻa Mati ki he tohi māhina fika uá. Naʻe ngaohi ia ʻe ʻOma (Kui-fefiné) maʻanaua pē. Ko ha henga ʻoku tautau mei ai ha līpine lōloa ʻe 24. Naʻe tautau ʻi he līpine takitaha ha kiʻi laʻipepa naʻe ʻosi peluki ʻoku ʻi ai ha potufolofola fekauʻaki mo Sīsū Kalaisi. Naʻa nau lau ʻi he ʻaho kotoa pē kimuʻa ʻi he Kilisimasí, ha potufolofola foʻou fekauʻaki mo Sīsū.
Naʻe toʻo leva ʻe Mati ʻa e laʻipepa hokó mei he loufaú. Naʻá ne lau ia, “Vakai, ʻoku ou ʻomi ha ongoongo fakafiefia kiate kimoutolu, pea ki he kakaí kotoa. “He kuo ʻaloʻi kiate kimoutolu ʻi he ʻahó ni, ʻi he kolo ʻo Tēvitá, ha Fakamoʻui, ʻa ia ko Kalaisi ko e ʻEikí.”*
Naʻe ongoʻi nonga ʻa Mati ʻi heʻene mamata mo hono fāmilí ki he ulo ʻa e teʻelangó. ʻI ha uike ʻe ua, naʻa nau tutu kotoa ʻa e foʻi teʻelango ʻe fā, pea ʻe ʻosi leva ʻa e tatali ki he Kilisimasí! Ka naʻe ʻiloʻi ʻe Mati ʻoku ʻikai ko e Kilisimasí pē ʻa e meʻa naʻa nau tatali ki aí. Naʻa nau tatali ke toe hāʻele mai ʻa Sīsū Kalaisi.
Ngaahi tā fakatātaá ʻa Violet Lemay