“Tulama ʻo e ʻAloʻí,” Ko e Kaumeʻá, Tīsema 2023, 26–27.
Tulama ʻo e ʻAloʻí
Fakaʻaongaʻi ʻa e fakamatala ko ʻení ke fai ʻaki ʻa e talanoa ʻo hono ʻaloʻi ʻo Sīsū Kalaisí.
Tā fakatātaaʻi ʻe Simini Blocker
Tokotaha Laukongá: ʻI ha pō ʻe taha ʻi Pētelihema, naʻe fiemaʻu ai ʻe Mele mo Siosefa ha feituʻu ke na nofo ai. Naʻe ʻamānaki ke fānauʻi ʻe Mele ha kiʻi pēpē. ʻE hoko ʻene pēpeé ko Sīsū Kalaisi, ko e Fakamoʻui ʻo e Māmaní.
[Fononga ʻa Siosefa mo Mele ki he tauhi ʻo e fale talifonongá.]
Siosefa: Kātaki. ʻOkú ma fiemaʻu ha feituʻu malu ke ma nofo ai ʻi he poó ni.
Tauhi ʻo e Fale Tali-fonongá: ʻOku ʻikai ke ʻi ai ha loki ia. Ka ʻo kapau te mo fiemaʻu, te mo lava ʻo nofo ʻi he fale tauhiʻangá mo e fanga monumanú.
[Fononga ʻa Siosefa mo Mele ki he fale ʻo e fanga monumanú.]
Tokotaha Laukongá: Naʻe ʻaloʻi ʻe Mele ʻa e pēpē ko Sīsuú ʻi he fale ʻo e fanga monumanú.
[Fuofua ʻe Mele ʻa e pēpē ko Sīsuú]
Tokotaha Laukongá: Naʻe tokangaʻi ʻe he kau tauhisipí ʻenau fanga sipí ʻi ha loto-ʻataʻatā ofi pē.
[Tuʻu ʻa e kau tauhisipí ʻi he tafaʻaki ʻo e fanga sipí.]
Tokotaha Laukongá: Naʻe haʻu ha ʻāngelo ki he kau tauhisipí. ʻI he kamataʻangá, naʻe ilifia ʻa e kau tauhisipí.
[Hā ʻa e ʻāngeló ki he kau tauhisipí.]
ʻĀngeló: ʻOua te mou manavahē. He kuo ʻaloʻi kiate kimoutolu ʻi he ʻahó ni … [ha] Fakamoʻui, ʻa ia ko Kalaisi ko e ʻEikí.
Tokotaha Laukongá: Naʻe fakahā ʻe he ʻāngeló ki he kau tauhisipí te nau ʻilo ʻa e pēpē ko Sīsuú ʻoku tokoto ʻi ha ʻaiʻangakai ʻo e manú. Naʻe haʻu mo ha kau ʻāngelo tokolahi ange ʻo hiva. Pea fononga leva ʻa e kau tauhisipí ki he fale tauhiʻanga ʻo e fanga monumanú ʻi Pētelihema.
[Fononga ʻa e kau tauhisipí kia Mele, Siosefa, mo e pēpē ko Sīsuú.]
Tauhisipí: Ko hotau Fakamoʻuí Ia. ʻOku totonu ke tau fakahā ki he taha kotoa pē!
[Mavahe ʻa e kau tauhisipí meia Mele, Siosefa, mo e pēpē ko Sīsuú.]
Tokotaha Laukongá: Naʻe toe ʻilo foki mo ha Kau Tangata Poto fekauʻaki mo e pēpē ko Sīsuú. Naʻa nau muimui ʻi ha foʻi fetuʻu ke kumi Ia.
[Hiki hake ʻe he tokotaha laukongá ʻa e foʻi fetuʻú. Muimui ʻa e Kau Tangata Potó ʻi he fetuʻú kia Mele, Siosefa, mo e pēpē ko Sīsuú.]
Tokotaha Laukongá: Naʻe hū ʻa e Kau Tangata Potó kia Sīsū.
Tangata Potó: Naʻe pehē ʻe he folofolá te Ne hāʻele mai ʻi ha ʻaho. ʻOku mau ʻomai ha ngaahi meʻaʻofa maʻa hotau Tuʻí.
Tokotaha Laukongá: Te tau lava foki ʻo foaki ha meʻaʻofa kia Sīsū ʻi he Kilisimasi ko ʻení. Te tau lava ʻo ʻofa ʻiate Ia. Te tau lava ʻo tokoni ki ha niʻihi kehe. Te tau lava ʻo vahevahe ʻEne māmá mo e māmaní!