“Ko e Sitōkeni Hinehiná,” Ko e Kaumeʻá, Tīsema 2023, 36–37.
Ko e Sitōkeni Hinehiná
Naʻe ʻikai fakakaukau ʻa Sākele ia ʻe faifaiangé pea liliu hono tuongaʻané.
Naʻe hoko ʻa e talanoa ko ʻení ʻi he ʻIunaiteti Siteiti ʻo ʻAmeliká.
Naʻe kata ʻa Sākele ʻi he ngaahi fakatātā fakaoli ʻa hono tokouá. Ko e Efiafi ʻeni Kimuʻa ʻi he Kilisimasí, pea naʻá ne vaʻinga mo hono fāmilí ʻi ha vaʻinga tā fakatātā takatakai ʻi he veʻe tofunangá.
Ko e Efiafi Kimuʻa ʻi he Kilisimasí ko e ʻaho manako taha ia ʻo Sākelé ʻi he taʻú kakato. Naʻá ne ongoʻi fiemālie mo fiefia ʻi he hili kotoa e fanga kiʻi meʻa ifó mo e makiʻikiʻí. Naʻe ʻikai ke ne loto ke ʻosi!
Naʻe pehē ange ‘e Mami, “Sai.” “Kuo taimi ki he sitōkeni hinehiná!”
Naʻe malimali ʻa Sākele. Ko e taha ʻo e ngaahi tukufakaholo naʻe saiʻia taha aí ko e ʻAho ko ʻeni Kimuʻa ʻi he Kilisimasí.
ʻI he feituʻu naʻá ne nofo aí, naʻe tautau ʻe he kakaí ha ngaahi sitōkeni lalahi hinehina fakaʻofoʻofa ʻi he veʻe tofunangá ʻi he Kilisimasí. ʻI he pongipongi Kilisimasí, ʻe ʻosi fakafonu kinautolu ʻaki ha fanga kiʻi fakaneifua! Ka naʻe makehe ange ʻa e sitōkeni ko ʻení. ʻE fakafonu ia ʻe Sākele mo hono fāmilí ʻaki ha ngaahi meʻaʻofa maʻa Sīsū.
Naʻe toʻo hake ʻe he Fineʻeikí ha sitōkeni hinehina fakaʻofoʻofa fakatapa lanu koula. Hili ia peá ne ʻoange ki he tokotaha takitaha ha kiʻi laʻipepa mo ha peni vahevahe. Naʻá ne pehē, “Hiki ha meʻa ʻe taha ʻokú ke fie palōmesi kia Sīsū ʻi he taʻu kahaʻú.”
Naʻe tānaki mai ʻe he Tangataʻeikí, “Pea te ma faʻo ia ʻi he sitōkení, pea tau lau kinautolu ʻi he taʻu kahaʻú ʻi he Efiafi Kimuʻa ʻi he Kilisimasí.” “Ka ko e ʻuluakí, tau lau muʻa ʻetau ngaahi palōmesí mei he taʻu kuo ʻosí.”
Naʻe ala hifo leva ki he loto sitōkení ʻo tohoʻi hake ha fanga kiʻi konga pepa lōloa mei he taʻu kuo ʻosí. Naʻá ne tufa kinautolu, pea lau fakalongolongo pē ʻe Sākele ʻene laʻi pepá: “Te u tokoni lahi ange ʻi ʻapi.” Naʻá ne fakakaukau naʻá ne fakahoko lelei e ngāue ko iá ʻi he taʻu ko ʻení. Ka ko e hā te ne hiki ʻi he taimi ní?
Naʻe lea fiefia ange hono tokouá, “ʻOku ou ʻilo ʻa e meʻa te u tohí!”
Naʻe fakakaukau ʻa Sākele ki he meʻa te ne lava ʻo foaki kia Sīsuú. Ko e hā te ne lava ʻo fai lelei ange ʻi he taʻu kahaʻú ke tatau lahi ange ai mo Iá? Ko e hā ʻokú Ne finangalo ke ne fakahokó?
Ko e taimi ia naʻá ne fakatokangaʻi ai hono tuongaʻane lahí, ʻa Palaiteni, ʻokú ne tohi ha meʻa ʻi heʻene kiʻi laʻi pepá.
Naʻe kiʻi fakafulofula ʻa Sākele. Naʻe ʻikai ke lava ʻo sio ki he meʻa naʻá ne tohí, ka naʻá ne fakapapauʻi he ʻikai ko ha meʻa ia te ne fakahoko moʻoni.
Naʻe faʻa fakamataliliʻi lahi ʻe Palaiteni ʻa Sākele, pea naʻe ʻikai ke na fuʻu vālelei ʻi he taʻu ko ʻení. Naʻe ʻofa pē ʻi hono tuongaʻane lahí, ka naʻe ʻikai fakakaukau ia ʻe teitei feinga ke tatau ange mo Sīsū.
Naʻá ne fakakaukau, Ko e hā naʻe anga-taʻe-ʻofa pehē ai kiate aú?
Naʻá ne sio pē ʻi heʻene pelupelu ʻene kiʻi laʻi pepá mo faʻo ki he loto sitōkeni hinehiná.
Fakatokangaʻi ʻe Palaiteni ʻene sio fakamamaʻu angé pea malimali. Naʻá ne pehē ange, “ʻOua ʻe fakasiosio.”
Naʻe toe sio ʻa Sākele ki heʻene laʻi pepá peá ne tohiʻi, “Te u feinga ke u angalelei ki he taha kotoa ʻi he taʻú ni.” Peá ne faʻo leva mo ʻene laʻipepá ki he loto sitōkení.
Ne ʻikai fuoloa kuo hoko e taimi mohé. Ka naʻe ʻikai lava ʻa Sākele ʻo taʻofi ʻene fakakaukau ki he meʻa kuo tohiʻi ʻe Palaitení. Naʻe ʻikai totonu ke lau ʻe ha taha ʻa e palōmesi ʻa ha taha kia Sīsuú, ka naʻá ne fuʻu fieʻilo moʻoni!
Lolotonga e teuteu ʻa e toengá ke mohé, totolo atu ʻa Sākele ia ki he sitōkeni hinehiná. Naʻá ne kumi ʻa e laʻipepa ʻa Palaitení peá ne fakaava.
ʻOku pehē ai, “ʻOku ou palōmesi ke u angaʻofa ange kia Sākele ʻi he taʻú ni.”
Naʻe ʻikai ke ne faʻa-faʻa-tui ki ai. Ko e meʻa moʻoni nai ʻeni naʻe tohi ʻe Palaitení? Naʻá ne ongoʻi ʻoku fakatē-loʻimata peá ne toe faʻo fakafoki fakalelei leva ʻa e kiʻi laʻipepá ki he loto sitōkení.
ʻOku pehē maʻu pē ʻe he Fineʻeikí ʻe lava ʻa e tui kia Sīsū Kalaisí ʻo tokoniʻi ha taha pē ke liliu pea hoko ʻo tatau ange mo Ia. Mahalo pē naʻá ne moʻoni. Mahalo ʻe lava moʻoni ʻa Sīsū ʻo tokoniʻi ʻa Palaiteni mo ia ke na feangaleleiʻaki lahi ange.
ʻI he pongipongi hono hokó naʻe kei ongoʻi loto māfana pē ʻa Sākele ʻi heʻene tangutu hifo ki he kai pongipongí. Ko e taimi pē naʻe hifo mai ai ʻa Palaiteni ʻi he sitepú, naʻá ne puke ia ʻo fāʻofua kiate ia.
Naʻe mataʻi ʻohovale ʻa Palaiteni. “Heei, ko e hā ʻeni?”
Naʻá ne pehē ange, “Naʻá ku fiemaʻu pē ke u fāʻofua kiate koe. ʻOfa ke ke Maʻu ha Kilisimasi Fiefia!”
Naʻe kiʻi malimali ʻa Palaiteni pea fāʻofua mai ki ai. “ʻOfa ke ke Maʻu ha Kilisimasi Fiefia.”
Ngaahi tā fakatātā ʻa Kevin Fales