“Koeʻuhí ko Sīsū,” Ko e Kaumeʻá, Tīsema 2023, 32.
Kaumeʻa ki he Kaumeʻa
Koeʻuhí ko Sīsū
Toʻo mei he “Christmasʻs Greatest Gift” (Fakataha Lotu Faka-Kilisimasi ʻa e Kau Palesitenisī ʻUluakí, Tīsema 4, 2022), Gospel Library.
Ngaahi tā fakatātā ʻa Brooke Smart
ʻOku tokolahi ha kakai ʻi Potukali ʻoku nau fokotuʻu ha fakatātā ʻo e ʻaloʻi ʻo Sīsū Kalaisí. Te ke lava ʻo mamata ki ha ngaahi fakatātā ʻo e ʻAloʻí ʻi he fonuá kotoa ʻi he Kilisimasí.
Naʻá ku manako ke fokotuʻu ʻa e fakatātā ʻo e ʻAloʻí, ʻi heʻeku kei siʻí. ʻI he Kilisimasi kotoa pē, ʻoku mau toʻo ki tuʻa ha puha papa. Naʻe fakafonu ʻaki ia ha fanga kiʻi tamapua ʻo ha kakai, ngaahi fale, ngaahi faama, mo ha fanga monumanu. Naʻa mau maʻu ha musie matolu foʻou (moss), mohuku (hay), mo ha ngaahi maka ke faʻu ʻaki ha fanga kiʻi tafungofunga, teleʻa, ʻuluʻakau, mo ha ngaahi feituʻu ʻataʻatā. Naʻe aʻu ʻo mau fakaʻaongaʻi ha fanga kiʻi konga sioʻata ke hangē ha ngaahi vaitafé mo ha tafenga vaí.
Naʻe lauiʻaho pe lauiuike ʻemau langa fakakongokonga ʻení. Ko e konga mahuʻinga tahá ko hono tānaki atu ʻo e kakai mei he talanoa ʻi he folofolá. Naʻa mau fokotuʻu ʻa Mele, Siosefa, kau tauhisipí, kau ʻāngeló, mo ha niʻihi kehe, ʻi lotomālie, pea fakamatalaʻi ʻa e talanoá fekauʻaki mo kinautolu.
Ko e taimi naʻe hoko ai ʻa e Kilisimasí, naʻa mau tuku leva ʻa e ʻīmisi ʻo e valevale ko Sīsuú ʻi he ʻaiʻangakai ʻo e manú. Pea mau fakamatala leva ʻa e ngaahi talanoa fekauʻaki mo Sīsū Kalaisí. Naʻa mau fakamatala ki he anga ʻo ʻEne hoko ko e meʻaʻofa maʻongoʻonga tahá, tuʻunga ʻi he meʻa naʻá Ne fakahoko maʻatautolú. ʻOkú Ne ʻomai ha nonga mo ha ʻamanaki lelei kiate kitautolu. ʻOku tokoni mai ke tau ʻiloʻi pe ko hai kitautolu mo e ʻuhinga ʻoku tau ʻi heni aí. ʻOkú Ne tataki mo fakafiemālieʻi kitautolu.
Te tau lava ʻo vahevahe ʻetau māmá, tuʻunga ʻia Sīsū. Te tau lava ʻo foaki ki he niʻihi kehé ha ʻofa, angaʻofa, mo tokoni, ʻo aʻu pē ki he taimi ʻoku tau ongoʻi ai ʻoku siʻisiʻi ha meʻa ke tau foakí.