“Lotu ʻi he Malaʻevaʻingá,” Ko e Kaumeʻá, Tīsema 2023, 30–31.
Lotuʻi he Malaʻevaʻingá
Naʻe ongoʻi lōmekina mo faingataʻaʻia ʻaupito ʻa Tavi heʻene feinga ke ako ʻa e lea faka-Pilitāniá!
Naʻe hoko e talanoa ko ʻení ʻi ʻIngilani.
Naʻe vēkeveke ʻa Tavi ki he taimi vaʻingá. Naʻá ne feinga mālohi ke fanongo ki heʻene faiakó, ʻa Misi Teila. Ka naʻe faingataʻa ke mahino kiate ia ʻa e meʻa naʻe lea ʻaki ʻe [Misi Teila] ʻi he lea faka-Pilitāniá. Naʻe ongoʻi lōmekina mo faingataʻaʻia ʻaupito ʻa Tavi.
Naʻe toki hiki mai ʻa e fāmili ʻo Taví mei Palāsila ki ʻIngilani. Naʻe ʻi ai hano ʻapi foʻou mo ha ʻapiako foʻou. Ka ko e liliu lahi tahá he kuo ʻi ai ʻeni ha lea fakafonua foʻou ke ako ʻe Tavi! Naʻá ne ʻofa ki hono ʻapi motuʻá. Naʻá ne ʻofa ki he kotoa hono ngaahi kaungāmeʻá he naʻa nau lea faka-Potukali kotoa hangē pē ko iá.
Naʻe pasiʻi ʻe Misi Teila hono ongo nimá. Naʻá ne pehē ange, “Taimi vaʻinga!”
Naʻe puna ki ʻolunga ʻa Tavi mei hono seá. Naʻá ne ʻiloʻi ʻa e foʻi lea ko iá! ʻE lava ke ne kai ha kiʻi meʻakai mo vaʻinga ʻi he heké. Pea te ne lava ʻo kiʻi mālōlō mei he ako ʻo e lea faka-Pilitāniá.
Ko e taimi naʻe hū ai ʻa Tavi ki tuʻá, naʻe lele muʻomuʻa ʻiate ia ha longaʻi fānau kehe ke vaʻinga. Naʻa nau ʻosi maheni pē. Pea nau lea kotoa ʻi he lea fakafonua tatau. Ko e taimi naʻe feinga ai ʻa Tavi ke fanongo kiate kinautolú, naʻá ne toe ongoʻi faingataʻaʻia ʻaupito. Naʻá ne ongoʻi tuenoa ʻaupito.
Naʻe fakakaukau ai ʻa Tavi, Pehēange mai ne ʻi ai haku kaungāmeʻa. Ko e hā ʻoku totonu ke u faí?
Naʻe manatuʻi ʻe Tavi ʻa e meʻa naʻe talaange ʻe heʻene faʻeé mo ʻene tamaí ki ai. Naʻá na talaange, “Te ke lava ʻo lotu ʻi ha faʻahinga taimi pē, ʻi ha feituʻu pē, pea ʻe fanongo atu ʻa e Tamai Hēvaní kiate koe.”
Ko e taimi lelei taha ʻeni ke lotu aí!
Ne kiʻi siosio takai ʻa Tavi ʻi he malaʻe vaʻingá. Naʻá ne fakatokangaʻi ha kiʻi fale vaʻinga papa. Naʻe hū atu ʻa Tavi ki loto. Naʻe lōngonoa ia. Naʻá ne tūʻulutui leva, kūnima, pea kuikui hono matá.
“ʻE Tamai Hēvani ʻofeina, ʻoku ou fie vaʻinga mo e longaʻi fānau kehé. ʻOku ou fie ako ʻa e lea faka-Pilitāniá. ʻAloʻofa muʻa ʻo tokoniʻi au.”
ʻI he taimi naʻe ʻosi ai ʻa e lotu ʻa Taví, naʻá ne maʻu ha ongo fakamāfana, mo nonga ʻi hono lotó. Naʻá ne ʻiloʻi ʻe tatau ai pē kapau he ʻikai tokolahi hano ngaahi kaungāmeʻa, ka ʻoku hoko maʻu pē ʻa e Tamai Hēvaní ko hono kaungāmeʻa.
Hili ʻa e taimi vaʻingá, naʻe toe foki ʻa Tavi ki he loki akó. Naʻe kei faingataʻa pē ke mahino ʻa e lea faka-Pilitāniá. Ka naʻá ne fakakaukau ke kei feinga pē!
Naʻe lau-uike ʻa e feinga ʻa Taví. Naʻá ne lau ha ngaahi talanoa lahi ʻi he lea faka-Pilitāniá. Naʻá ne fakafanongo kia Misi Teila. Naʻá ne ako foki ke lea ki he longaʻi fānau kehé.
Ko e taimi kotoa pē naʻe ongoʻi loto-mamahi ai ʻa Taví, naʻá ne fai ha lotu. Ko e taimi kotoa pē naʻe langa ai hono ʻulú ʻi heʻene feinga ke ako e lea faka-Pilitāniá, naʻá ne fai ha lotu. Pea ko e taimi kotoa pē naʻe lotu aí, naʻe tokoniʻi ia ʻe he Tamai Hēvaní ke ne ongoʻi nonga. Naʻá ne ongoʻi ʻo hangē te ne kei lava pē ʻo feingá.
Naʻe ʻosi atu mo ha ngaahi uike lahi ange. Naʻe faingofua ange ke mahino kiate ia ʻa Misi Teila. Naʻe kamata leva ke fakakaungāmeʻa ʻa Tavi pea talanoa mo kinautolu. Naʻe aʻu ʻo ne maʻu ha pale ʻi he akó ʻi he ngāue mālohí mo e laukonga leleí!
Naʻe haʻu ha tokotaha ako foʻou ʻi ha ʻaho ʻe taha ki he kalasi ʻa Taví, ʻi he akó. Ko hono hingoá ko Leo. Naʻá ne haʻu mei ha fonua ʻe taha pea naʻe ʻikai ke poto lelei ʻi he lea faka-Pilitāniá.
ʻI he taimi vaʻingá, naʻe fakatokangaʻi ʻe Tavi ʻa Leo ʻoku tangutu toko taha pē ʻi he heké. Naʻá ne mata mamahi. Naʻe manatuʻi ʻe Tavi ʻa ʻene ongoʻi taʻelata ʻi he taimi naʻe kei foʻou aí. Naʻá ne fie hoko ko ha kaungāmeʻa ʻo Leo.
Naʻe lele leva ʻa Tavi kia Leo. “Mālō e Lelei. Ko Tavi au.” Naʻá ne toʻo ha foʻi pulu soka. “Ke fie vaʻinga?”
Naʻe kamo ʻa Leo pea hifo mei he heké.
Naʻe ongoʻi loto-māfana ʻa Tavi. Naʻe fiefia ʻi heʻene lava ʻo hoko ko ha kaungāmeʻa kia Leó, ʻo hangē ko e hoko ʻa e Tamai Hēvaní ko ha kaungāmeʻa kiate iá.
Ngaahi tā fakatātā ʻa Maja Andersen