« Te fa’a’orera’a hapa mai ia Nephi », Hoa, Tēnuare 2024, 4–5.
Te fa’a’orera’a hapa mai ia Nephi
’Aita ’o Aisea i hina’aro ’ia vai riri noa ia Josh e a muri noa atu.
’Ua tupu teie ’ā’amu i te Fenua Marite.
’Ua horo Aisea ’e ’ua tu’e i te pōpō i tōna hoa, ia Timothy ra. ’Ua hi’o ’oia ia Timothy i te hutira’a i tōna ’āvae nō te tu’e i te pōpō i roto i te tāpa’o.
« ’Ua ō ! » ’Ua tuō Timothy i te tōra’a te ’ūpe’a i te pōpō.
’Ua pōpou Aisea. Tei ia rātou te rē !
’A haere ai ’oia i rāpae i te tahua tu’era’a, ’ua ’oa’oa roa ’oia ! I muri iho rā, ’ua pi’i mai te hō’ē o te mau tamari’i nō te tahi atu pupu, ’o Josh, iāna i te hō’ē i’oa ’ino.
’Ua māere Aisea ’e ’ua māuiui ato’a. ’Aita ’oia i ’ite e aha te mea e parau atu. Hi’o a’era ’oia i raro i te repo ’e haere marū noa atu ra i tōna mau hoa pupu ra.
« ’Ua upo’oti’a tātou ! » ’Ua parau Timothy. « Maita’i roa tā ’oe fa’ahaerera’a mai i te pōpō, e Aisea ».
Tē vai noa ra rā tō Aisea au ’ore. I muri a’e i te mea tā Josh i parau iāna ! ’Ua ’oto ’oia ’e te riri.
I te toe’a o te mahana, e au ra ia Aisea ē, tē huti ra hō’ē ’ohipa teimaha iāna i raro. ’Aita ’oia i here fa’ahou ia Josh.
I taua pō ra, ’ua pārahi atu Aisea i pīha’i iho i tōna ’utuāfare i te taime nō te pāpa’iraa mo’a. ’Ua tāmata ’oia i te fa’aro’o i tōna tuahine ’ia tai’o. ’Aita rā i nehenehe iāna ’ia fa’aea i te feruri i te mea tā Josh i parau.
Fefeu a’e ra Aisea i te mau ’api o tāna Buka a Moromona. ’Ua fa’aea ’oia i ni’a i te hō’ē pāpa’ira’a mo’a i roto i te 1 Nephi. Tei te hō’ē tau taime i ’ino ai te mau taea’e o Nephi i ni’a iāna.
« ’E i muri a’era, ’ua fa’a’ore mau vau i te mau mea ato’a tā rāua i rave », tē nā reira ra te pāpa’ira’a mo’a.*
’Ua fa’a’ore mau ānei Nephi i te hapa a tōna mau taea’e ? Mana’o a’era Aisea. Noa atu i muri a’e i te rirora’a ’ei mea ’ino mau ?
’Ua feruri a’era Aisea ia Josh. ’Aita ’oia i hina’aro e tāpe’a noa i tōna mau mana’o ’ino nō Josh e a muri noa atu. E 10 noa tōna matahiti !
’Ua hina’aro Aisea ’ia riro mai ia Nephi te huru. E nehenehe iāna e fa’a’ore i te hapa a Josh, mai tā Nephi i fa’a’ore i te hapa a tōna mau taea’e. ’E mai te mea e parau fa’ahou Josh i te hō’ē ’ohipa ’ino, e ani noa ’oia iāna ’eiaha e nā reira.
’Ua fāri’i a’era ’oia i roto iāna te mana’o māhanahana ’e te hau. Mai te huru ra ē, tē parau mai ra te Vārua Maita’i, « tē rave ra ’oe i te mea ti’a ».
« E Aisea, e aha tā ’oe i ’apo mai nā roto mai i teie mau ’īrava ? » Ui a’era māmā.
Hi’o atu ra Aisea i ni’a. « ’Eiaha e ’ino’ino mai, tē tai’o ra vau i te tahi atu pāpa’ira’a mo’a », ’ua parau ’oia. Fa’ati’a atu ra ’oia i tōna ’utuāfare i te ’ohipa i tupu i te tu’era’a pōpō.
’Ua tauahi atu māmā ’e ’o pāpā ia Aisea. « Tē pe’ape’a nei au nō te ’ino ’o Josh i ni’a ia ’oe » ’ua parau pāpā. « Te mea tāna i parau e ’ere ïa i te parau mau.« »Terā rā, e mea māuiui ihoā te reira ».
’Ata’ata a’era Aisea. « Māuruuru. Nō te tahi tau taime, ’ua riri roa ihoā vau. I teienei rā, i tō’u tai’ora’a i te mau pāpa’ira’a mo’a, ’aita vau e hina’aro e ’ino’ino noa iāna. Tē hina’aro nei au e fa’a’ore i tāna hapa. ’E ’ua maita’i a’ena vau ! »
« E mea fa’ahiahia mau ! » ’Ua ’ata ato’a māmā. « E ’ere te fa’a’orera’a hapa i te mea ’ōhie i te mau taime ato’a.« »’Ua tano rā ’oe.« »E mea hoʼona te reira ! »
’Ua hi’o a’era Aisea i tāna mau pāpa’ira’a mo’a. ’Ua tauturu te reira iāna ! Te teimaha nā mua atu, ’ua ’ore roa. ’Ua fāri’i tōna ’ā’au i te māhanahana ’e te hau.
Fa’ahōho’ara’a nā Alyssa Tallent