« Te mau pāpa’ira’a mo’a a Sami », Hoa, Tēnuare 2024, 10–11.
Te mau pāpa’ira’a mo’a a Sami
’Ua hina’aro Sami e tai’o ato’a.
’Ua tupu teie ’ā’amu i te fenua Pōrīvia.
’Ua pōpō Papi i te hope’a o te purera’a pō ’utuāfare. « E mana’o tō’u nō te hō’ē fā ’utuāfare », tāna ïa i parau. « E tai’o ’āmui ana’e tātou i te Buka a Moromona i te mau mahana ato’a ».
’Ua tā’iri’iri te mau taea’e pa’ari o Sami, ’o Andrés ’e ’o Juan, i te upo’o ma te ’ata’ata rahi i tāua mana’o ra.
« Nā reira », ’ua parau Andrés.
’Ua ’oa’oa roa ato’a ’o Sami. I muri iho rā, tē ha’amana’o ra ’oia i te hō’ē mea. ’Ua ’āfa’i ’oia i tōna rima i ni’a. « ’Aita vau i ’ite i te tai’o.« »Nāhea vau e nehenehe ai e tauturu ? »
’Ua ha’ape’e a’era Juan i tōna tapono. « E nehenehe ’oe e fa’aro’o noa ».
’Ua ’ite a’ena nā taea’e o Sami i te tai’o. E pae noa rā matahiti tō Sami. ’Aita ā ’oia i ha’api’i atu ra i te tai’o.
« Tē hina’aro ato’a nei rā vau e tauturu ! » ’Ua parau Sami ma te mata tu’atu’a.
’Ua tauahi atu māmā ia Sami. « E nā reira ’oe », ’ua parau māmā. « Tē vai ra ihoā hō’ē rāve’a nō te rave i te mea tā te Atua i fa’aue mai ia tātou ».
I te pō i muri iho, ’ua putuputu te ’utuāfare o Sami nō te tai’o i te Buka a Moromona. ’Ua ’āfa’i mai rātou pā’āto’a i tā rātou iho mau pāpa’ira’a mo’a, ’eiaha rā ’o Sami. ’Ua hōro’a māmā iāna i te hō’ē buka hōho’a nō te mau ’ā’amu o te Buka a Moromona.
« ’Aita ā ’oe i ’ite i te tai’o i te mau ta’o.« »E nehenehe rā ’oe e tai’o i te mau hōho’a », tāna ïa i parau ma te ’ata’ata.
’Ua tāpe’a pūai Sami i te buka i roto iāna. I teienei, e nehenehe ato’a ’oia e tai’o ’e tōna ’utuāfare !
E tai’o rātou pā’āto’a te tahi i muri mai i te tahi. ’Ua hi’o Sami i te mau hōho’a e fa’a’ite ra i te ’ā’amu. ’Ia tae mai tōna taime, e fa’ati’a ’oia ia rātou i te mea tāna e ’ite ra i ni’a i te mau hōho’a. E parau ’oia e rave rahi mau ha’apāpūra’a e noa’a iāna.
’A ma’iri noa ai te mau mahana, ’ua hina’aro Sami e tai’o rahi atu ā. ’Ua ha’api’i māmā iāna e aha te ta’ira’a o te reta tāta’itahi. I muri iho, ’ua fa’a’ite iāna nāhea ’ia fa’ahiti i te mau ta’o. Tau ’āva’e i muri mai, ’aita ’o Sami i hina’aro rahi i te buka hōho’a. Maoti ra, ’ua tai’o ’oia i te ta’o hope’a o te ’īrava tāta’itahi tā tōna ’utuāfare e tai’o. E tai’o māmā i te ta’o mātāmua, ’e e fa’ahiti mai o Sami i te reira.
I te ha’amatara’a, e tai’o marū noa rāua. E taime roa mau e oti ai te tai’ora’a i te hō’ē pene. E ’ū’uru noa Andrés ’e ’o Juan, ’ia tae ana’e i te taime o Sami. Terā rā, tē tai’o noa nei ā rātou ’ei ’utuāfare.
’Ua tere marū noa te tai’ora’a a Sami. E tai’o ’oia hō’ē ta’o o te hō’ē ’īrava, i muri iho e piti ta’o, i muri iho e toru ta’o. I muri iho, ’ua ha’amata ’oia i te tai’o hō’ē ’īrava tā’āto’a !
’Ia fātata te hope’a o tā rātou fā, ’ua ti’a ia Sami ’ia tai’o ’oia ana’e i te tahi mau ’īrava. ’Ua haere maita’i roa mai tāna tai’ora’a. ’Ua rahi ato’a tōna here i te Buka a Moromona.
I te hope’a, ’ua fa’aoti te ’utuāfare o Sami i te tai’o i te Buka a Moromona. ’Ua rave te reira e piti matahiti te maoro ! I teienei e hitu matahiti tō Sami, ’e ’ua ha’api’i maita’i roa ’oia i te tai’o.
« Tē ha’apoupou nei au ia tātou ! » ’Ua parau pāpi. « ’Ua rave tātou i te reira ! »
’Ua pōpō Sami ’e tōna ’utuāfare. ’Ua tauturu ’oia ia rātou ’ia fa’aoti i te tai’o i te Buka a Moromona !
’Ua tauahi maita’i roa Juan ia Sami. « E aha tā ’oe fā nō nā matahiti e piti i muri nei ? »
’Ua ’ata’ata Sami. ’Ua ti’a ’āfaro ’oia ’e ’ua nā ’ō mai, « e tai’o fa’ahou vau i te Buka a Moromona ! »
Faʼahōho’araʼa nā Melissa Manwill Kashiwagi