« Te ’ōro’a maita’i roa a’e nō Pāpā », Hoa, Tēnuare 2024, 18–19.
Te ’ōro’a maita’i roa a’e nō Pāpā
’E mai te mea ’aita ana’e te ua e fa’aea ?
’Ua tupu teie ’ā’amu i Samoa.
Tē ha’apōiri ra ’e tē pōiri mau ra te ra’i. ’Ua hi’o pōiri Alex i te ra’i.
PARARĀ !
’Ua rahi atu te hāruru o te pātiri. ’Ua topa te ua rahi ’e te ua rahi mau nā te mau vāhi ato’a.
’Ua tā’iri’iri Alex i tōna upo’o. E ’ere i te mea maita’i. ’Aita roa atu. I te tahi taime, i Samoa, e nehenehe te ua e topa e rave rahi mahana ma te fa’aea ’ore. ’Ua hina’aro rā ’oia ’ia maita’i roa te mahana fānaura’a o tōna pāpā rū’au !
’Ua haere atu Alex i roto i tōna piha ’e ’ua tūturi i pīha’i iho i tōna ro’i.
Nā ’ō atu ra : « E te Metua here i te ao ra ». « ’A fa’ahaere ’ē atu na ’oe i te ua i te taime nō te ’ōro’a mahana fānaura’a nō Pāpā ananahi. ’Ua fa’atae a’ena mātou i te mau tītaura’a manihini. I te i’oa o Iesu Mesia, ’āmene ».
I te ti’ara’a mai Alex, ’ua ’ite atu ’oia ia māmā ’e ia pāpā e ti’a ra i tōna ’ūputa piha. ’Ua ’ata’ata mai ra rāua.
« Maita’i ē, ’aita te reira e ha’ape’ape’a ra ia ’oe, nō te mea ’ua fa’aro’o māua i tā ’oe pure », ’ua parau māmā.
’Ua ’ata’ata Alex. « ’Aita e fifi. ’Ua hina’aro noa vau ’ia riro ananahi ’ei mahana ta’a ’ē nō Pāpā. E ’ere i te hō’ē ā huru mai te mea e fa’aea noa tātou i roto. ’Aita tō tātou e vāhi nō te ’ori ! »
’Ua tāpe’a ’o Pāpā i te tapono o Alex. « Noa atu te huru o te reva, ’ua ’ite Pāpā i tō ’oe here rahi iāna ».
I te po’ipo’i a’e, ’ua ani māmā ’e ’o pāpā ia Alex ’ia fa’aoti i te pure ’utuāfare. Tē ua pūai noa ra ïa. ’E mai tē au ra ē, e’ita roa atu e fa’a’ite mai ra e mau te reira.
« ’A ha’amaita’i nā i te ua, ’ia haere ’ē atu i te taime nō te fa’a’oa’oara’a », ’ua parau ’oia. « ’E ’a ha’amaita’i mai nā ’ia mātou pā’āto’a ’ia fāri’i i te hō’ē taime maita’i. Nō Pāpā iho ā rā ! »
’Ua hi’ohi’o noa Alex i te ra’i i te po’ipo’i tā’āto’a. E mea maoro mau, ’aore roa hō’ē a’e mea i taui. ’Ua tupu a’era rā te hō’ē ’ohipa maere.
« ’A hi’o na ! » ’Ua tuō Alex. « Hō’ē vāhi iti ra’i nīnamu ! » ’Ua horo atu tōna ’utuāfare i roto i te ’āua. ’Ua ha’amata te mau ata i te māramarama.
Tau hora i muri mai, ’ua mo’e roa te mau ata ! ’Ua marō ato’a te mau ’āpo’o pape i ni’a i te repo. ’Ua rū haere Alex nō te fa’anehenehe i te ’āua. ’Aita e maoro roa, e tae mai Pāpā ’e te tahi atu mau manihini.
I te taera’a mai Pāpā, ’ua māere roa ’oia. ’Ua hi’o ’oia i te mau mōrī, te mau rīpene ’ū rau ’e te mau manihini tā’āto’a. « E mea nehenehe te mau mea ato’a », ’ua parau ’oia. « Māuruuru maita’i ! »
E mea ’ārearea ato’a te ’ōro’a, mai tā Alex i ti’aturi. ’Ua ’ori rātou i ni’a i te mau hīmene au roa a’e a Pāpā. E mea au roa te mā’a—te faraoa ha’ari monamona iho ā rā. ’Ua nehenehe ato’a ia Alex e hīmene nā muri ia Pāpā.
Te tuha’a maita’i roa a’e rā, ’o te taime ïa nō te Siva Taualuga. E ’ori-noa-hia teie ’ori e te ta’ata faufa’a roa a’e o te reira mahana. ’E, ’oia mau, ’o Pāpā ïa !
’Ua ti’a mai Pāpā nō te ’ori, terā rā ’ua hi’o atu ’oia ia Alex. « Haere mai nā muri iho iā’u e Alex ! » ’Ua pi’i atu Pāpā. ’Ōu’a mai ra Alex ’e ’ua ’ori atu i pīha’i iho ia Pāpā. ’Aita i maoro, ’ori ato’a mai ra te tahi atu mau ta’ata.
’Ua pi’o atu Pāpā i raro nō te tauahi ia Alex. « ’Ua fa’atupu ’oe i te mana’o i roto iā’u ē, e mea ta’a ’ē mau vau i teie mahana », ’ua parau Pāpā. « ’O te ’ōro’a mahana fānaura’a maita’i roa a’e teie ».
I te hopera’a te ’ōro’a, hi’o a’era Alex i ni’a i te ra’i. ’Ua ho’i mai te mau ata pōiri me’ume’u. ’Ua ha’amata fa’ahou te ua i te topa mai i ni’a ia rātou. I teie rā taime, ’aita Alex e ha’ape’ape’a ra. ’Ua ’ite ’oia ē, ’ua tauturu te Metua i te ao ra i te reva ’ia vai maita’i noa nō te roara’a o te ’ōro’a o Pāpā.
« Māuruuru ia ’oe nō te reva maita’i », ’ua pure Alex. « ’E māuruuru nō te hō’ē Pāpā fa’ahiahia mau ».
Faʼahōho’araʼa nā Augusto Zambonato