« Tai’ora’a pāpa’ira’a mo’a i roto i te vare’a ta’oto », Hoa, Tēnuare 2024, 30–31.
Tai’ora’a pāpa’ira’a mo’a i roto i te vare’a ta’oto
Noa atu ā te pōiri noa ra, ’ua ’ite Elvira ē, e mea faufa’a roa te tai’ora’a i te pāpa’ira’a mo’a.
’Ua tupu teie ’ā’amu i Norovētia.
’Ua ara mai Elvira i te reo o pāpā. « Hora tai’ora’a pāpa’ira’a mo’a », ’ua parau ’oia.
’Ua pārahi Elvira i ni’a i te ro’i ’e ’ua orooro i tōna mata ta’oto. Tē pōiri noa ra i rāpae. ’E e mea to’eto’e roa ! ’Aita Elvira i hina’aro e fa’aru’e i tōna ro’i māhanahana.
’Ua parau māmā ē, te tai’ora’a i te pāpa’ira’a mo’a, ’o te rāve’a ïa nō rātou ’ia ’ite maita’i roa a’e ia Iesu. Teie rā, te tai’ora’a i te pāpa’ira’a mo’a i te mau po’ipo’i ato’a e mea fifi roa ïa !
’Ua pa’uma marū noa Elvira i te ’ē’a ’e ’ua pārahi atu i pīha’i iho i tōna tuahine pa’ari, ’o Sigrid, i ni’a i te tōfa. ’Ua tauhani atu ’oia i te tūru’a ’e ’ua mohi atu i roto i te māhanahanara’a o tōna ahu ta’oto huruhuru. Tei roto tōna mau taea’e i te tahi atu piha e ha’amata ra i tā rātou ha’api’ira’a séminaire nā ni’a te natirara.
’Ua ta’i te niuniu a pāpā. ’Ua pāhono atu ’oia, ’e ’ua pura mai i ni’a i te paruai te mau melo o te ’utuāfare. ’Ua fa’anehenehe tati Liv iāna ’e ’ua ineine nō te haere i te ’ohipa. Tei roto noa ā tō rātou tuahine fēti’i ’o Dorthea i tōna ahu ta’otora’a, mai ia Elvira.
’Ua tārape atu Elvira ia rāua nā roto i te niuniu video ’e ’ua ’āia. E tai’o pinepine rātou i te pāpa’ira’a mo’a ’e ’o tati Liv ’e ’o Dorthea. Tē ora nei rāua i roto i te tahi atu tuha’a nō Norovētia e maha hora te ātea. E mea ’ōhie roa nō rātou tāta’itahi ’ia tai’o i te pāpa’ira’a mo’a, ’a ’ōpua ai rātou i te niuniu i te tahi ’e te tahi i te mau mahana ato’a. ’E e mea au roa nā Elvira ’ia ’ite atu i tōna tuahine fēti’i !
Tau minuti i muri mai, ’ua ’āmui ato’a mai ’o māmā i roto i te niuniu. Nā ’ō atu ra, « ’ia ora na, te mau tamāhine ! ». ’Ua rātere na ’oia nō tāna ’ohipa i teie hepetoma, terā rā ’ua ani ato’a ’oia i te taime nō te tai’ora’a i te pāpa’ira’a mo’a a te ’utuāfare.
’Ua pure rātou. I muri iho ’ua ’īriti mai Elvira i tāna mau pāpa’ira’a mo’a. Tē tai’o ’āmui nei rātou i te Buka a Moromona. E tai’o tāta’itahi rātou, te tahi i muri mai i te tahi, i te mau ’īrava.
Tē fa’aro’o nei Elvira ia vetahi ’ē ’ia tai’o, e mea fifi rā ’ia vai ara noa. ’Ua vare’a fa’ahou Sigrid i te ta’oto i ni’a i te tōfa. ’Ua patia atu Elvira iāna. Terā rā, ’ua haru mai tōna ara maita’i i te hō’ē ’ohipa i roto i te ’īrava.
« ’E ’ua ’ite atu ra vau i te hō’ē ’āuri tāpe’ara’a, ’e nā te pae ’ānāvai tōna torora’a, ’e ’ua tae roa mai i te tumu rā’au tei reira vau i te ti’ara’a », tei tai’ohia e Dorthea.*
« ’Ua ’ite au i teie ’ā’amu ! » ’Ua parau Elvira. « ’O te moemoeā ïa o Lehi ». ’Ua māta’ita’i nā ’oia i te hō’ē video nō ni’a i taua tumu parau ra. Tē vai ra te hō’ē tumu rā’au nehenehe ma te mā’a ’uo’uo, ’e tē tāpe’a ra te mau ta’ata i te ’āuri nō te tauturu ia rātou ’ia tae i reira.
« Tē ha’amana’o ra ānei ’oe mai te aha te huru o te ’āuri ? » ’ua ui atu māmā.
« Te mau pāpa’ira’a mo’a ? »
« Parau mau roa ! » ’Ua parau pāpā. « ’Ua ha’api’i Nephi i muri iho ē, e au te ’āuri mai te parau a te Atua. Nāhea i tō ’oe mana’ora’a, e nehenehe ai ia tātou e tāpe’a i te ’āuri mai te mau ta’ata i roto i te moemoeā o Lehi ? »
« Tē tāpe’a nei tātou i te ’āuri i teie taime ! » Mau mai nei ia Elvira i tāna Buka a Moromona. « Ma te fa’ata’ara’a i te taime nō te tai’o i te pāpa’ira’a mo’a ».
’Ua tā’iri’iri māmā i tōna upo’o. « ’Ia tai’o ana’e tātou i te mau pāpa’ira’a mo’a, e ha’afātata atu ā tātou ia Iesu Mesia. Mai te mau ta’ata tei ha’afātata atu i te tumu rā’au nō te ora, ’a tāpe’a ai rātou i te ’āuri ».
’A tāmau noa ai rātou i te tai’o, tē feruri ra Elvira iāna iho e tāpe’a pāpū ra i te ’āuri ’e tē haere ra i te tumu rā’au nehenehe. ’Aita roa atu ra ’oia i vare’a ta’oto fa’ahou.
’Ua fātata roa te taime nō te haere. E ti’a ia tati Liv ’e ’ia māmā e haere i te ’ohipa. ’E ia Elvira, Sigrid ’e Dorthea, e fa’aineine nō te haere i te ha’api’ira’a.
« ’A pārahi ïa ! » ’Ua aroha atu Elvira i tōna ’utuāfare nā te paruai. « ’Ua here au ia ’outou ! »
’A horo ai ’oia i raro nō te fa’aineine iāna nō te ha’api’ira’a, ’ua fāri’i Elvira i te māhanahana i roto iāna. ’Eiaha nō tōna ahu ta’oto huruhuru. ’Ua ’ite ’oia te putapūra’a māhanahana ’o te Vārua Maita’i ïa e parau ra iāna ē, e parau mau te Buka a Moromona. ’O te rāve’a maita’i roa a’e ïa nō te ha’amata i te hō’ē mahana ’āpī !
Fa’ahōho’ara’a nā Hector Borlasca