« Te muhumuhu a te ’ūmara pūtete farai », Hoa, Tēnuare 2024, 14–15.
Te muhumuhu a te ’ūmara pūtete farai
E mana’o pūai tō Maya ’ia hi’opo’a i te mau mā’a i fa’a’ohipahia.
’Ua tupu teie ’ā’amu i te Fenua Marite.
’Ua tāpūpū Maya i te maupere pōpa’a [fraises] ’e ’ua tu’u atu i roto i te ’āu’a mā’a hotu ota. ’O te mā’a hotu tāna mā’a au roa a’e. E mea au nāna te mau ’ū māramarama ato’a. ’E ’aita roa atu ’oia e ha’ape’ape’a nō te ’amu i te reira !
E rave rahi tōmea mā’a tō Maya. E ti’a iāna ’ia ha’apa’o maita’i, nō te mea ’ia hape tāna mā’a, e nehenehe te reira e fa’atupu i te ma’i rahi i ni’a iāna. I tōna na’ina’ira’a, ’ua hape ’oia i te inura’a i te ū puatoro ’e ’ua fifi i te pae hutira’a aho. Tītau-roa-hia iāna e haere i te fare ma’i. ’Aita ’oia e hina’aro ’ia tupu fa’ahou te reira.
I te tahi taime, e mea fifi roa ’ia ’amu i te mau mā’a ta’a ’ē, i tā tōna mau hoa ’e tōna ’utuāfare. ’Ua ’ite rā ’oia ē, e mea faufa’a mau ’ia vai pāruru-noa-hia.
’Ua ’āfa’i atu Maya i te ’āu’a mā’a hotu ota i te ’iri vaira’a. « ’Ua ineine te mā’a hotu ota ».
’Ua hi’o mai ra pāpā, ’a fa’arapu noa ai i roto i te pāni. « Maita’i roa ! ’E’ita e maoro e tae mai tā tātou mau manihini ».
’Ua fa’aro’o atu Maya te pātōtōra’a i te ’ūputa ’e ’ua horo atu e ’īriti i te reira. ’Ua ’ata’ata mai te ’utuāfare Johnson ’e te mau misiōnare iāna i te taupe’e. E mau hoa ’o Johnson mā nō te ’utuāfare. ’Ua ’oa’oa roa Maya ’ia ’ite fa’ahou ia rātou. ’Ua ’īriti rahi ’oia i te ’ōpani ’ia tomo mai te mau ta’ata ato’a i roto.
’A tīa’i noa ai rātou i te taime tāmā’ara’a, ’ua fa’a’ite te hō’ē o te mau misiōnare ia Maya i te hō’ē ’ohipa tahutahu. ’Aita ’oia i māramarama e mea nāhea tōna hutira’a mai i te toata i rāpae i tōna tari’a !
’Aita i maoro, ’ua tae mai te taime nō te tāmā’a. ’Ua pure te taea’e Johnson. I muri iho, ’ua ana’i pauroa rātou nō te fa’a’ī i tā rātou mau merēti.
I te taera’a mai te taime o Maya, ’ua taipu rahi ’oia i te mā’a hotu ota. ’Ua ’ape ’oia i te tahi mau mā’a tāna i ’ite ē, e ū tō roto.
I muri iho, ’ua rave mai ’oia i te hō’ē pūtē ’ūmara pūtete farai rahi ’e ’ua nīni’i i roto i tāna merēti. ’Ia hi’ohia e au ra mai te ’ūmara pūtete farai tāna i amu nā na mua atu. ’Ua tu’u ’oia i te hō’ē i roto i tōna vaha.
Terā rā, ’a ha’amata ai ’oia i te ’amu, ’ua tupu mai te hō’ē mana’o pūai i roto iāna. ’A hi’opo’a i te mau mea e vai ra i roto, tē nā reira ra te hō’ē reo i roto i tōna ferurira’a.
’Ua fa’aea Maya i te ’amu. ’Ua hi’o atu ’oia i ni’a i te pū’ohu i te tāpura o te mau mea e vai ra i roto. E ū tō roto i te mau ’ūmara pūtete farai !
Haru mai nei Maya i te hō’ē tauera ’e ’ua tūtuha vitiviti mai i te ’ūmara pūtete farai. ’Ua ’ī roa tōna nā mata i te roimata. ’Aita ’oia i horomi’i i te reira. E tupu fa’ahou mai ānei te hō’ē ’ohipa ’ino ?
« Māmā ! « Pāpā ! » Horo atu ra Maya i tōna nā metua ra. « ’Ua tu’u vau i te hō’ē ’ūmara pūtere farai e ū tō roto, i roto i tō’u vaha ! »
« ’Aita e fifi », ’ua parau māmā. « E haere ana’e e ti’i i te rā’au ». ’Ua horomi’i Maya i te huero tā māmā i hōro’a iāna ’e ’ua huti hōhonu i te aho. ’Ua tāpe’a noa pāpā ia Maya ’a tīa’i noa ai ’ia ’ohipa te rā’au.
Tau minuti i muri mai, nā ’ō mai ra māmā, « e aha tō ’oe huru ? »
E mata’u noa Maya. ’Aita rā te hō’ē mea fifi i tupu i tōna tino. « Tē mana’o nei au, e mea maita’i au. E nehenehe rā ānei au e fāri’i i te hō’ē ha’amaita’ira’a ? »
« ’Oia mau », ’ua parau pāpā. « E ani ana’e i te mau misiōnare ’ia tauturu mai ».
’Ua pārahi atu Maya i ni’a i te hō’ē pārahira’a, ’e ’ua tu’u pāpā ’e te mau misiōnare i tō rātou rima i ni’a i tōna upo’o. ’Ua ha’amaita’i rātou iāna ’ia vai pāruruhia. ’Ua tae mai te hau i roto ia Maya. ’Ua mo’e pauroa tōna mau mana’o ’ino.
« Nāhea ’oe i te ’itera’a e haere e hi’o i te mau mea i roto, i ni’a i te pūtē ? » Ui a’e ra māmā.
« ’Ua fāri’i au i te hō’ē fa’aarara’a a te Vārua Maita’i ! »
’Ua tauahi maita’i a’era ’o pāpā iāna. « Tē ’oa’oa nei au i te mea ē, ’ua fa’aro’o ’oe ».
’Ua tā’iri’iri ’o Maya i te upo’o. ’Ua ’ite ’oia ē, ’ua here te Metua i te ao ra iāna ’e tē ha’ape’ape’a nei nōna.
Fa’ahōho’ara’a nā Chrisanne Serafin