E nehenehe ’outou e fa’atupu i te ta’a-’ē-ra’a

Nā te peresideni Susan H. Porter

Peresideni rahi nō te Paraimere

Hōho’a

Susan H. Porter

Mai roto mai i te hō’ē uiuira’a ’e ’o Olivia Kitterman ’e Rachel Peterson.

’Ua here te Metua i te ao ra ’e ’o Iesu Mesia ia ’outou. Nō to rāua here ia ’outou, ’ua ani manihini rāua ia ’outou ’ia rave i te mau fafaura’a, ’aore rā, i te mau parau fafau ’e rāua. E ha’amata ’outou i te rave i te reira mau fafaura’a ’ia bāpetizo-ana’e-hia ’outou.

I muri mai tō ’outou bāpetizora’a, e fāri’i ’outou i te hōro’a o te Vārua Maita’i. E riro ’outou ’ei melo nō Te ’Ēkālēsia a Iesu Mesia i te Feiā Mo’a i te mau Mahana Hope’a nei. Te aura’a tē ti’aturi nei te Metua i te ao ra ia ’outou nō te ha’apa’o i tā ’outou mau fafaura’a.

E aha tā ’outou e nehenehe e rave ’ei melo tāmau nō te ’Ēkālēsia nō te ha’apa’o i tā ’outou mau fafaura’a ? E nehenehe ’outou e fāri’i pōpou ia vetahi ’ē i te Paraimere. E nehenehe ’outou e pārahi i pīha’i iho i te hō’ē tamari’i ’āpī ’e e tauturu ia rātou ’ia ha’api’i i te mau hīmene. E nehenehe ’outou e tauturu i roto i te mau ’ātivite a te Paraimere. E nehenehe ato’a ’outou e riro ’ei arata’i i roto i tō ’outou ’utuāfare. E nehenehe ’outou e ani e rave i te pure fēti’i ’aore rā ’ia fa’a’ite i te mea tā ’outou i ha’api’i mai i te Paraimere.

I muri a’e i tō ’outou fāri’ira’a i te Vārua Maita’i, e nehenehe ’outou e ’ite i te mau hina’aro o vetahi ’ē nā roto i te hō’ē rāve’a ’āpī. E nehenehe ’outou e pure i te Metua i te ao ra ma te parau ē, « ’a tauturu mai iā’u ’ia ’ite ’o vai tā’u e nehenehe e tauturu i teie mahana ». I muri iho e nehenehe te Vārua Maita’i e tauturu ia ’outou ’ia fārerei i te tahi ta’ata e pārahi ra ’o ’oia ana’e ’aore rā, e parau atu ’ia ora na i te tahi hoa. E rave ’outou i te hō’ē ta’a-’ē-ra’a rahi ’ia mā’iti ana’e ’outou i te tauturu ia vetahi ’ē. Tē ’ohipa nei ’outou ’ei melo nō te ’Ēkālēsia a te Metua i te ao ra !

Tē here nei te Metua i te ao ra ia ’outou. Tē hina’aro nei ’oia e arata’i ia ’outou ma tō ’outou hi’ora’a maita’i, nā te mau vāhi ato’a tā ’outou e haere nei, ’ia nehenehe ia ’outou ’ia ha’afātata mai ia vetahi ’ē iāna ra. ’Aita rā ’outou e tītauhia ’ia rave i te reira ’o ’outou ana’e. E’ita roa atu te Metua i te ao ra ’e ’o Iesu Mesia e fa’aea i te tauturu ia ’outou. E nehenehe ’outou e ti’aturi, nō te mea ’ua ’ite ’outou tei pīha’i iho rāua ia ’outou. E nehenehe ’outou e feruri ē, tē ti’a tāmau nei Iesu i pīha’i iho ia ’outou.