E ’āparaura’a ’e ’o Eilish nō ni’a i te Vārua Maita’i

E tamāhine 12 matahiti ’o Eilish, nō te tuha’a fenua hiti’a o te rā nō Tinetāpora. ’Ua ui mātou iāna e mea nāhea te Vārua Maita’i i te tauturura’a iāna.

’A parau mai ia mātou nō ni’a ia ’oe.

Mea au roa nā’u e tai’o ’e e ha’uti i te pā’ira’a pōpō, ’e tā’u tumu parau au roa i te fare ha’api’ira’a ’o te nūmera ïa. Tā’u mā’a au roa ’o te ratania ïa, ’e tā’u ’ū ’o te ’ute’ute ïa. ’Ia pa’ari ana’e au, tē ti’aturi nei ’ia riro ’ei pāruru ’e ’ia ’ohipa i roto i te tiripuna.

Ia ’oe, mai te aha te huru te putapūra’a i te Vārua Maita’i ?

Nō’u nei, e au te putapūra’a i te Vārua Maita’i mai te hō’ē ïa hoa fātata roa iā’u. E au ra iā’u ē, ’o ’oia te hō’ē ta’ata ’o tā’u e nehenehe e ti’aturi, ’ia ha’apa’o ana’e au i te mau fa’auera’a ’e i tā’u mau fafaura’a ’e te Metua i te ao ra. Tē fa’ariro nei au iāna mai tō’u arata’i ’e tō’u hoa. E nehenehe ’oia e tauturu iā’u ’ia rave i te mau mā’itira’a maita’i.

E aha te a’o tā ’oe e hōro’a i te hō’ē ta’ata tei ’ore i pāpū ’ua putapū ānei ’oia i te Vārua Maita’i ?

I te tahi taime, ’aita ato’a vau i ’ite ē, tē putapū ra ānei au i te Vārua Maita’i. Terā rā mai te mea e feruri mau ’outou i te reira, ’a tai’o i te mau pāpa’ira’a mo’a ’e ’a pure, ’e ’ia putapū mau ’outou, ’o te Vārua Maita’i ïa teie. I te tahi taime, e ’ere te fa’aro’ora’a i te Vārua Maita’i i te hō’ē noa putapūra’a. E nehenehe ato’a e riro ’ei mana’o ’aore rā, ’ei ferurira’a. Mai te mea tē ta’a ’ore noa ra ’outou, e nehenehe noa ’outou e pure ’e e ani fa’ahou i te Fatu ’ia tauturu mai ia ’outou.

I tei hea taime tō ’oe putapūra’a i te Vārua Maita’i ?

I te matahiti i ma’iri a’e nei, ’ua ha’uti atu vau i roto i te hō’ē tāta’ura’a pā’ira’a pōpō. Mai te rahira’a o tō’u mau hoa pūpū, ’ua taiā ri’i au. I tō’u ha’amatara’a i te ha’uti, ’ua pau a’ena tā mātou pupu i nā to’opiti ha’utira’a mātāmua. ’Ua tarapape roa mātou. I muri iho, ’ua parau mai te feiā mata’ita’i i te ha’uti i te mau parau ’ī’ino, ’e ’ua māuiui rahi roa atu ā mātou. ’Ua pau mātou.

I te anira’a mai tō’u māmā iā’u e aha te huru, ’ua ha’amata vau i te ta’i. ’Ua ’ino’ino roa vau. ’Ua haere atu vau i roto i tō’u piha, i reira te vāhi maita’i ’e te hau, ’e ’ua fa’ahiti atu vau i te hō’ē pure. I muri mai tā’u pure, ’ua marū ri’i mai au ’e ’ua hau roa tō’u ā’au. ’Ua ’ite au ē ’ua tāmāhanahana te Vārua Maita’i iā’u ’e e tauturu noa mai ’oia iā’u. Ma te tahi atu tāta’ura’a i teie matahiti e haere mai nei, ’ua ’ite au tei reira ’oia ’a ha’uti ai au.

E aha atu ā tā te Vārua Maita’i i tauturu ia ’oe ?

’Ua tauturu ato’a mai te Vārua Maita’i iā’u ’ia nu’u atu mai te Paraimere i te Feiā ’Āpī Tamāhine. ’Ua ’oa’oa roa vau i te fa’anu’ura’a i te Feiā ’Āpī Tamāhine. Terā rā, ’ua taiā ri’i ato’a ra vau. ’Ua ’oto ato’a vau i te fa’aru’era’a i te Paraimere.

Hou tā’u ha’api’ira’a mātāmua, ’ua pure au ’e ’ua ani au i te Metua i te ao ra ’ia tauturu mai iā’u ’ia ’oa’oa vau i te Feiā ’Āpī Tamāhine. ’Ua fāri’i au te hau i roto i tō’u ’ā’au ’a tomo ai au i roto i tā’u piha ha’api’ira’a ’āpī. ’Ua ineine au nō te ha’api’i mai. ’Ua tauturu te reira iā’u ’ia ha’amana’o ē, tei reira noa te Vārua Maita’i nō’u !

Fa’ahōho’ara’a nā Annabel Tempest