“Faafitauli o le Malaga i le Auala,” Uo, Aperila 2024, 4–5.
Faafitaulio le Malaga i le Auala
“Tatou toe tatalo,” na fai atu ai Ema.
O lenei tala na tupu i Siamani.
Sa tuu e Ema le ato moega mulimuli i totonu o le veni mo tolauapiga. O le a tietie atu lona aiga i Italia mo aso malolo i se faaiuga o se vaiaso. Sa matuai fiafia lava i latou uma!
Sa nofo o ia i lona nofoa ma se palanikeke ma ni meaai mama. O lona tuagane, o Max, sa nofo i ona autafa.
“Ua sauni tagata uma?” O le fesili lea a Tamā.
“Ioe!” Na fai atu ai Ema ma Max.
Sa latou pasia ni fale ma laau. Sa pisi tele auala. I le mavae ai o ni nai itula, sa matuai tumu lava ma na tutu uma taavale.
Sa tilotilo atu Ema i fafo o le faamalama i tagata i totonu o taavale i o latou autafa. O nisi na foliga ivā. O isi sa foliga le fiafia.
O se tamaloa sa i tua atu o i latou na oso i fafo mai lana taavale. Sa savali mai o ia ma tu’itu’i i le faamalama a Tama.
Sa vili i lalo e Tama lona faamalama. “Malo. E mafai ona ou fesoasoani ia te oe?”
Sa tusi atu le tamaloa i le latou veni. “O se tasi o au pa’u ua pa.”
“Auoi leai!” Na fai atu ai Tama. Sa oso o ia i fafo e vaai ma talanoa i le tamaloa.
Sa toe sau Tama i totonu o le veni. “E lua a tatou filifiliga. E mafai ona tatou malolo i le vaega e malolo ai o loo sosoo. Pe e mafai foi ona tatou tietie atu ma le faaeteete i le nofoaga sili ona latalata mai mo tolauapiga. Tatou tatalo e uiga i ai.”
Sa fai e Tina le tatalo. Sa ia ole atu i le Tama Faalelagi e fesoasoani ia latou iloa le mea e tatau ona latou faia.
Na fifilemu uma i latou. Sa faalogologo ma le toto’a Ema ina ia lagona le Agaga Paia. “Ou te manatu e tatau ona tatou tietie atu i le nofoaga o le tolauapiga,” o lana tala lea.
“Ma au foi,” o le tala lea a Tama.
Ina ua latou taunuu atu iina, sa valaau atu Tina ma Tama i se tasi mo se fesoasoani. I ni nai itula mulimuli ane, sa sau ai se tagata faigaluega e tilotilo i le pa’u.
“O le a faigata ona maua se pa’u e fetaui ai,” o lana tala lea. “O le a matou okaina se pa’u fou, ae o faleoloa uma ua tapunia mo le aso malolo. E le mafai ona maua le pa’u seia oo i le Aso Lua.”
Sa faauu Ema. O le Aso Lua sa mamao atu—ae faapefea pe afai e tuai mai le pa’u? Sa fiafia o ia e alu i Italia. Ae o lenei atonu o le a latou le oo iina!
“Tatou toe tatalo,” na fai atu ai Ema.
“Manaia le manatu,” o le tala lea a Tina. “Tau lava o le manatua e tusa lava pe le faamanuiaina i tatou i se pa’u, e faafofoga lava le Tama Faalelagi i a tatou tatalo. E mafai lava ona tatou maua se malaga manaia.”
Sa luelue le ulu o Ema. “Tama Faalelagi pele,” sa ia tatalo ai, “faafetai i Lau Afio mo le faatumauina o lo matou saogalemu i la matou malaga. Afai e mafai, faamolemole fesoasoani mai ia i matou e sue se pa’u sa’o mo la matou taavale mo tolauapiga.
O le taeao na sosoo ai, na toe foi mai ai le tagata faigaluega. Sa ia faataavale atu se pa’u lapoa agai ia i latou.
“E foliga mai o le a tatou oo atu lava i Italia!” Na fai atu ai Tama. Sa alalaga fiafia Ema ma Max.
“Na faapefea ona vave ona e mauaina se pa’u fou?” Sa fesili atu ai Max i le tagata faigaluega.
“Sa ou fesili atu i nisi tagata iinei pe i ai se latou pa’u o loo i ai e fetaui,” o le tala lea a le tagata faigaluega. “Ma sa i ai!”
Sa faapipii e le tagata faigaluega le pa’u fou. Sa latou sauni e malaga! Sa faia e Ema se tatalo le leoa o le faafetai. O la latou malaga faaleaiga e lei sologa lelei e pei na latou fuafuaina, ae sa faafofoga le Tama Faalelagi i a latou tatalo.
Ata na tusia e Greg Paprocki