“Susulu Atu,” Uo, Aperila 2024, 18–19.
Susulu Atu
Sa manao Lynn e fai le mea o le a faia e le Faaola.
O lenei tala na tupu i Zimbabwe.
Sa susulu le la, ma sa tamoe atu Lynn i fafo e taalo. O isi tamaiti o le nuu sa taaalo i le kikiina o le polo. Sa latou faia la latou lava polo e ala i le nunumiina faatasi o fasipepa ma afifi mau i ni pepa iila.
Sa faanatinati atu Lynn e faatasi ma i latou. Ae e i ai se mea na mafua ai ona tu o ia.
Sa nofonofo i lalo o se laau lata ane se teineitiiti e igoa ia Awesome. O nisi o tamaiti sa faasinosinolima atu ia te ia ma taliē. Ae sa le’i ata Awesome. Nai lo lena, sa pupuni ona foliga i ona lima. Sa tafe ifo loimata lapopoa i ona alafau.
E lei umi ae auai atu isi i le taaloga kikipolo ma tuua ai na o Awesome.
Sa tilotilo atu Lynn i tamaiti o loo fiafia. Ona ia tilotilo atu lea ia Awesome. Sa manao o ia e fai le mea o le a faia e Iesu Keriso.
“O seki oe?” Sa fesili atu ai Lynn. Sa ataata atu o ia ia Awesome.
Sa solo e Awesome ona loimata ma lue atu lona ulu.
Sa piki i luga e Lynn ni fasilaau laiti se lua ma tuu atu le tasi ia Awesome. “E te fia tusi ata ma a’u?”
“Ioe.” Sa ave e Awesome le fasilaau ma tusi se li’o i le palapala.
“E foliga mai o se la,” o le tala lea a Lynn. “O le la e faafiafiaina au i taimi uma.” Sa taliē teineiti a o la tusia nisi ata. Sa fiafia Lynn ia Awesome.
Ona maua lea e Lynn se manatu. “E te fia sau i le lotu ma a’u taeao? O le a ta usuina pese ma aoao e uiga ia Iesu Keriso. E ese le manaia.”
“Ua lelei,” o le tala lea a Awesome. “Sei ou fai i lo’u tina.”
A o tamoe atu Awesome e su’e lona tina, sa lagona e Lynn sina popole laitiiti. Sa ia iloaina o nisi o tagata i lo latou eria sa i ai ni lagona le lelei e uiga i le Ekalesia.
Ae na vave lava ona toe tamoe mai Awesome. “Fai mai lo’u tina ua lelei!” Sa ia opoina Lynn i se opo lapoa. “Sa ou fai atu ia te ia o oe o la’u uo mamae lava!”
O le taeao na sosoo ai na o atu ai Lynn ma Awesome i le lotu. O se savaliga umi. Sa aoao atu e Lynn ni pese Peraimeri ia Awesome a o la savavali.
I le ala, sa la vaaia ai isi tamaiti o savavali ma o latou aiga i le lotu. O nisi o i latou ia sa agaleaga ia Awesome.
“E o mai foi i latou i le lotu?” na fesili atu ai Awesome ma le popole.
“Aua e te popole,” na fai atu ai Lynn. “O le a lelei mea uma.” Sa fai e Lynn se tatalo itiiti i lona loto ina ia agalelei isi i lana uo fou.
Ina ua la savavali atu i le Peraimeri, sa ataata atu isi tamaiti ia Lynn. Ae ina ua latou vaai ia Awesome, sa mou ese nisi o a latou ataata. Sa foliga mai sa fai si o latou popole ma lē mautonu foi.
Sa faitau e Sister Moyo se mau. “Ia faapea ona pupula atu lo outou malamalama i luma o tagata, ina ia latou iloa la outou amio lelei, latou te vivii atu ai i lo outou Tama o i le lagi.”* Sa ea a’e o ia i luga. “E mafai ona tatou faasoa atu lo tatou malamalama e ala i le faaali atu o le alofa i isi. E mafai e se tasi ona faasoa mai pe na faapefea ona e fesoasoani i se tasi ia lagona le alofaina?”
Sa leai se tasi na tautala. O nisi o tamaiti na minoi solo o latou vae i lalo o o latou nofoa.
Mulimuli ane, sa fai mai se tasi o tama, “Oi, Awesome, matou te le’i agalelei tele ia te oe. Matou te faamalie atu na matou faatagia oe. E mafai ona e faamagalo i matou?”
Sa tilotilo atu Lynn ia Awesome. O le a se tala o le a ia fai atu?
Sa luelue lemu le ulu a Awesome. “Ioe,” o lana tala lea. Ou te faamagalo ia te oe.”
Na ataata Sister Moyo. “E ese le lua totoa ma agalelei. Ou te iloa ua lua faafiafiaina tele le Faaola.”
O le aso na sosoo ai, sa saofafai ai Lynn ma Awesome i lalo o le laau ma usuina pese sa la aoaoina i le Peraimeri. E lei umi ae faalogo isi tamaiti o la pepese ma auai faatasi ma i la’ua. Sa faatumulia e musika le ea ao latou pepese.
Sa lagona e Lynn e pei ua susulu le la i lona loto. Sa faafetai o ia ona sa ia faasoa atu le alofa o Iesu Keriso i lana uo.
Ata na tusia e Katie Rewse