“Ua Saunia le Malutaeao,” Friend, Aperila 2024, 38–39.
Ua Saunia le Malutaeao
O le tele o le faataitaiina e Tavita o le kuka, o le tele foi lena o lona lagona mautinoa.
O lenei tala sa tupu i le ISA.
O le manogi o le sosi supokeli na gogolo ai le manava o Tavita. “O le a le taimi e saunia ai le meaai o le afiafi?”
“Toe lava o ni nai minute,” o le tala lea a Papa, a o saeu le sosi. Sa tilotilo atu o ia ia Tavita. “O le a le mea o loo e galue i ai?”
Sa uu i luga e Tavita lana Tusitaiala a Tamaiti. “O loo ou taumafai e filifili se sini fou. Ae ou te le o mautinoa po o le fea e fai. E lelei uma lava.”
“O a nisi o filifiliga o i ai?”
Sa susue faasolosolo e Tavita le tusitaiala. “Usu se pese Peraimeri, auauna atu i ou tuaoi, faafeiloai atu i isi . . . .” Ona ia vaaia lea o le isi mea. “Oi! Papa, e mafai ona e fesoasoani mai ia te au e aoao pe faapefea ona kuka?”
“Ioe,” sa fai atu ai Papa. “O le a ou faia la’u malutaeao faapitoa o le Aso Sa a taeao. E mafai ona e ala vave i luga ma fesoasoani mai ia te au?”
“Ua lelei!” Na fai atu ai Tavita.
O le taeao na sosoo ai, na alapo ai Tavita ma feiloai ma Papa i le umukuka. A o aumaia i fafo e Papá mea e manaomia, sa fufulu e Tavita ona lima.
Sa faaali e Papa ia Tavita le auala e uu ai se naifi ma tipitipi ma le saogalemu fualaau aina suamalie. Sa ia tuu atu ia Tavita e palu faatasi mea uma e manaomia mo le panikeke. Ona oo mai lea o le taimi sili ona manaia. Fasipuaa faaasu [bacon]!
Sa faaaoga e Tavita ia iofi e liuliu ai fasipuaa faaasu i le falai. Sa ii mai le ga’o o le fasipuaa faaasu, ma sa pisipisi le ga’o i ona tamatamailima. “Auoia!” Na fai atu ai Tavita.
“Faaeteete,” o le tala lea a Papa. Sa ia kiina le paipa ma fai ia Tavita e tuu lona lima i lalo o le vai malulu mo se minute. Ona ia tuuina atu lea ia Tavita o se totinilima e faaoga i le oveni e puipui ai ona lima mai le vevela o le ga’o.
“O le kuka e fai si faigata,” o le tala lea a Tavita.
“Ioe,” o le tala lea a Papa. “O le aoaoina o ni mea fou o se galuega faigata. O le mafuaaga lena e tatau ai ona e aoao i metotia sa’o.”
“Ma faataitai soo,” na fai atu ai Tavita. “Sa ou aoaoina i le Peraimeri e oo lava ia Iesu e lei iloa mea uma i le taimi muamua.”
Na luelue le ulu o Tamā. “E oo lava ia te Ia na tatau ona aoaoina mea laiti i lea taimi ma lea taimi.”
Sa uma ona la kukaina le fasipuaa faaasu ma tuu uma meaai i luga o le laulau. Sa fiafia i ai le aiga atoa.
O le latou pusi, o Nacho, sa miau i lalo o le laulau.
“Ou te manatu e manao foi Nacho i se [meaai]!” O le tala lea a le tuafafine o Tavita o Sara.
Sa fesoasoani tele Tavita ia Papa i le umukuka ina ua mavae lena mea. Sa faaali e Papa ia te ia le tele o fua o kuka i le latou tusi o kuka. Sa aoao e Tavita le auala e fua ai mea e manaomia mo kuki, le auala e palu ai fuamoa, ma le auala e fai ai lana vaiinu e sili ona fiafia i ai, o le horchata. O le tele o lona aoao e kuka, o le tele foi lena o lona lagona mautinoa.
Ona oo lea i se tasi taeao o le Aso Sa, na iu lava ina lagona e Tavita ua saunia. “Papa, e mafai ona ou faia na o a’u le malutaeao i le asō?” Na fesili atu ai Tavita a o faatasi atu ia Papa i le umukuka.
“Ua lelei,” na fai mai ai Papa. “O le a ou i ai ii pe a e manaomia se fesoasoani.”
Sa aumai i fafo e Tavita mea sa ia manaomia ma amata ona galue. Sa ia tipiina ia strawberries ma fa’i i le ala na faaali atu ai e Papa ia te ia. Sa ia liuliuina ma le faaeteete panikeke e aunoa ma se tasi na mu.
Ma ina ua ia kukaina fasipuaa faaasu, sa ia iloatonu lava le mea e fai. Sa ia faia se totini ma se ufiufi e faaaoga i le oveni e taofi ai le pisipisi o le ga’o ia te ia.
Ina ua uma, sa tuu e Tavita meaai uma i luga o le laulau. Sa saofafai i lalo le isi vaega atoa o le aiga. Sa faia e lona tuafafine laitiiti o Emily se tatalo, ma sa amata ona latou aai.
“Oka se manaia,” o le tala lea a lona uso, o Jeremie. “Faafetai, Papa.”
“O le mea moni,” na fai atu ai Papa, “sa faia e Tavita na o ia lava.”
“E mo’i?” Sa fai atu ai Jeremie. Sa ia tilotilo atu ia Tavita. “Ua matuai lelei lava [lau kuka]!”
Sa ataata Tavita. Sa tele ni faataitaiga na alu ai, ae sa manaia le lagona o le faia o se meaai o le taeao mo lona aiga. Sa le mafai ona faatali o ia e taumafai nisi fua o kuka.
Ata na tusia e Liz Brizzi