“O Le Fesili o le Tatalo,” Uo, Aperila 2024, 36–37.
O Le Fesili o le Tatalo
Pe sa faafofoga moni ea le Atua ina ua tatalo Xóchitl?
O lenei tala sa tupu i le ISA.
Sa taoto Xóchitl i lona moega fatalua, ma tilotilo atu i le moega i luga a’e o ia. Faatoa uma ona fai le tatalo faaleaiga a lona aiga, ma ua oo i le taimi e momoe ai. Na te lei faia lana ia lava tatalo ae lei moe.
Aisea e manaomia ai ona tatou tatalo? sa ia tomanatu ai. E masani lava ona fai e lona aiga tala lava e tasi, e pei o le faafetai i le Atua ma ole atu ia te Ia mo ni miti lelei. Pe na tali moni mai ea a latou tatalo? O nisi taimi sa i ai pea ni ana miti leaga.
O le a le mea e tupu pe afai e le toe tatalo o ia? I le sauni ai e faataitai lona manatu fou, sa ia faliu ai i autafa ma moe loa.
Mo nai aso na sosoo ai, sa lei tatalo Xóchitl. Ona liua lea o aso i ni vaiaso. E leai se mea tele na suia. Na te lei lagonaina se eseesega tele.
Sa ia faamaeaina le tausaga atoa na totoe o le aoga, ma e lei umi ae oo i le taumafanafana. Sa fiafia Xóchitl e alu i lesona aau ma taaalo ma ana taifau. Sa mafai ona ia vaai i ona tausoga i se faatasiga tele faaleaiga.
O po uma lava, e faatasi atu ai o ia i lona aiga mo faigalotu. Ae sa lei tatalo lava o ia na o ia.
E lei umi ae uma le taumafanafana, ma sa amata ona sauni Xóchitl mo le aoga. Ae sa le’i fiafia lava o ia. I ni nai aso a o lei amataina le aoga, sa ia feiloai ai i lona faiaoga fou, maua lana loka, ma maua ai se atofaafafa fou. Soo se taimi lava e mafaufau ai o ia e uiga i le alu i le aoga, sa ia lagonaina le ma’i. O aso uma sa atili le lelei ona lagona.
I se tasi po sa ala ai o ia i lona moega, ma mafaufau e uiga i le aoga. Ou te le fia alu. E taufaafefe, sa ia mafaufau ai. Ona ia manatua lea o mea na aoaoina ai o ia e ona matua e uiga i le tatalo. Sa la fai mai e mafai ona ia tatalo i soo se mea ma e mafai ona ia tatalo mo se fesoasoani ma se faamafanafanaga.
Sa tootuli ifo Xóchitl i talaane o lona moega ma manava loloa. Mo le taimi muamua i ni masina, sa ia faia ai lana lava tatalo. Sa tatalo o ia i le Tama Faalelagi. Sa ia faafetai atu ia te Ia ma ole atu ia te Ia mo ni miti lelei e pei lava ona sa latou faia i tatalo faaleaiga. Ina ua uma, na te lei lagonaina se eseesega tele i totonu.
O le po na sosoo ai, sa ia toe taumafai ai. Ma toe fai. Sa ia ole atu i le Tama Faalelagi e faamanuia le perofeta ma lona aiga. E lei umi ae ia tau atu ia te Ia ona lagona ma le mea sa ia faamoemoe i ai i lana aoga fou.
“Tama Faalelagi,” sa ia fai mai ai i se tasi po, “Ua ou fefe lava i le aoga. E le mafai ona ou moe. E mafai ona e fesoasoani mai ia te au ia ou le toe lagonaina le fefe?” Sa ia lagonaina se lagona malosi o le filemu na siomia ai o ia, e toetoe lava a pei o se palanikeke mafanafana. Sa ia iloaina vave, o le Agaga Paia.
O le mafuaaga la lea tatou te tatalo ai, sa ia mafaufau ai. Ina ia lagonaina le alofa o le Tama Faalelagi. O se lagona ofoofogia. Mo na masina uma na te lei tatalo ai, sa ia misia lenei lagona.
Sa ataata Xóchitl. Sa popole pea o ia e amata i le aoga, ae sa ia lagonaina le malosi atu i le iloaina e mafai ona faamafanafanaina o ia e le Atua. E mafai moni lava e mafai ona ia tatalo mo le faamafanafanaga i soo se taimi, i soo se mea, aua sa faafofoga moni mai lava le Atua.
Ata na tusia e Kevin Fales