“O se Mausa Lelei Atu,” Uo, Aperila 2024, 10–11.
O se Mausa Lelei Atu
I le Peraimeri, sa ou aoaoina ai o le suafa o le Alii e taua tele.
O lenei tala sa tupu i le ISA.
Na amata i faatafafa e fa.
O le faatafafa e fa o se taaloga sa taaalo ai nisi tamaiti i fafo o le aoga i le taimi o le malologa. E toafa tagata taaalo sa tutu i se sikuea ma faafiti se polo i le tasi ma le isi. A misi le polo ia i latou, e tatau ona latou o ese mai le taaloga.
Sa ou popole i le taimi muamua na ou taalo ai. Ae sa ou lelei i le faiga. Sa manaia tele!
Ona misi lea e le teineitiiti mai le isi o’u itu le polo. Sa ia ta’ua le suafa o le Tama Faalelagi ma ata. “Malo Gwen,” o lana tala lea. “Ou te matea ua ou pe!”
Sa ou uuina mau le polo. Faatoa uma lava ona ia ta’u fua le suafa o le Alii! E tutusa lava ma le palauvale.
Ae sa leai se isi na foliga mai na manatu e leaga. Sa latou talie uma, e pei e malie pe manaia.
Sa matou faaauau pea ona taaalo. Ona toe tupu foi lea. Sa misi e se tasi le polo ma ta’u le suafa o le Tama Faalelagi e pei o se upu palauvale.
I ni nai minute mulimuli ane, sa misi foi ia te au le polo. Ma e pei lava o isi, sa ou ta’u fua le suafa o le Alii. Sa talie tamaiti ma faapa matou lima a o ou toe foi i le laina e faatali e toe taalo ai.
Ina ua uma lena, sa ou taalo i le faatafafa e fa i aso uma … ma sa ou ta’ua pea lava pea le suafa o le Alii.
I se tasi aso na auai ai la’u uo o Abby i le taaloga. Sa ia pasi mai le polo ia te a’u. Sa ou misia ma ta’u le suafa o le Tama Faalelagi.
Na emo mata o Angie i le te’i. “E le masani ona e talanoa faapena.”
Na sa’o lava o ia. I le fale ma i le Peraimeri, sa ou aoaoina ai o le suafa o le Alii sa faapitoa ma e le tatau ona tatou faaaogaina e palauvale ai pe tausua ai. Ma o le mea lena sa ou faia—mo ni vaiaso! Sa ou lagona le ma’i.
Ina ua tuua le aoga, sa ou maua Tina i lona ofisa.
“Talofa, la’u pele” sa ia fai mai ai.
Sa amata ona ou tagi. Sa ou faamatala atu ia te ia e uiga i le faatafafa e fa ma le ta’u fua o le suafa o le Alii. “Ou te le iloa pe mafai ona ou taofia,” sa ou fai atu ai ma le masusῡ.
Na ia fusimauina au. “Atonu e te lagona faapena i le taimi nei. Ae ou te iloa e mafai ona fesoasoani mai le Tama Faalelagi ia te oe.”
“E faapefea?” Sa ou fesili atu ai.
“O le salamo o lona uiga o le toe liliu atu i le Tama Faalelagi ma taumafai malosi e fai ia lelei atili,” o le tala lea a Tina. “O le a le faigofie, ae e mafai ona e tatalo mo se fesoasoani. A o e faaaogaina upu e lelei atu, o le a mou atu lau mausa tuai.”
Sa fesoasoani Tina ia te au e fai se lisi o upu fou e mafai ona ou fai atu ai nai lo le suafa o le Alii. Ona ma tatalo faatasi lea. Sa ou ta’u atu i le Tama Faalelagi lo’u salamp ma ole atu mo se fesoasoani e faaaoga ai gagana lelei.
O le aso na sosoo ai sa ou manava tele i totonu ae ou te lei taalo i le faatafafa e fa. Ina ua ou misia le polo, sa toeitiiti lava a ou toe fai atu le suafa o le Tama Faalelagi, ae sa ou taofi. Nai lo lena, sa ou fai atu se upu mai la’u lisi.
“Oi, fa’i pula!”. Na ou fai atu ai. Na manaia lena lagona!
O aso taitasi sa ou taumafai malosi ai e faaaoga se gagana e lelei atu. Sa ou sasi pea i nisi taimi. Ae sa ou tatalo ma taumafai pea. E lei umi ae ou taalo i le taaloga atoa e aunoa ma le ta’ua o le suafa o le Alii. Ona atoa lea o le vaiaso. Ona atoa lea o se masina!
Sa ou iloa na fesoasoani mai le Tama Faalelagi ma Iesu Keriso ia te au e salamo ma suia lau mausa—ma sa lelei atu lena lagona nai lo le manumalo i soo se taaloga!
Ata na tusia e Kiersten Eagan