O Fagu o le Alofa

Isabela Q., 10 tausaga, Buenos Aires Province, Atenitina

Sa ou fesoasoani i se galuega faatino i le aoga e fai ni “fagu o le alofa,” o ni fagu uga e tutumu i uga e taitasi ona faaaoga. O aitema nei e faaaoga i le taimi e tasi ma lafoai ese, e pei o taga pepa iila. Sa faia e aiga taitasi ni fagu o le alofa ma ave i le aoga. Na auina atu fagu i se faalapotopotoga e fausia ai ni piliki uga. E mafai ona faaaoga piliki e fausia ai nofoa uumi i fafo ma fale mo tagata e le tagolima.

Sa ou iloaina e faaaoga e lo’u aiga le tele o uga i aso taitasi, o se faafitauli moni lea i le siosiomaga. Sa ou manao e amata ona ou tausia le siosiomaga. Ae e le mafai ona ou faia na o a’u. O lea sa ou filifili ai e talosaga atu i tagata i le lotu e fesoasoani foi. Sa matou talanoa ma o’u taitai ma le epikopo o le uarota. Sa ia fai mai ia te a’u e talanoa e uiga i le galuega faatino i se fonotaga. E toatele tagata na auai i le galuega faatino. Ina ua mavae ni nai masina, sa matou aoina mai le silia ma le 100 fagu o le alofa!

O loo faaauau pea le galuega faatino i le asō. Pe a ou aoina mai le tele o fagu, matou te o ma lo’u aiga ma uo Peraimeri i le eria e tuu ai. Matou te tuua fagu iina e faaliliu ai i ni mea faufale.

Ou te fiafia i le galuega faatino lenei. Ou te lagona ai e mafai ona ou fesoasoani moni i lenei lalolagi na foafoaina e le Atua mo i tatou. E fesoasoani ia te au e faataua ma faaaloalogia le natura ma manu. O le tausia lelei o le natura o se tasi lea o auala e mafai ona ou mulimuli ai i le Faaola. Ou te fiafia foi o se auala lea e fesoasoani ai i isi.

O nisi taimi e le faigofie le faaalu o le taimi e faia ai fagu o le alofa. Ae ou te lagona e mafai ona tatou suia ma filifili e faia ni faatinoga laiti ma lelei i aso taitasi. Sa ou aoaoina foi o le faia o se mea “telē” tatou te manaomia ai le fesoasoani a isi. E mafai ona tatou faa-aafia ai isi ma fesoasoani ia i latou ia auai i le suiga. Ou te talitonu o se vaega taua lenei o le talalelei a Iesu Keriso: ia suia, fesoasoani i isi, ma faia mea lelei i le lalolagi.