“Louie, Nifae, ma le Piano,” Uo, Aperila 2024, 30–31.
Louie, Nifae, ma le Piano
PLUNK! O le vaega lenei o le pese sa faigata.
O lenei tala na tupu i Taiwan.
“Sauni, Louie?” O le fesili lea a Miss Li.
Sa luelue atu le ulu o Louie. Sa ia tuu ona tamatamailima i ki uliuli ma papae o le piano ma amata ona ta. Plink, plink, plink. Sa fiafia o ia e ta faatasi nota uma e fai ai musika. Sa ia taina le itulau muamua atoa ma faasolo atu i le isi.
PLUNK. Oi. E i ai lava se faafitauli i le taina o le vaega lea. Sa tele ni nota vave. Sa toe amata Louie mai le amataga.
PLUNK. Sa faauu Louie. Ua toe tupu foi!
“E le afaina,” o le tala lea a Miss Li. “Ta toe taumafai lemu.”
Sa faataitai Louie faatasi ai ma le fesoasoani a Miss Li mo ni nai taimi. Ae sa le mafai lava ona ia pasia lelei lena vaega.
“O lenei vaega e tau faigata, ae ou te iloa e mafai ona e faia,” o le tala lea a Miss Li. “E te manatu e mafai ona e faataitai atili i le fale a o lei faia le faafiafiaga?”
“Ou te manatu e mafai,” o le tala lea a Louie.
O le aso na sosoo ai, na toe faataitai ai e Louie le piano. Ae sa ia faaauau pea ona sasi i le vaega lava lea e tasi! Plink, plink, PLUNK.
Sa sau Tama i totonu o le potu. “O a mai?” na ia fesili ai.
Sa faasino atu Louie i nota i luga o le pepa musika. “O lenei vaega e matuai faigata lava. E faaauau pea ona ou taumafai e ta ma toe ta!”
“E foliga faigata lena mea,” o le tala lea a Tama. “Ae o lenei mea ua faamanatu mai ai ia te au se tala i le Tusi a Mamona. O le tala e uiga ia Nifae na toe foi e aumai papatusi.”
Na lapopoa mata a Louie. “Ou te fiafia i le tala lena! Sa faaauau pea ona foi Nifae e toe taumafai. Ma sa fesoasoani le Tama Faalelagi ia te ia.”
Sa ataata Tama. “E sa’o. Ou te manatu afai e te taumafai pea, o le a fesoasoani le Tama Faalelagi ia te oe e pei ona ia fesoasoani ia Nifae.”
Sa luelue le ulu o Louie ma toe amata. Sa nofo Tama i se nofoa e latalata ia Louie ma faalogologo. Sa taulai atu Louie i le vaega sa faigata. Sa ia taina lemu ia nota taitasi.
Ona toe ta lea e Louie le pese atoa. O taimi uma lava na ia ta ai, sa amata ona vave atu lana ta. Mulimuli ane sa ia taina uma nota sao! Sa ia lagonaina se lagona lelei. Na te lei matauina le umi na alu ai.
“Ua e mafaia! “Malo lava,” o le tala lea a Tama.
Sa tu Tina i le faitotoa. “Sa manaia i le faalogo, Louie!”
“Faafetai,” na faapea mai ai Louie. “Ua iu lava ina ou aoaoina le vaega faigata.”
Sa opo e Tina ia Louie. “Ou te mitamita ia te oe mo le galue malosi.”
I le po o le faafiafiaga, sa popole Louie. Sa tatavale lona fatu. Sa afu ona lima.
Sa iu loa, ina valaau mai lona igoa. Sa savali atu o ia i luga o le tulaga ma tilotilo atu i matua ma tamaiti o loo faalogologo. Sa ia ta’u atu le igoa o lana pese, ona nofo lea i luga o le nofoa malo.
Sa manava loloa Louie ma tuu ona lima i luga o ki iila. Sa ia iloa sa ia faia mea uma na te mafaia. O le a fesoasoani le Tama Faalelagi ia te ia.
Sa amata ona tata Louie. Na oo mai nota e pei lava ona sa ia faataitaia. Ona oo lea i le taimi mo le vaega faigata.
Sa sa’o lana taina o nota taitasi. Sa lei lagonaina le faigata tele i lenei taimi!
Na iu lava ina ia taina le nota mulimuli o le pese. Sa patipati tagata uma a o ia sii i luga ona tamatamailima mai ki. Sa ataata Louie ma ifo atu. Sa ia vaai atu ia Tina, Tama, ma ona tuafafine o patipati ma ataata. Sa ia mafaia! Sa ia toe taumafai e tusa lava pe sa faigata, e pei lava o Nifae. Ma sa fesoasoani le Tama Faalelagi ia te ia.
O Ata na tusia e Toby Newsome