“Juon Kallim̧ur in Peptaij,” Eo Jera, Māe 2024, 8–9.
Juon Kallim̧ur in Peptaij
“Etke kwoj kōņaan peptaij?” Baba ekar kajjitōk.
Bwebwenato in ekar bōk jikin ilo USA.
“Baba, imaron̄ ke peptaij n̄e erualitōk aō iiō?” Keaton eaar kajjitōk.
Baba ear reilōn̄tak jān ikkure eo rekar ikkure. “Ej juon jokāālet eļap. Enaaj ke em̧m̧anļo̧k n̄e kokōttar an 18 am̧ iiō?”
Keaton eaar ļōmņak kake. “Ak m̧ōttan jidik erualitōk aō iiō. AK elukkuun etoļo̧k 18!”
Baba ekar jab keroro ilo jidik iien. Eaar kōm̧akūt kein ikkure eo an. “Etke kwoj kōņaan peptaij?”
“Ij iakwe Jisōs,” Keaton eaar ba. “Im ikōņaan ļoor E.”
“Juon un eo eļap an em̧m̧an n̄an peptaij,” Baba eaar ba. Eaar ettōn̄ dikdik. “Inaaj jutak likūm n̄e kāālet eo am̧ in. Jekdo̧o̧n n̄e erualitōk am̧ iiō ak 18.”
Keaton eaar atbokwoj Jemān. “Kom̧m̧ool!”
Baba eaar jab juon membōr in Kabun̄ eo an Jisōs Kraist im Armej ro Rekwojarjar ilo Raan Ko Āliktata. Ak eaar etal wōt im jar ippān Keaton im M̧am̧a jet iien. Im ke Keaton eaar kwaļo̧k katak ak al ippān ajri in Būraimere ro jet ilo kweilo̧k in kwojkwoj eo, aolep iien Baba ej etal.
Ke eaar jem̧ļo̧k ikkure eo aer, Keaton eaar lo M̧am̧a ilo jikin kōmat m̧ōn̄ā eo.
“Baba eaar ba imaron̄ peptaij n̄e erualitōk aō iiō ,” eaar ba.
M̧am̧a eaar meidikdik. “Em̧m̧an menin! Kwonan̄in ke ļōmņak kōn wōn kokōņaan bwe en peptaiji eok?”
Keaton eaar karōk pileij ko ioon tebōļ eo. “Kwoj ļōmņak Jim̧m̧a emaron̄ ke?” Jim̧m̧a im Būbū raar jerbale juon mijen ilo bar juon bukwōn.
“Jemaron̄ kajjitōk,” M̧am̧a eaar ba.
Ālkin kejota, Keaton eaar ko̧o̧ļ e Jim̧m̧a im Būbū kōn talboon eo an M̧am̧a. Ālkin jejjo riin̄, mejān etōn̄dikdik ko mejaer eaar waļo̧k ilo mejān talboon eo.
“Iakwe, Būbū! Iakwe Jim̧m̧a!” Keaton eaar ba. “Kwojeļā ta? Inaaj peptaij ilo raan in ļo̧tak en aō iiō in.”
“Lukkuun em̧m̧an!” Būbū eaar ba.
“Kwomaron̄ ke peptaij eō, Jim̧m̧a?” Keaton eaar kajjitōk.
Ekar ļapļo̧k an Jim̧m̧a ettōn̄ dikdik. “Ilukkuun m̧ōņōņō.”
Ke raan in peptaij eo an eaar jejjōt, Keaton eaar pojak. M̧am̧a im Baba rekar ettōrļo̧k kake n̄an juon m̧ōn jar epaake ijo Jim̧m̧a im Būbū rej jerbale mijen eo aer ie.
Keaton im Jim̧m̧a raar ekōņak nuknuk ko remouj. Raar jijōt ippān doon ke aolep rej al. Innām M̧am̧a eaar jar.
Ālkin, Baba eaar kwaļo̧k juon katak. “N̄e kwoj peptaij, kwoj kallim̧ur n̄an ļo̧o̧r Jisōs Kraist im kōjparok kien ko An. Eaar katakin kōj n̄an iakwe doon. Iakwe ej wāween mour eo em̧m̧antata,” eaar ba.
Keaton eaar kalimjōk pijaan Jisōs eo Baba eaar jibwe.
“N̄e jej iakwe ro jet, ekōm̧m̧an aer en̄jake ad kea kake er. Ebar jipan̄ kōj m̧ōņōņō im pād ilo aenōm̧m̧an.” Baba eaar mejōkļo̧k Keaton. “Ilukkun m̧ōņōņō kake eok rainin kōn kallim̧ur in am̧ n̄an ļoor Jisōs Kraist. Ij kōjatdikdik bwe peptaij in am̧ enaaj kakeememej eok aolep iien n̄an iakwe Anij im iakwe ro jet.”
Keaton eaar atbakwoj Baba. Innām eaar ļoor Jim̧m̧a n̄an dān eo. Keaton eaar likūt juon pā ioon pein Jim̧m̧a im pā eo juon ilo pein. Jim̧m̧a eaar ba naan ko ilo jar in peptaij eo. Innām eaar jipan̄ lelaļļo̧k Keaton iloan dān eo.
Ke Keaton ej waļo̧ktok jān dān eo, eaar etōn̄ dikdik. Ededeļo̧k! Ekar ļor Jisōs Kraist. Kiin wōt, enaaj kapen im bōk menin letok eo an Jetōb Kwojarjar. Innām enaaj juon uwaan Kabun̄ eo an Jisōs Kraist im Armej ro Rekwojarjar ilo Raan Ko Āliktata.
Keaton eaar em̧ōņōņō in kōjparok kallim̧ur eo an n̄an keememej Jisōs im kōjparok kien ko An.
Kōmeļeļe jān Alyssa Tallent