“Kwaļo̧k Iakwe an Anij,” Jera, Māe 2024, 32–33.
Kwaļo̧k Iakwe an Anij
Thais ekar jab jeļā ta eo en ba ak kōm̧m̧ane, ak ekar kōņaan jipan̄.
Bwebwenato in ekar bōk jikin ilo Bolivia.
Ekar juon jibon̄en eo ebwil. Thais im eo m̧ōttan Claudia raar keroro im ettōn̄ ke rej etetal lukwon meļaaj in jikin ikkure eo. Raar kam̧ōj kūlaaj in gym eo, im kiiō rej etal n̄an math.
Ajri ro redik rekkar kakkije. Thais ej kalimjōk aer ikkure.
Innām ekar loe juon leddik jidikdik ej jijōt m̧ake iaan lo jikin uwe ko. Ke raar epaaktok, Thais eaar loe bwe leddik eo ej jan̄.
Thais ekar jaaļe Claudia bwe en itok ippān leddik jidikdik eo.
Claudia eaar kajememe im kajipolool bōran im ba jaab, “Jenaaj rum̧ij.”
M̧okta jān an Thais tōn ba jabdewōt, Claudia ej jerjer im etal.
Thais ekar kalimjōk leddik jidikdik eo. Emaron̄ kar ļalem iiō dettan. Mejen eaar kūtileek ikōtaan bukwien neen, im eaar nooj bōran kōn pein.
Thais ekar jijōtļo̧k iturin. Leddik eo ekar em̧akūt jidik.
“Em̧m̧an ke am̧ mour?” Thais ej kajjitōk ilo mera.
Leddik eo ekar jab uaak. Thais ekar jab kanooj jeļā ta en ba ak kōm̧m̧ane.
“Imaron̄ ke jipan̄ eok?” ekar kajjitōk.
Leddik in ekar jab jeļā.
“Eta in Thais. Etam̧?”
Kiiō leddik eo ejkab reilo̧k n̄an Thais. “Nicol.”
“Etke kwoj jan̄ Nicol?”
“Aolep rej kajirere kake n̄a kōn aō tepu,” ej ba ikōtaan an jan̄.
Thais ej ir mejan Nicol. “Jolo̧k bōd kōn aer kar ba men ņe.” Ejjab aorōk ta eo armej rej ļōmņake.”
“Rej ba ijjab deo.”
“Ekwe, ij ļōmņak rebōd!” Thais ej ba ilo an ettōn̄ dikdik. “Kwolukkuun deo im barāinwōt jenolo̧k. Kojeļā ke?”
Thais ekar kōļmenļo̧kjeņ kōn juon iaan al in Būraemere ko em̧m̧antata ippān. Ekar jeļā ta eo en ba kiiō.
“Kwoj juon nejin Anij,” Thais ekar ba, ke ej jibwe pein leddik eo.
Thais ekar kōnnaan jidik ippān Nicol. Ekar kōm̧eļeļeikNicol eaorōk ippān Jemedwōj Ilan̄, baam̧le eo an, im elōn̄ ro jet me rej lukkuun iakwe. Jidik kōn jidik, Nicol eaar jino ettōn̄.
Ālkin jejjo minit, Nicol eaar jutak tok im atbakwoj Thais. Ekar ba “Kom̧m̧ool!”
Thais ekar kalimjōk an eo m̧ōttan ekāāl ettōr kōn juon ettōn̄. Ekar juon en̄jake em̧m̧an ke ej jipan̄ Nicol em̧m̧anļo̧k im jeļā jon̄an an Anij iakwe e.
Innām Thais eaar bar jutak. Ij aikuj etal Nicol bwe inaaj rum̧ij n̄an math! liin ekar ļōmņak, ej ettōn̄ ke ej m̧ōkajļo̧k n̄an kūlaaj.
Kōmeļeļe jān Flavio Remontti