“Iien Bwebwenato an Jeje ko Rekwojarjar,” Jera, Māe 2024, 30–31.
Iien Bwebwenato an Jeje ko Rekwojarjar
“Ewōr ke en ewōr an bok ekōņaan bwe in riiti rainin?” Mr. Otoo eaar kajjitōk.
Bwebwenato in ekar bōk jikin ilo Ghana.
“Eien riit,” Mr. Otoo eaar ba.
Nyameye ej kajjim̧we an jijjōt. Elimo iien riit!
Aolep raan ilo jikuuļ, rūkaki eo aer ej riiti juon bok n̄an kūlaaj eo aer. Jet iien ļein ej riit kōn mennin mour ko. Jet iien ļein ej riit kōn armej ro ilo laļ ko jet. Im jet iien ļein ej kajjitōk ippān kūlaaj eo n̄e ewōr bok rekōnaan bwe en riiti.
“Ewōr ke en ewōr an bok ekōņaan bwe in riiti rainin?” Mr. Otoo eaar kajjitōk.
Nyameye ekar kajutak pein. “Ewōr aō!” Ļein eaar jibwe tok pāāk eo an im kanōktok bok eo em̧m̧antata ippān. Kar bok in bwebwenato an Bok in Mormon! Ekar boktok n̄an riit m̧ōjin jikuuļ ilo an kōttar an jinen itok im bōke. An elolo pija ejipan̄ e m̧eļeļe bwebwenato ko an jeje ko rekwojarjar.
Mr. Otoo eaar ettōn̄ ke ej loe bok kileplep eo. “Eban ewōr an iien riiti aolepen. Ewōr ke paat en kokōnaan bwe in riiti?”
“Aaet,” Nyameye ekar ba. Ļein eaar ellōk peij ko n̄an n̄e eaar loe bwebwenato eo em̧m̧antata ippān. “Kwomaron̄ ke riiti menin, jouj? Etan in ‘Etōņak eo an Liai.’”
“Bwebwenato in ta e?” Mr. Otoo eaar kajjitōk.
“Kōn juon rikanaan me eaar lo juon visōn. Ļein eaar loe juon wōjke aibojooj kōn le ko leen renno.” Nyameye eaar jiton̄ļo̧k pijaan wōjke eo. “Eaar kōņaan bwe baam̧le eo an ren m̧ōn̄ā leen wōjke eo ippān. Kwomaron̄ ke riiti?” Nyameye eaar lelo̧k bok eo n̄an rūkaki eo an.
“Aaet,” Mr. Otoo eaar ba. Innām eaar jino riit eļaaj. Ekar riit kōn iaļ eo eaidik me ej tōlļo̧k n̄an wōjke eo. Ekar riit kōn aen in dāpdep eo. Im ekar riit kōn kōjparok kien ko.
Selorn eo m̧ōttan Nyameye ekar kajutak pein. “Kain wōjke rōt eo?” ekar kajjitōkin Nyameye.
“Ijjab jeļā,” Nyameye eba. “Ak le ko leen raar lukkuun enno. Emaron̄ kar enno ļo̧k jān wōjke m̧an̄ko!” Innām Nyameye eaar bōjrak im kōļmenļo̧kjen. “Ilo jikin jar, Iaar ekkatak bwe le ko leen raar jutak kōn iakwe an Anij. Kiiō em̧eļeļe unin an lukkuun kar enno im jenolo̧k!“
Ke eaar m̧ōj kūlaaj, Nyameye eaar jijōt nam̧ōj im kōttar jinen. Ekar kwaļo̧k tok bok in bwebwenato in Bok in Mormon eo im riiti.
“Juon bwebwnato em̧m̧an” Selorm ekar ba. Ekar jijōtļo̧k turin Nyameye. “Imaron̄ ke bar riiti juon ippam̧?”
“Aaet!” Nyameye eaar ālōkļo̧k n̄an bar juon bwebwenato. Raar riit kōn Abinadai im Kiin̄ Noa.
Rijikuuļ ro jet m̧ōttaer raar itok im ron̄jake. Ke ekar lōn̄ aer kajjitōk, Nyameye ekar uaaki. Ekar bar kajjitōk ippāer kajjitōk n̄an teej er kōn bwebwenato ko rej riiti!
Ejjab to Nyameye ekar lo an jinen etetal ļo̧k n̄an ippāer. “Kom̧m̧ool kōn ami riit ippa,” ekar ba n̄an ajri ro jet. Ekar kiil bok eo im ettōn̄ dikdik. Ekar em̧ōņōņō bwe ro m̧ōttan ekar bar em̧m̧an ippāer bwebwenato jon̄an wōt an em̧m̧an ippān.
Kōmeļeļe ko jān Zhen Liu