“Jouj ilo Iien Kōrālep,” Jera, Māe 2024, 36–37.
Jouj ilo Iien Kōrālep
Ļaddik ro jet ren ke bar kajirere kake e?
Bwebwenato in ekar bōk jikin ilo Philippines.
Jemān ej ron̄ an jinen kōļaļļaļ ilo kōjem̧ in ruum̧ eo an. Kar iien ruj. Ekar jerkak jān peet eo an im kwaļ mejan. Innām eaar kobaļo̧k ippān M̧am̧a, Baba, im ro jein im jatin ilo ruum̧ eo m̧aan.
“Iakwe in jibbon̄,” Jinen eaar ba. Dave emmejkiki ilo an ettōn̄. Baam̧le eo raar jubukwe, im Jemān eaar jar n̄an ijjino raan eo.
“Ikōņaan kwaļo̧k juon eoon em̧m̧an jibon̄in in,” Jinen eaar ba. Liiin ekar kōpeļo̧k Bok in Mormon. “En̄in ej Moronai: 7:45. ‘Im iakwe-em̧ool ej meanwōd, im e jouj’”
Dave eaar kōļmenļo̧kjeņ kōn eoon eo ke ej kōpojak n̄an jikuuļ. M̧okta jen an diwōjļo̧k, ekar jar. Eaar jar “jouj im jipan̄ eō bwe in jouj rainin.”
Ilo kūlaaj, Dave ekar m̧ōņōņō ke ej kōm̧m̧ani katak ko an. Ekar ron̄jake ke Rikaki Frida ej leļo̧k jet naan in jipeeļ kāāl n̄an ekkatak.
Ejjab to ekar iien kōrālep. Dave ekar wiaik jet piteto tōn̄al im dān kōļar. Ekar jijōtļo̧k ippān ro m̧ōttan im jino bwebwenato.
Ejjab to ekar ron̄ ainikien jet ajri ilo tebōļ eo juon. Ruo ļaddiik rej kakūtōtōik juon ļaddik ekāāl etan in Jose. Jose ekar wunnin̄ n̄an jon̄an iiō eo an, ak ekar em̧m̧an n̄an ro jet im kar ļap an jerbal ilo kūlaaj. Ļaddik ro jet ewōr aer kōrālep, ak ejjeļo̧k an Jose.
“Kwojaan wunnin̄? Ejjeļo̧k kijem̧ m̧ōn̄ā m̧weo m̧ōm̧?” Antonio eaar kajjitōk.
Dave ekar jitļo̧k n̄an ļaddik ro ilo ejja iien eo wōt Joaquin ej bōk pāāk eo an Jose im kadkad kake n̄an Antonio. Jose ej ettōrļo̧k ilikun Antonio bwe en bōke men ko m̧weien.
“Jouj im letok pāāk ņe aō,” Jose eaar ba.
Ak Antonio im Joaquin rejjab ron̄jake. Joaquin ekar ba “Elukkun m̧o̧r im kōnana pāāk e am̧!”
Dave ekar ron̄ aolep naan kein renana, ak ekar mijak in jipan̄ Jose. Ta en nej ajri ro jet ļōm̧ņak? Joaquin im Antonio renaaj ke bar kajirere kake?
Innem ekar ļōm̧ņake eoon eo Jinen eaar riiti jibon̄en eo. Iakwe ejouj. Jisōs Kraist enaaj kar kōņaan bwe en jouj. Ejim̧we n̄an kōm̧m̧ane.
Dave ekar jutak im jelm̧ae ļaddik ro jet. “Bōjrak ami kakūtōtōik Jose. Jouj im kōroolļo̧k pāāk ne an.”
“Ta ne am̧ būraabōļo̧m̧?” Joaquin ej kajjitōk.
“Etke komij lej n̄an Jose? Ejjeļo̧k men ebōd ekar kōm̧m̧ane,” Dave eaar jiron̄ er. Innām ekar emenono. “Jisōs ej iakwe kōj aolep, im E ekōņaan bwe jen jouj. Jouj im bōjrak ami kakūtōtōik Jose. Enana kajirere. N̄e kom̧ ej wōnm̧aanļo̧k wōt, inaaj boktok Rikaki Frida.”
Antonio eaar reilaļļo̧k n̄an juuj ko an. Ekar bar kōro̧o̧lļo̧k pāāk eo an Jose. “Joļo̧k bōd,” ekar kadikdik wōt an ba. E im Joaquin raar ro̧o̧l n̄an jea ko aer.
“Kom̧m̧ool tata” Jose ekar ba.
Dave ekar den̄den̄ōt aeran Jose ilo mera. “Kōjro ej m̧ōttā kiiō.”
Jose eaar ettōn̄.
Ilo m̧weo, Dave ekar jiron̄ baam̧le eo an ta ekar waļo̧k.
“Menin ekar jab pidodo, ak kwaar kōm̧m̧ane ta eo ejim̧we,” Jemān eaar ba.
“Eļap an utiej buruō kōn am̧ jouj,” Jinen eaar ba.
Raan eo juon ke Jinen ej jipan̄ e kepooj kōrālep eo an, Dave ekar kajjitōk, “jemaron̄ ke jouj im kōm̧m̧ane ruo jāānwūj?
“Etke? Kwolukkuun kwōle ke?” M̧am̧a eaar kajjitōk.
Dave ekar ettōn̄. “Ejjab, ak inne ikar kile bwe ejjeļo̧k kijen Jose m̧ōn̄ā. Ikōņaan jeere jidik.”
“Ej juon ļōmņak em̧m̧an!” Jinen ekar kwaļo̧k tok pilawe im kōm̧m̧ane juon jāānwūj n̄an Dave.
Ilo iien kōrālep, Dave im Jose raar jijōt im kan̄ jāānwūj ko kijeer ippān doon. Ekar bōk kajoor n̄an kōbōjrak ajri ro jet jān kajirere kake Jose. Ak Dave eiakwe eo m̧ōttan ekāāl, im ejeļā ke Jemedwōj Ilan̄ ekar m̧ōņōņō bwe ekar kāālet n̄an jouj.
Kōmeļeļe ko jān Mark Robison