“Jis Frensip,” Fren, Mei 2024, 14–15.
Jis Frensip
?Hao nao bae oli pleplei sapos oli no andastanem wanwan long olgeta?
Stori i tekem ples long Jemani.
“There is sunshine in my soul today!” Matvii i singsing Mama mo brata blong Hem Tymofii i singsing wetem hem. I tudak aotsaed long windo blong trak. Be singsing ia i helpem evri samting blong filim wan smol laet.
Hem i bin wan taem blong fraet blong Matvii mo famli blong hem. Oli stap muv i go long Jemani from se hom blong olgeta i nomo sef. Oli travel blong tu dei mo naoia oli go kolosap. Wan bisop long Jemani i stap draevem olgeta i go long wan ples blong stap.
Matvii i glad se Papa long Heven i helpem olgeta blong kasem Jemani sef. Be hem i misim Papa. Hem i mas stap long kantri blong olgeta from wan wo. Matvii i wari from hem bigwan.
Bisop i putum trak aotsaed long wan haos. “!Welkam long hom blong mi!”
Matvii i karem bag blong hem mo folem famli i go insaed. Ples i stap kwaet. Famli blong bisop i mas go long bed finis.
“Yu save stap long rum blong Mat mo Lore taem yu stap ia” bisop i talem.
“Wet,” Mama i talem. “Oli no nid blong givim rum blong olgeta long mifala”
Bisop i smael. “Oli glad blong mekem. Mifala i wantem yufala blong filim gud mo kamfot.
Mama i sakem hed blong hem blong agri. “Tangkyu.”
Long nekis moning, Matvii mo Tymofii i go long kijin blong brekfas. Bisop i sidaon long tebol wetem wan boe mo gel. Oli no luk bigwan tumas long Matvii.
“Hemia i ol pikinini blong mi, Mats mo Lore,” bisop i talem.
!I gud tumas blong luk yutufala!” Tymofii.
Mats mo Lore i luk konfius smol.
“Tufala i no toktok lanwis blong yufala,” bisop i talem. “Be mi sua bae yufala i kam ol gud fren.”
Matvii i sakem hed blong agri ?Hao nao bae oli kam fren sapos oli no save toktok long wanwan long olgeta? Hem i filim sanlaet we hem i bin singsing long hem las naet we i pas.
Afta we oli kakae, Mats mo Lore i soem long tufala wan rum blong pleplei. Tu smosmol pikinini i stap plei wetem sam giaman pleplei. Matvii i ting se oli blong ol smol brata mo sista blong Mats mo Lore.
Mats i talem wan samting. Hem i olsem se wan kwestin, be Matvii i no save wanem hem i talem. Mats i sidaon mo i openem wan bokis blong ol kad. Hem i putum olgeta long ol grup. Afta hem mo Lore i pikimap ol kad blong tufala. Matvii i wantem plei. Be hem i no save olsem wanem blong plei.
Mats i putumdaon wan kad mo lukluk long Matvii. Hem i talem wan samting bakegen.
Matvii i wantem blong krae. Hem i no wantem stap long Jemani sapos hem i no save andastanem wan man.
Lore i talem wan samting long Mats, afta i ron i go long ples blong putum ol klos. Hem i kambak mo putum wan niu pleplei long flo.
Matvii i save pleplei ia. Ol pis blong wud i luk olsem wan we hem i gat long hom. !Hem i jis! Hem i bin plei jis wetem papa blong sam aoa. Matvii i glad mo sakem hed blong agri. Hem i save olsem wanem blong plei long gem ia.
Lore i smael bigwan mo stat blong putum ol pis wud.
Matvii i muvum paon blong hem tu skwea mo wajem Lore i muvum soldia blong hem. Afta Matvii i muvum bisop blong hem i go long soldia blong Lore. Hem mo Tymofii tufala i hapi. Lore i mekem saon blong harem nogud be hem i stap smael.
Oli plei blong wan longfala taem. I no longtaem oli stap laf. Oli no andastanem toktok blong wanwan long olgeta be yet oli gat gudtaem.
Long ol nekis wik we oli kam afta, oli faenem ol nara gem we olgeta evriwan oli save. Oli plei futbol aotsaed wetem ol nara pikinini blong Jemani. Matvii i lanem tu sam toktok long Jemani lanwis. Samtaem hem i mekem ol mistek, be hem i gohed blong stap traem.
Matvii i stap misim papa mo hom blong hem yet. Be hem i talem tangkyu se Papa long Heven i helpem hem blong mekem ol niu fren.
Ol pikja droing oli kam long Hannah Li