“Stap Serem Lav blong God,” Fren, Mei 2023, 32–33.
Stap Serem Lav blong God
Thais i no save wanem blong talem o mekem, be hem i wantem blong help.
Stori ia i hapen long Bolivia.
Hem i bin wan hot moning. Thais mo fren blong hem Claudia i stap stori mo laflaf taem tufala i stap wokbaot krosem fil blong futbol. Tufala i jes finis long jim klas mo naoia tufala i stap go long mat klas.
Ol smosmol pikinini i stap long brek taem. Thais i wajem olgeta oli stap pleplei.
Afta hem i luk wan smol gel i stap sidaon hemwan long ol step. Taem oli go kolosap, Thais i luk se hem i stap krae
Thais i saksakem han long Claudia blong kam long smol gel ia.
Claudia i sakem hed mo solda blong hem blong talem no. “Bae yumi let.”
Bifo Thais i save talem wan toktok, Claudia i wokbaot i go.
Thais i lukluk smol gel. Hem i gat faef yia olsem. Hem i haedem fes blong hem long tufala ni blong hem mo kavremap hed blong hem wetem han blong hem.
Thais i sidaon narasaed long hem. Gel i muvaot smol.
“?Yu yu Oraet?” Thais i askem wetem wan voes we i sofsof.
Gel i no ansa. Thais i no save stret wanem blong talem o mekem.
“?Mi save helpem yu?” hem i askem nekis kwestin.
Gel ia i leftemap hed.
Nem blong mi, Thais. ?Wanem nem blong yu?”
Gel i go antap long Thais. “Nicol.”
“?From wanem yu stap krae Nicol?”
“Evriwan i stap jikim mi from mi fatfat,” hem i krae mo talem.
Thais i waepem fes blong Nicol. “Mi sori we oli talem hemia. Hem i nomata se wanem ol pipol oli gat tingting long yu.”
“Oli talem long mi se mi no naes.”
“!Mi ting se oli rong!” Thais i talem wetem wan smael. “Yu yu naes mo tu, yu yu spesel tumas” “?Yu save hemia?”
Thais i tingting long wan long ol fevret singsing blong hem long Praemeri. Naoia hem i save wanem blong talem.
“Yu yu wan pikinini blong God,” Thais i tekem han blong gel mo i talem,
Thais i stap toktok wetem Nicol. Hem i eksplenem olsem wanem Nicol i impoten long Papa long Heven, famli blong hem mo plante we oli lavem hem tumas. Sloslo, Nicol i stat blong smael.
Sam minit i pas, Nicol i stanap mo putum han blong hem raon long Thais. “!Tangkyu!” hem i talem.
Thais i wajem niu fren blong hem i ronwe wetem wan big smael. Hem i wan gudfala filing blong helpem Nicol i filim moa gud mo save hamas God i lavem hem.
Afta Thais tu jam long long tufala leg blong hem. !Mi mas ron olsem Nicol o sapos no bae mi let long mat klas!! hem i stap tingting, smael taem hem i stap hariap i go long klas.
Ol pikja droing i kam long Flavio Remontti