“Ol Aktiviti blongKam Folem Mi ,” Fren, Mei 2024, 28–29.
Ol Aktiviti blong Kam Folem Mi
Blong famli haos naet o skripja stadi—o blong gat wan gud taem nomo!
Wokbaot long Ol Step blong Hem
Blong Mosaea 4–6
King Mosaea i bin obei ol komanmen mo “wokbaot folem ol wei blong Lod” (Mosaea 6:6). Long wan pis pepa, raet folem leg blong yu mo katemaot sep. Raetem long droing blong leg wan wei we yu save folem Jisas. Putum droing leg blong yu long ples we yu save tingbaot blong folem eksampol blong Jisas Kraes.
Folem Profet
Blong Mosaea 7–10
Amon i tijim se ol profet i save luk ol samting we oli stap kam (luk long Mosaea 8:16–17). Tanem i go long pej 2 blong ridim mesej blong Presiden Nelson blong jeneral konfrens. ?Wanem nao hem i tijim yumi long hem? Droem wan pikja abaot blong hem mo sendem i kam long mifala long Fren.
Wan Laet long Tudak
Blong Mosaea 11–17
Abinadae i tijim se Jisas Kraes i “wan laet we i no gat en, we i no save kam tudak” (Mosaea 16:9). Haedem wan samting long haos. Ofem ol laet, mo mekem evriwan i traem blong faenem long tudak. Afta haedem mo traem blong faenem wetem ol laet i on o wetem ol flas laet. ?Wanem wei nao i moa isi? ?Olsem wanem nao Jisas i helpem yumi olsem laet i helpem yu?
Ol Hat Oli Joen long Yuniti
Blong Mosaea 18–24
Alma tijim yumi blong yumi gat “hat [we] oli joen tugeta blong kam wan long lav” (Mosaea 18:21). Hemia i minim se yumi mas wok tugeta mo soem lav long ol nara man. !Mekem wan string blong ol hat blong rimaenem yu! Katemaot sam pepa hat mo raetem nem blong wanwan memba blong famli long hem. Mekem wan hol long wanwan hat, mo putum wan string tru long olgeta blong mekem se ol hat oli joen. Hangem string blong ol hat blong yu long ples we bae yu luk oltaem.