“Ang Pagpili Panahon sa Dominggo,” Higala, Hulyo 2024, 4–5.
Ang Pagpili Panahon sa Dominggo
“Unsa ang sakramento?” Nangutana si Anita.
Kini nga istorya nahitabo sa Iceland.
“Mas taas pa!” Miingon si Evolett sa iyang higala nga si Anita. Ilang gisukod kon unsa ka taas ang mahimo nilang malukso sa trampoline ni Evolett.
Sa kalit lang, si Anita nilukso og taas kaayo. Sa dihang ang iyang mga tiil mitugpa pag-usab, kini nakapalupad ni Evolett sa ibabaw! Ang duha ka batang babaye nahagba sa trampoline. Nangatawa sila.
“Makalingaw kaayo kini,” miingon si Anita. “Mahimo bang magdula sab ta ugma?”
Gipahagba ni Evolett ang iyang likod. “Oo! Ganahan kaayo ko ana.”
“Mahimo kita nga magdula sa balay sa akong lola.” Ang lola ni Anita nagpuyo mga pipila lang ka balay gikan sa balay ni Evolett.
Dayon nakahinumdom si Evolett nga Dominggo ang mosunod nga adlaw. Gusto siya nga moadto sa Primary. Makalingaw ang pagpakigdula kang Anita, apan ganahan siyang mohimo og maayo nga pagpili.
“Karon lang gayod ko nakahinumdom nga dili ko pwede,” miingon si Evolett. “Gikasubo ko. Mosimba ko kauban sa akong pamilya ugma.”
Si Anita mibarog ug miuntol-untol pag-usab. “Ngano man?”
Si Evolett misugod usab sa paglukso. “Kay, gusto ko nga mosunod ni Jesukristo. Ang akong pamilya magsimba kada Dominggo aron magkat-on mahitungod Kaniya ug moambit sa sakramento.”
“Unsa ang sakramento?” Nangutana si Anita.
“Kana mao ang panahon nga mokaon kami og gagmayng pinikaspikas nga pan ug moinom og gamayng tubig sa gagmayng baso aron sa paghinumdom ni Jesukristo,” miingon si Evolet. “Dayon ang mga tawo maghisgot mahitungod kon giunsa sila sa pagtabang ni Jesus. Ug human niana, adunay espesyal nga klase alang sa mga bata!”
“Daw makalingaw na!” Miingon si Anita. “Pwede ba ko moadto?”
“Sige ba!” Mipahiyom si Evolett.
Si Anita nagdagan nga mipauli aron mangutana sa iyang lola kon pwede ba siya nga mokuyog ni Evolett og simba. Pagkasunod buntag, gihapit ni Evolett ug sa iyang pamilya si Anita sa ilang pagpadulong.
Pag-abot nila sa simbahan, gilibot ni Evolett si Anita. Iyang gipakita niya ang kwarto sa Primary, ang gym, ug ang chapel.
Sa wala madugay oras na alang sa miting sa sakramento. Si Evolett ug Anita nagtupad og lingkod. Si Evolett naningkamot sa paghunahuna ni Jesukristo atol sa sakramento. Dayon naminaw sila sa mga pakigpulong.
Sa kataposan panahon na alang sa Primary! Gipaila-ila ni Evolett si Anita sa pipila sa iyang mga higala.
“Kini ang akong higala nga si Anita,” miingon si Evolett.
“Nalipay kaayo kami nga mianhi ka karon. Ako si Sister Magnusson,” miingon ang magtutudlo sa Primary.
Samtang si Evolett ug Anita naminaw sa leksiyon mahitungod ni Jesukristo, si Evolett mibati og kalipay sa iyang kasingkasing. Ganahan siya nga anaa sa simbahan kauban si Anita. Milingi siya ug mipahiyom ni Anita. Mibalos usab og pahiyom ang iyang higala.
“Salamat sa imong pagdapit kanako,” miingon si Anita sa ilang pagpadulong na og pauli.
Nalipay si Evolett nga siya makasunod ni Jesukristo. Ug siya nalipay nga si Anita gusto nga makakat-on usab mahitungod Kaniya.
Makalingaw ang molukso sa trampoline ug molupad sa kahanginan, apan ang init nga pagbati nga gibati ni Evolett sa iyang dughan mas nindot pa.
Mga paghulagway pinaagi ni Fiona Powers