“Pakighinabi kang Alan mahitungod sa mga Artikulo sa Hugot nga Pagtuo,” Higala, Hulyo 2024, 40–41.
Pakighinabi kang Alan mahitungod sa mga Artikulo sa Hugot nga Pagtuo
Si Alan taga Malaga, Spain. Gipangutana namo siya og pipila ka pangutana bahin sa kon giunsa niya pagkat-on ang Mga Artikulo sa Hugot nga Pagtuo.
Sultihi kami bahin sa imong kaugalingon.
Otso anyos ang akong panuigon. Kon modako na ko, gusto ko nga mahimong inila nga scientist. Akong paborito nga kolor kay kahil [orange], ug ang akong paborito nga pagkaon mao ang tortillas de patatas (Spanish omelets) nga hinimo sa akong lola.
Giunsa nimo pagkat-on ang Mga Artikulo sa Hugot nga Pagtuo?
Nagsugod ko sa pagkat-on niana sa Primary. Manganta kami og mga awit aron motabang kanamo nga makasag-ulo niini. Usahay ang among mga magtutudlo magsulat niini sa pisara ug mopapas og pipila ka pulong. Kami nagdrowing usab og mga hulagway aron mapasabot ang matag Artikulo sa Hugot nga Pagtuo.
Nagpraktis usab ako sa pagsulti niini ngadto sa akong pamilya sulod sa sakyanan kon padulong sa eskwela. Nagtabang ako sa akong gamayng manghod, si Maia, sa pagkat-on pod. Kahibalo na siya sa unang unom ka artikulo!
Hain sa Artikulo sa Hugot nga Pagtuo ang imong paborito?
Ganahan ko sa numero nuybe. “Kami nagtuo sa tanan nga gipadayag sa Dios, sa tanan nga gipadayag niya karon, ug kami nagtuo nga Siya mopadayag pa og daghan nga dagko ug mahinungdanon nga mga butang kalabot sa Gingharian sa Dios.” Kini nagtudlo nga ang Langitnong Amahan adunay daghan pang butang alang kanato nga atong kat-onan sa hinayhinay.
Sa unsang paagi nga ang pagkahibalo sa Mga Artikulo sa Hugot nga Pagtuo nakatabang kanimo?
Usa ka adlaw sa eskwelahan, ang akong amiga nga si Sophia nangutana kanako unsa ang akong gituohan ug kon ako nahisakop ba sa usa ka relihiyon. Nakahinumdom ko sa unang Artikulo sa Hugot nga Pagtuo, nga nag-ingon, “Kami nagtuo sa Dios, ang Amahan sa Kahangtoran, ug sa Iyang Anak, si Jesukristo, ug sa Espiritu Santo.” Mao nga gipakigbahin nako kana kaniya.
Giingnan usab nako siya nga ako usa ka Kristiyano ug usa ka miyembro sa Ang Simbahan ni Jesukristo sa mga Santos sa Ulahing mga Adlaw. Naminaw siya kanako ug nakasabot unsa ang akong gipakigbahin kaniya.
Unsay imong gibati sa imong kasinatian?
Nindot kaayo ang akong gibati tungod kay ako nasayod nga nahimo akong isog sa pagpakigbahin sa akong mga gituohan ngadto sa akong amiga. Tungod sa akong pagpaningkamot sa pagkat-on sa Mga Artikulo sa Hugot nga Pagtuo, nahimo nako nga nakipagbahin sa ebanghelyo ug nasayod kon unsa ang isulti.
Mga Paghulagway pinaagi ni Toby Newsome