Higala ngadto sa Higala

Ang Hingpit nga Kalipay sa Pagkat-on

Ni Elder Clark G. Gilbert

Sa Seventy

Gikan sa usa ka interbiyo uban ni Olivia Kitterman ug Noelle Lambert Barrus.

Gibati nako nga nagdako ko nga dili usa ka maayong tigkat-on. Ang tanan nakong mga igsoon utokan kaayo. Makakuha sila og maayong mga grado. Miapil sila sa lisod kaayong mga klase. Sige ko og paningkamot nga makaapil sa lisod nga mga klase, apan wala gyod ko madawat. Lisod kaayo ang Math. Mao nga naghunahuna ko, “Siguro, dili ako utokan.” Wala ko maghunahuna nga kana mausab.

Dayon usa ka tuig aduna akoy magtutudlo kinsa mihatag kanako sa pagsalig nga akong gikinahanglan. Ang akong magtutudlo nakakita og dugang talento diri kanako kay sa akong nakita. Siya misulti, “Clark, mahimo kang maayo nga estudyante. Kinahanglan lang nga mosalig ka sa imong kaugalingon nga makahimo ka niini.”

Busa padayon kong naningkamot. Nagtuon ko og maayo. Nagtrabaho pod ko nga mas maorganisado. Nakat-onan nako kon unsaon nga makasubay sa akong mga homework. Ang pagpalong sa TV nakatabang nako sa pagpokus sa akong mga trabahoonon sa eskwela. Kadugayan, nahimo akong mas maayo nga estudyante. Ug nagkadako ang akong pagsalig.

Sa dihang miadto nako sa misyon, akong nakita nga dili lang diay ko makat-on sa akong kaugalingon. Mihangyo ko sa Langitnong Amahan alang sa tabang. Ug naminaw ko sa Espiritu Santo. Samtang mitrabaho ko og maayo, nakahimo ko sa pagtudlo ug sa pagtabang sa katawhan. Dihang miuli ko gikan sa akong misyon, mi-eskwela ko sa college. Nag-ampo ko alang sa tabang sa Dios diha sa matag klase. Nahimo akong mas maayo nga estudyante ug gani misugod ko sa pagkagusto sa math!

Naghunahuna ko nga ang pagka-utokan nagpasabot nga nasayod ka og daghan ug ang pag-eskwela sayon. Kana dili gayod tinuod. Kon andam ka nga ilakip ang Ginoo sa imong pagkat-on ug motrabaho og maayo aron molambo, ikaw utokan!

Kon ang mga butang lisod karon, hinumdomi nga ikaw anak sa Dios. Aduna kay talagsaon nga potensiyal. Makahimo ka og lisod nga mga butang. Padayon lang sa pagbansay. Pangayo og tabang sa Langitnong Amahan. Gusto Niya nga molampos ka. Makahimo ka niini!

Makalingaw nga Pagkat-on

Pangitaa ang matag sundanan sa mga suplay sa pang-eskwela diha sa grid sa ubos. Unsa ang imong ganahan nga kat-onan diha sa eskwelahan?

“Pangitaa gikan sa labing maayo nga mga basahon ang mga pulong sa kaalam, pangita og kasayoran gani pinaagi sa pagtuon ug usab pinaagi sa hugot nga pagtuo.” (Doktrina ug mga Pakigsaad 109:7).

Mga Paghulagway pinaagi ni Agnes Saccani