Kumusta gikan sa Nicaragua!

Pagkat-on mahitungod sa mga anak sa Langitnong Amahan sa tibuok kalibotan.

Ang Nicaragua usa ka nasod sa Sentral Amerika. Hapit sa 7 ka milyon ka tawo ang nagpuyo didto!

Pinulongan

Kinatsila nga hapin sa Higala nga magasin

Ang opisyal nga pinulongan mao ang Kinatsila. Ang uban nga tawo mosulti usab og lumad nga mga pinulongan sama sa Miskito, Sumo, ug Rama.

¿Nahki sma?

Nagpasabot kana og “kumusta ka?” sa Miskito!

Pagpakaylap sa Ebanghelyo

Litrato sa dapit nga gitukoran og templo ug paghulagway sa mga bata nga dungan nga nagbasa

Ang unang mga misyonaryo miadto sa Nicaragua niadtong 1953. Karon aduna nay sobra sa 100,000 ka miyembro sa Simbahan didto! Aduna pa gani usa ka templo nga kasamtangan nga gitukod.

Mga Iho sa Linaw sa Nicaragua

Litrato sa Linaw sa Nicaragua ug paghulagway sa iho

Ang mga bull shark makapuyo sa tubig sa dagat ug sa tab-ang nga tubig. Kini nagpasabot nga sila makapuyo sa mga lawod, mga suba, ug mga linaw! Sila molangoy gikan sa Dagat sa Atlantika subay sa usa ka taas nga suba aron makapuyo sa Linaw sa Nicaragua.

Palo de Mayo

Litrato sa tukon [pole] nga giadornohan og mabulokon nga mga ribon ug paghulagway sa dag-om nga panganod

Ang mga tawo sa Nicaragua magpahigayon og dako nga kasaulogan nga gitawag og Palo de Mayo kon moabot na ang panahon sa ting-ulan. Ilang adornohan ang usa ka kahoy o tukon og mabulokon nga mga ribon aron mapalibot-libotan sa pagsayaw ug maglingaw-lingaw sa tibuok bulan.

Kalihokan

Chuwis

Paghulagway sa berde nga mga liso sulod sa tasa

Ang Chuwis usa ka dula nga ginadula sa mga bata sa Nicaragua. Sa pagdula niini nga dula, magkinahanglan ka og green beans (o mga tukog) ug lungag diha sa yuta (o usa ka tasa). Hatagi og lima ka green beans ang matag magdudula. Ang una nga magdudula mag-itsa og green beans ngadto sa lungag sa tinagsa tagsa. Kon masipyat siya og kausa, moundang siya, ug ang sunod nga magdudula mopuli. Ang unang magdudula nga makapasulod sa tanang lima ka green beans ngadto sa lungag ang makadaog!

Risipi

Gallopinto

Litrato sa usa ka potahe nga kan-on ug black beans

Sa Nicaragua, daghang tawo ang mokaon niining kan-on ug beans nga potahe kada adlaw. Aniay usa ka bersiyon nga mahimo nimong sulayan!

1. Pag-init og 2 ka kutsara nga mantika ug ½ nga tinadtad nga dalag nga sibuyas. Sugkaya sulod sa 5 ka minuto.

2. Isagol ang 1 1/2 ka tasa nga bugas humay sulod sa 2 hangtod 3 ka minuto.

3. Dugangi og asin ug 3 ka tasa nga tubig. Kuhaa ang mga liso gikan sa katunga sa berde nga siling atsal ug itungtong kini sa ibabaw.

4. Taboni ug lutoa sulod sa 15 ka minuto hangtod nga hapit na mohubas ang tubig.

5. Ilabay ang naluto nga siling atsal ug isagol ang 2 ka tasa nga naluto na nga pula o itom nga beans ug 1/2 sa kutsarita nga garlic powder. Lutoa sulod sa 10 ka minuto.

Seguroha nga makapangayo og tabang sa usa ka hamtong!

Istorya nga naa sa PDF

Mga paghulagway pinaagi ni Dave Klüg