Dali, Sunod Kanako nga mga Kalihokan

Alang sa home evening o pagtuon sa kasulatan—o alang sa kalingawan lamang!

Hulyo 1–7

Maabilidad nga Paghimo [Craft] sa Plano sa Kalipay

Alang sa Alma 17–22

Si Aaron ug si Ammon parehong mitudlo mahitungod sa plano sa Langitnong Amahan sa kalipay. Gitawag nila kini og plano sa katubsanan (tan-awa sa Alma 18:36–39 ug Alma 22). Paklia ang pahina ngadto sa pahina 12 alang sa maabilidad nga paghimo [craft] sa inyong kaugalingong plano sa kalipay.

Alang sa mas manghod nga mga bata: Pangita og usa ka litrato sa imong anak dihang usa pa siya ka batang masuso. Hisgoti ang mga paagi nga sila nagtubo sukad sa ilang pagkamasuso! Dayon hisgoti kon sa unsang paagi kita ania dinhi sa yuta aron motubo isip kabahin sa plano sa Langitnong Amahan.

Hulyo 8–14

Mga Instrumento sa mga Kamot sa Dios

Alang sa Alma 23–29

Gisultihan ni Ammon ang iyang mga igsoong lalaki, “Kita nahimo nga mga himan diha sa mga kamot sa Dios aron sa pagpahinabo niining dako nga buluhaton” (Alma 26:3). Pagtigom og mga butang nga inyong magamit sa paghimo og musika. Dayon paghimo og mga kompas ug mga kanta. Sama nga kita naggamit og mga instrumento sa paghimo og musika, ang Dios makagamit kanato sa pagtabang sa pagtukod sa Simbahan ni Jesukristo.

Alang sa mas manghod nga mga bata: Paghimo og yano nga agianan nga daghan og babag. Praktisa ang pag-agi latas niini! Dayon kuhaa ang mga babag ug sulayi pag-usab. Ipasabot kon giunsa sa Hari sa mga Lamanite pagkuha ang mga babag dihang si Ammon ug ang iyang igsoong mga lalaki gusto nga mosangyaw sa ebanghelyo sa iyang tibuok yuta (Alma 23:3).

Hulyo 15–21

Pagpahinumdom nga mga Lingkoranan sa Musika

Alang sa Alma 30–31

Si Alma mitudlo nga “ang tanan nga mga butang nagpakita nga adunay Dios” (Alma 30:44). Kana nagpasabot nga ang tanan nga gihimo sa Dios makapahinumdom kanato kabahin Kaniya. Pagbutang og mga lingkoranan nga isirkulo nga igo alang sa tanan gawas lang sa usa ka tawo. Hangyoa ang usa ka tawo sa pagpatukar og musika ug sa pagpili kon kanus-a kini pahunongon. Kon ang musika mohunong, ang tanan molingkod sa lingkoranan. Ang tawo nga walay malingkoran mopakigbahin og usa ka butang nga nagpahinumdom kaniya bahin sa Dios. Padayon lang hangtod nga ang tanan makasulay.

Alang sa mas manghod nga mga bata: Lakaw libot sa inyong panimalay o sa gawas. Pangita og mga butang nga nagtabang kaninyo nga mobati og kalipay ug mopahinumdom kaninyo sa Langitnong Amahan.

Hulyo 22–28

Pagpatubo sa Inyong Pagpamatuod

Alang sa Alma 32–35

Si Alma mitudlo nga kon kamo maminaw sa pulong sa Dios ug mobuhat sa mga butang nga mopakita sa inyong hugot nga pagtuo, ang inyong pagpamatuod motubo, sama sa usa ka kahoy (tan-awa sa Alma 32:37). Pagdrowing og mga butang nga inyong mahimo aron matabangan ang usa ka kahoy nga motubo, sama sa pagbubo niini og tubig ug pagsiguro nga mahayagan sa adlaw. Dayon pagdrowing og mga butang nga inyong mahimo sa pagtabang sa inyong pagpamatuod nga motubo, sama sa pag-adto sa Simbahan ug sa pag-ampo.

Alang sa mas manghod nga mga bata: Kantaha ang “Hugot nga Pagtuo” (Songbook sa mga Bata, 50). Samtang manganta mo, paghimo og mga aksiyon aron ipakita ang usa ka liso nga nagtubo nga dako ug taas. Paghisgot bahin sa pagtubo sa inyong pagpamatuod.

Mga Paghulagway pinaagi ni Katy Dockrill