Pagbisita kang Lola ug Lolo

Ni Alelie Camitan-Coronel

(Gibase sa usa ka tinuod nga istorya)

Si Ernesto gusto nga mopakigbahin sa unsay iyang nakat-onan sa Primary.

Kini nga istorya nahitabo sa Indonesia.

Gibutang ni Ernesto sa iyang bag ang lain nga tisirt. Iyang gilibot og tan-aw ang kwarto. Unsa pa man ang kinahanglan niyang dal-on? Iyang nakita ang iyang Basahon ni Mormon diha sa lamesa. Dili gyod mahimong makalimtan niya kana!

Bakasyon kadto atol sa ting-init. Ang pamilya ni Ernesto mobisita nila ni Lola ug Lolo. Naghinamhinam siya nga makita ang iyang mga apohan.

Dihang miabot si Ernesto ug ang iyang pamilya, si Lolo migakos kaniya. “Malipayon kaayo ko nga ania ka!”

“Gimingaw kami nimo!” Mipahiyom si Lola ug migakos usab kang Ernesto.

“Naghulat ug naghulat ko alang niini nga adlawa. Ganahan kaayo mi nga magbisita,” miingon si Ernesto.

“Mangadto ta sa sulod,” miingon si Lolo. “Si Lola maghimo sa tanang paborito nimong pagkaon.”

Si Ernesto misulod sa balay uban nilang Lola ug Lolo. Naghinamhinam na kaayo siyang makauban sila.

Pagkasunod buntag, si Ernesto nahigmata sa kahumot sa kan-on nga giluto. Nakit-an niya si Mama ug Lola nga bisi sa kusina. Gihalokan niya silang duha sa aping. Dayon midagan siya sa nataran.

Si Papa ug si Lolo naglingkod ug nag-istoryahanay sa gawas, nag-inom gamit ang mga tasa.

“Maayong buntag. Ganahan ka ba og tsaa?” Giisa ni Lolo ang iyang tasa ngadto ni Ernesto.

Mitan-aw si Ernesto sa tasa sa tsaa ug dayon ngadto ni Lolo. Gusto niya nga mopakigbahin unsay iyang nakat-onan sa Primary. “Dili ko, salamat, Lolo” miingon siya. “Akong nahibaloan gikan sa akong simbahan nga ang tsaa, kape, ug tabako dili maayo sa atong lawas. Gusto ko nga mosunod sa gusto ni Jesus nga akong buhaton.”

Mipahiyom si Papa. “Ang atong pamilya nagsunod sa Pulong sa Kaalam, apan si Lolo lahi ang gituohan, ug OK lang kana.”

“Salamat sa pagpakigbahin sa unsay inyong gituohan,” miingon si Lolo ngadto kang Ernesto. “Buotan ka nga bata. Mahimo kang moinom og tubig nga init sama sa imong papa.” Nagbubo og usa ka tasa nga tubig gikan sa takori si Lolo alang kang Ernesto.

Si Ernesto mihigop og diyotay. Mibati siya og kalipay sa sulod sa pagpili sa matarong.

Sa tingpaniudto, si Ernesto nakakaon sa iyang paborito nga mga pagkaon. Si Lola naghimo og nasi goreng, usa ka potahe nga dunay kan-on, mga itlog, karne, ug mga utanon. Lami kaayo kini. Ug ganahan si Ernesto nga makig-istorya ni Lola ug ni Lolo samtang mangaon sila.

Sa pagkahapon, ang pamilya magkauban nga nagdula og tago-tago. Gani si Lolo ug si Lola midula!

“Nakit-an ka nako sa likod nianang kahoy, Ernesto!” Si Papa nagtawag, nagdagan padulong niya. Si Ernesto mikatawa samtang misulay sa pagpalayo. Ang pagdula uban sa iyang pamilya makalingaw.

Nianang gabii, ang tanan naglingkod nga nag-alirong kang Lolo samtang nag-istorya siya og pipila ka sugilanon. Pagkahuman ni Lolo, si Ernesto nakahinumdom nga wala pa sila nagbasa sa mga kasulatan.

Milukso si Ernesto. “Mobalik ra dayon ko.”

Midagan siya ug gikuha ang iyang Basahon ni Mormon. Sa pagbalik niya, nangutana siya, “Mahimo ba ta nga magbasa?”

“Nalipay ko nga nakahinumdom ka.” Gikuha ni Mama ang basahon kang Ernesto ug mipakli ngadto sa iyang paborito nga bersikulo. Gibasa niya kini og kusog. Dayon nangluhod silang tanan.

“Gusto ba kamong moapil namo?” Gipangutana ni Ernesto ang iyang mga apohan.

“Oo, nindot kaayo na,” miingon si Lola. Miluhod siya tupad ni Lolo.

Si Papa ang nag-ampo. Nagpasalamat siya sa Langitnong Amahan nga sila nakagahin og panahon isip usa ka pamilya.

Pagkahuman sa pag-ampo, gigakos ni Lolo si Ernesto. “Maayo kay mag-ampo ang inyong pamilya” miingon siya. “Nalipay ko nga gusto ka nga maduol sa Dios. Makatabang kini sa inyong pamilya nga magpabilin nga lig-on.”

Gibati ni Ernesto ang kainit ug kalinaw sa sulod. Gusto niya nga mopakigbahin sa iyang mga gituohan—butang nga iyang ganahan—ngadto nilang Lola ug ni Lolo—mga tawo nga iyang gihigugma.

Mga Paghulagway pinaagi ni Melissa Manwill Kashiwagi