Ang Salida sa Kasulatan

Ni Rebekah Jakeman

(Gibase sa usa ka tinuod nga istorya)

“Unsa kaha kon atong ipagawas ang pang-Dominggo nga kahon?” Nangutana si Jonny.

Kini nga istorya nahitabo sa USA.

“Gilaay man ko.” Si Jonny naghigda sa salog sa sala.

Ang iyang igsoong babaye nga si Jenna naglantaw sa gawas sa bintana. “Walay lain nga mabuhat,” miingon siya.

Mihangad si Jonny sa kisame. Nganong murag ang Dominggo dili man makalingaw?

Dayon duna siyay nahunahunaan. “Unsa kaha kon atong ipagawas ang pang-Dominggo nga kahon?” Nangutana si Jonny. Ang pang-Dominggo nga kahon usa ka espesyal nga kahon nga puno sa mga dula nga dulaon sa Dominggo.

Ang panagway ni Jenna mihayag uban sa pahiyom. “Daw makalingaw kana.”

Batang lalaki ug batang babaye nga nagpagawas og mga dulaan gikan sa kahon

Si Jonny ug si Jenna nagdali og adto sa lawak ni Mama. Ilang giguroy ang dako nga kahon ngadto sa sala.

“Unsay una natong buhaton?” Nangutana si Jonny. Iyang giablihan ang kahon ug nagpagawas og pipila ka libro nga adunay mga litrato ug usa ka dulaanan nga kard.

“Dulaon nato ang dula nga magtukma og bayani sa kasulatan,” miingon si Jenna.

Ang dula adunay mga kard nga naay mga litrato sa mga propeta sa Basahon ni Mormon. Gibutang ni Jenna ang mga kard nga nagkulob sa salog. Nagpuli-puli sila sa pagpili og mga kard ug naningkamot sa pagpangita sa mga nagtukma.

Si Jonny mipunit og duha ka magkalahi nga kard nga anaa si Kapitan Moroni niini. “Nakakita ko og magkatukma!” misinggit siya.

“Ako sab!” Si Jenna miisa og duha ka kard nga nagpakita ni Sariah.

Si Jonny ug si Jenna nagdula pa og pipila ka dugang nga hugna. Makalingaw ang maghunahuna sa ilang paborito nga mga istorya gikan sa Basahon ni Mormon.

Pagka taudtaod miingon si Jenna, “Magbuhat kita og lain na usab.”

“OK. Atong i-aksiyon ang usa sa atong paborito nga mga istorya sa kasulatan. Maghimo kita og salida sa kasulatan!” Si Jonny misugod sa pagpunit sa mga kard.

“Oo!” Si Jenna mitabang sa pagpundok sa gidulaan ug gihipos kini.

Si Jonny nangaykay sa kahon hangtod nga nakakita siya og mga igsusul-ob nga sinina. Mikuha siya og kolor tsokolate nga balhiboon nga kupo ug gisul-ob kini. “Ako si Samuel ang Lamanite!” Milukso siya sa ibabaw sa usa ka lingkoranan ug miaksiyon nga sama ni Samuel, nagtudlo didto sa paril sa siyudad.

Giablihan ni Jenna ang basahon nga adunay mga litrato sa Basahon ni Mormon. Nangita siya sa mga pahina hangtod nga miabot siya sa kang Samuel ang Lamanite. Gibasa niya kini og kusog samtang gi-aksiyon ni Jonny ang istorya.

Gibansay sa mga bata ang istorya sa pipila ka higayon. Mibati si Jonny og kainit ug kalipay sulod sa iyang kasingkasing. Nindot ang bation nga makahinumdom sa mga propeta nga nagtudlo mahitungod ni Jesukristo.

Sa dihang gibati nila nga andam na, giadto ni Jonny si Mama, Papa, ug ang ilang manghod nga igsoong babaye, si Makenna. “Dali tan-awa ang among drama-drama!”

Si Jenna mibarog sa tunga sa lawak nga gituy-od og maayo ang iyang mga kamot. “Welcome sa among salida sa kasulatan. Karon among ipakita ang istorya ni … Samuel ang Lamanite!”

Dayon iyang gisugdan ang istorya. “Dugay na nga panahon ang milabay, usa ka propeta nga ginganlan og Samuel miabot aron sa pagtudlo sa mga Nephite …”

Sa dihang higayon na ni Jonny, mibarog siya sa lingkoranan. Misulti siya sa lanog nga tingog. “Ako si Samuel, ug ang Langitnong Amahan gusto nga kamo mohimo og maayong mga pagpili. Hunong na sa pagbuhat og sayop nga mga butang. Tungod kay sa moabot nga lima ka tuig si Jesukristo matawo.”

Batang lalaki ug batang babaye nga nagkupo, nga ang batang lalaki nagbarog sa lingkoranan

“Ang gahom sa Dios anaa nag-uban ni Samuel,” miingon si Jenna. Iyang gitiwas pagsaysay ang nahibilin sa istorya. Sa dihang nahuman na kini, si Mama, Papa, ug Makenna mipakpak.

“Maayo kaayo kana!” Miingon si Mama.

Si Jonny ug Jenna miyukbo. Dako ang ilang mga pahiyom.

“Maghimo kita og lain pa nga drama-drama,” miingon si Jonny.

“Ganahan kami nga motan-aw og lain pa,” miingon si Mama. Si Makenna mipakpak ug mipahiyom.

Si Jenna ug si Jonny naglumba og adto sa pang-Dominggo nga kahon aron magkuha og dugang igsusul-ob nga mga sinina.

“Makalingaw ang Dominggo! Ganahan ko nga magkat-on mahitungod sa mga kasulatan,” miingon si Jenna.

“Ug ni Jesus.” Mipahiyom si Jonny samtang nakakita siya og lain nga sinina. Ang Dominggo usa gayod ka espesyal nga adlaw!

Mabasa nimo ang mahitungod ni Samuel ang Lamanite diha sa Helaman 16:1–3.

Istorya nga naa sa PDF

Mga paghulagway pinaagi ni Shawna J. C. Tenney