“Ko e Tao Fakatupu Maumaú,” Kaumeʻá, Sepitema 2024, 4–5.
Ko e Tao Fakatupu Maumaú
Naʻe loto-toʻa feʻunga nai ʻa Taniela ke tala ʻa e moʻoní?
Naʻe hoko ʻa e talanoa ko ʻení ʻi USA.
Naʻe fakaava hake ʻe Taniela ʻa e tāpuni ʻo e puha meʻa vaʻinga motuʻa ʻo ʻene kui tangatá peá ne fakasiosio ki loto. Naʻe haʻohaʻo mai hono fanga kāsiní ke nau sio. Naʻa nau manako ke vaʻinga fakataha ʻi he ʻapi ʻo Kulenipaá!
Naʻe lahi ha ngaahi meʻa vaʻinga motuʻa ʻi loto naʻe vaʻinga ai e faʻē mo e tokoua e faʻē ʻa Tanielá ʻi heʻena kei īkí.
“Ko e hā ia?” Naʻe tuhu e kāsini ʻo Taniela ko Noá ki ha ngaahi foʻi tao ngingila motuʻa ʻe ono. Naʻe mata tōtao ʻa e ngaahi muiʻi tafaʻakí mo ha ʻū fuka fakalanulanu—ko e niʻihi naʻe lanu kulokula pea engeenga e niʻihi.
Naʻe toʻo hake ʻe Taniela ha foʻi tao ʻe taha. Naʻá ne pehē ange, “Naʻe talanoa mai ʻeku faʻeé kau ki heni. ʻOkú te fakafuo ha meʻa fuopotopoto he musié ʻi tuʻa. Pea taufetongi leva ʻi hono tolo e fanga kiʻi taó ni ki ʻolunga mo feinga ke nau tō ʻi loto he fuopotopotó.”
Naʻe pehē ange ʻe Noa, “Fakalata!” Kuo ʻosi lele ia ki he loto ʻataʻataá ke fokotuʻutuʻu ʻa e vaʻingá.
Tuaiekemo, kuo tolongi ʻe Taniela mo hono ngaahi kāsiní ʻa e fanga foʻi tao ukameá ki he ʻataá ʻi he loto ʻataʻatā ʻa Kulenipaá. Naʻe saiʻia ʻa Taniela he taimi ne tō mamafa hifo ai mo tuʻu ʻa e taó ʻi he musié.
Naʻe talaange ʻe he kāsini ʻo Taniela ko Lilí, “ʻOku ou tui te u lava ʻo tolo māʻolunga ange ʻeku taó ʻiate koe.”
Naʻe kakata ʻa e fānaú mo tolo ʻenau ʻū taó ʻo fakaʻau ke māʻolunga ange.
Naʻe maʻu leva ʻe Taniela ha foʻi fakakaukau. Naʻá ne talaange, “ʻOku ou tui te u lava ʻo tolo fakalaka atu ʻi he tauʻanga meʻalelé ke tō ki he fuopotopotó!” Naʻá ne lele ki he tafaʻaki ʻe taha ʻo e tauʻanga meʻalelé ʻo tolongi lahi ʻa e foʻi taó.
Naʻe puna māʻolunga ʻa e foʻi taó ki he ʻataá, ka naʻe ʻikai ke tō ia ʻi he musié. Naʻe tō ia ʻi he kā foʻou ʻa ʻAnitī Lopiliní ʻo ongo mai ha PAKIHI leʻolahi.
Naʻe kaila ʻa Noa, “ʻOiauē!”
Naʻe toʻo hake ʻe Taniela ʻa e foʻi taó. Naʻe ʻilonga ha makoko lahi ʻi he kaá ʻi he meʻa naʻe tō aí.
Naʻe fesiofaki ʻa e tamaikí mo ha loto-tailiili. Naʻe ʻikai ke nau toe lea, ka nau tuku ʻa e fanga foʻi taó ʻi he loto ʻataʻataá ka nau lele ki loto.
Kimui ange ʻi he hoʻatā ko iá, naʻe ʻalu e taha kotoa ki heʻenau kaá ke nau foki ki ʻapi. Naʻe fakatokangaʻi ʻe he tokoua e faʻē ʻa Tanielá ʻa e makoko ʻi heʻene kaá. Naʻá ne ʻeke ange, “Ko e hā e meʻa naʻe hokó?”
Naʻe ongoʻi tailiili ʻa Taniela. Ka naʻe ʻikai ke ne foaki ha foʻi lea. Naʻá ne heka pē ki he kaá ʻo taʻataʻalo fakamāvae ki hono ngaahi kāsiní.
ʻI he foki ki ʻapí, naʻe tangutu fakalongolongo pē ʻa Taniela ʻi he sea muí. Naʻá ne feinga ke lau ʻene tohí. Ka naʻe ʻikai lava ke maʻu ʻene tokangá. Naʻá ne ongoʻi puke ʻi he fakakaukau ki he meʻa naʻe hokó. Naʻá ne ʻiloʻi ko e faitotonú ʻa e meʻa ʻoku totonu ke faí. Ka ʻe fakamamahi hono tala ʻa e moʻoní! ʻE ʻita lahi ʻene ongomātuʻá ʻiate ia. ʻE pehē foki mo e tokoua ʻene faʻeé.
Naʻe fakakaukau leva ʻa Taniela ki he moʻungaʻi tangata he folofolá naʻá ne saiʻia aí. Naʻe lī ʻa Taniela ʻi he Fuakava Motuʻá ki he ʻana ʻo e fanga laioné koeʻuhi ko ʻene fili ki he totonú. Naʻá ne loto-toʻa. Mahalo pē ʻe loto-toʻa foki mo Taniela.
Naʻe lea ange ʻa Taniela, “ʻE Mami? Naʻá ku tolongi ha foʻi tao pea tau ia ʻi he kā ʻa ʻAnitī Lopiliní ʻo makoko. Ko e foʻui ia ʻoʻoku.”
Naʻe sio mai ʻa Mami kiate ia ʻi he sioʻatá, ki mui. Naʻe ʻikai ke ne ʻita ʻo hangē ko e meʻa ne fakakaukau ki ai ʻa Tanielá. Naʻá ne talaange, “Fakamālō atu ʻi ho talamai ʻa e moʻoní.”
Naʻe mihi fakamānava loloa ʻa Taniela. Naʻá ne fehuʻi ange, “ʻE lava pē ke u tā kia ʻAnitī Lopilini he tau aʻu ki ʻapí? ʻOku ou fie kole fakamolemole ki ai. Pea te u ngāue mālohi ke maʻu ha paʻanga ke totongi hono fakaleleiʻi ʻene kaá.”
Naʻe malimali ʻa Mami. “Ko ha fakakaukau lelei ia.”
Naʻe mole atu ʻa e ongoʻi halaia ʻa Tanielá, pea ne ongoʻi nonga. Naʻá ne loto-toʻa feʻunga ke tala ʻa e moʻoní. Koeʻuhí ko Sīsū Kalaisi, te ne lava ʻo fakatomala mo fakatonutonu ha ngaahi meʻa.
ʻŪ tā fakatātā ʻa Josh Talbot