Sēini Lau Folofolá

ʻE Lava ke tokoni ʻa e folofolá ke tau ongoʻi ha fiemālie mo ha ʻofa mei heʻetau Tamai Hēvaní. Te ke lava ʻo ngaohi ha sēini folofola ke lau ʻi he taimi te ke ongoʻi hohaʻa pe loto-mamahi aí.

ʻOku ʻi he ngaahi fuo lanu vāletí ha ngaahi veesi folofola ʻe niʻihi te ke lava ʻo fakaʻaongaʻi. Te ke lava foki ʻo tānaki atu hoʻo ngaahi folofola manakó.

Kole ki ha mātuʻa pe taki Palaimeli ke tokoni atu!

Faʻu ha lisi ʻo e ngaahi veesi folofola ʻokú ke manako aí.
ʻI hoʻo folofolá, kumi ʻa e ʻuluaki veesi ʻoku ʻi hoʻo lisí. Fakaʻaongaʻi ha peni kala ke fakaʻilongaʻi fakalelei ʻa e vēsí.
ʻI hono tafaʻakí, tohiʻi hifo ai ha potufolofola (pe fika ʻo e pēsí, kapau ʻoku faingofua ange ia kiate koe) ki he veesi folofola hoko mei hoʻo lisí. ʻAlu leva ki he veesi ko iá pea fakaʻilongaʻi foki ia.
Fakaʻilongaʻi ʻa e ngaahi vēsí mo hikiʻi hifo ʻa e fakamoʻoni fakafolofola ki he potufolofola hokó. ʻI he taimi te ke fakaʻilongaʻi ai ʻa e veesi folofola fakaʻosi ʻi ho lisí, tohiʻi ʻa e fakamoʻoni fakafolofola ki he potufolofola ʻuluaki naʻá ke fakaʻilongaʻí.

Sione 14:27: “ʻOku ou tuku ʻa e melinó kiate kimoutolu, ko ʻeku melinó ʻoku ou foaki kiate kimoutolu: ʻoku ʻikai hangē ko e foaki ʻa māmaní, ʻa ʻeku foaki kiate kimoutolú. ʻOua naʻa mamahi homou lotó, pea ʻoua naʻa manavahē ia.”
Tokāteline mo e Ngaahi Fuakava 68:6: “Ko ia, ke mou fiefia, pea ʻoua ʻe manavahē, he ko au ko e ʻEikí ʻoku ou ʻiate kimoutolu, pea te u tuʻu ʻi homou tafaʻakí.”
Lea Fakatātā 3:5: “Falala [ki he ʻEikí] ʻaki ho lotó kotoa.”
T&F 121:7: “Ke ʻi ho laumālié ʻa e melino; ʻe kiʻi fuofuoloa siʻi pē ʻa hoʻo faingataʻaʻiá pea mo hoʻo ngaahi mamahí.”
T&F 45:62: “He ko e moʻoni ʻoku ou pehē kiate kimoutolu, ʻoku tatali ʻa e ngaahi fuʻu meʻa lalahi kiate kimoutolu.”
Lea Fakatātā 3:24: “ʻO ka ke ka tokoto ki lalo, ʻe ʻikai te ke manavahē: ʻio, te ke tokoto hifo, pea ʻe melie hoʻo mohé kiate koe.”