“Ko e ʻAho Taʻeoli ʻo Petulikí,” Kaumeʻá, Sepitema 2024, 10–11.
Ko e ʻAho Taʻeoli ʻo Petulikí
Naʻe fuʻu femoʻuekina maʻu pē ʻa e ongo taʻokete ʻo Petulikí ke na vaʻinga mo ia.
Naʻe hoko ʻa e talanoa ko ʻení ʻi USA.
Naʻe sio fakamamaʻu ʻa Petuliki ki he ʻaofí lolotonga ʻene tokoto fakaloloa ʻi hono mohengá. Naʻá ne ongoʻi taʻeoliʻia. Kuó ne ʻosi lau ʻene tohi fanga monumanú, punopuna ʻi he tulemipoliní, mo heka pasikala takai ʻi honau feituʻú. Ko e hā nai te ne lava ʻo fai he taimi ní?
Naʻe tuʻu hake ʻa Petuliki ʻo lue ki he loki hono taʻokete ko Tanielá. Naʻe ʻeke ange ʻe Petuliki, “Te ke fie vaʻinga nai mo au?”
Naʻe tali ange ʻe Taniela, “Kātaki he ʻikai te u lava. ʻOku fiemaʻu ke u ako.” Naʻe ʻikai pē ke toʻo ʻene tokangá mei he tohi naʻá ne laú.
Naʻe ongoʻi ʻe Petuliki ʻoku loto-mamahi. Naʻe ako maʻu pē ʻa Taniela. ʻOku ʻikai nai ke lava ia ʻo mālōlō?
Sai pē. Naʻe femoʻuekina ʻa Taniela, ka ʻe lava pē ke kole ʻe Petuliki ki hono taʻokete ʻe taha ko Simioné. Naʻe ʻeke ange ʻe Petuliki, “ʻE lava nai ke ta vaʻinga? ʻOku ou taʻeoliʻia.”
“ʻIkai lava ia he ʻahó ni. Te u ʻalu au mo hoku ngaahi kaungāmeʻá.” Naʻe tui leva ʻe Simione hono sāketí peá ne hū ki tuʻa ʻi he matapā ʻi muʻá.
Naʻe fuʻu ʻita ʻaupito ʻa Petuliki! Naʻe tā vave ange hono mafú. Naʻe fuʻu moʻumoʻua maʻu pē hono ongo taʻoketé, ke vaʻinga mo ia. Naʻá ne lele ki hono lokí ʻo haʻaki mai ʻa e matapaá.
Naʻe fakakaukau ʻa Petuliki, ʻOku ʻikai totonu ia!
Naʻá ne fakapatū hono vaʻé peá ne tokoto loto-mamahi ʻi hono mohengá. Naʻá ne ongoʻi ʻoku maʻu hono fatafatá. Naʻá ne ongoʻi taʻeoliʻia ʻaupito! Ka naʻá ne fuʻu ongoʻi ʻita ʻaupito ke fakakaukau ki ha meʻa ke ne fai.
Naʻá ne manatuʻi leva ha meʻa naʻá ne ako ʻi he akó. Naʻe akoʻi kinautolu ʻe heʻene faiakó, ʻe lava ke tokoni ʻa e mānava lōloá ke nau ongoʻi nonga.
Naʻá ne pehē, “ʻOku faingataʻa ke fakaleleiʻi ha meʻa ʻi he taimi ʻokú te ongoʻi ʻita aí.” Mahalo kapau naʻe ongoʻi nonga ange ʻa Petuliki, ʻe lava ke ne fakakaukau ki ha founga ke fakaleleiʻi ʻaki ʻa e palopalema ʻo ʻene ongoʻi taʻeoliʻiá.
Ko ia naʻe mihiʻi lōloa ʻe Petuliki ʻene mānavá. Peá ne toe mihi. Hili haʻane toutou mihiʻi ʻene mānavá, naʻe ʻikai ke ne toe ongoʻi ʻoku maʻu ʻa hono fatafatá. Ka naʻe ʻikai pē ke ne ʻiloʻi ʻa e meʻa ke faí.
Naʻá ne tangutu hake ʻo sio ki he fakatātā ʻo Sīsū Kalaisí ʻi hono holisí. Ko e hā nai e meʻa ʻokú Ne finangalo ke fai ʻe Petulikí?
Naʻe tūʻulutui hifo ʻa Petuliki. Naʻá ne pehē, “Tamai Hēvani, kātaki ʻo tokoniʻi ʻa Taniela ʻi heʻene ngaahi feinga akó. Tokoniʻi ʻa Simione ke fiefia mo hono ngaahi kaungāmeʻá. Pea tokoniʻi ange muʻa au ke ʻoua te u fuʻu ongoʻi taʻeoliʻiá.”
ʻI he ʻosi e lotu ʻa Petulikí, naʻá ne maʻu ha foʻi fakakaukau. Naʻá ne lele ki he loki ʻo Tanielá.
“Taniela, ʻe lava ke ta vaʻinga fakataha ʻi hoʻo ʻosí?”
Naʻe sio hake ʻa Taniela mei heʻene tohí ki he uasi ʻi he holisí. “Te u lava ʻo kiʻi mālōlō ʻi he ʻosi ha miniti ʻe 30. Pea ta ʻalu leva ki tuʻa. Te ke fie fai ia?”
“ʻIo!” Naʻe malimali ʻa Petuliki peá ne lele foki ki hono lokí. Naʻá ne maʻu ha kiʻi tohi ʻo e fanga monumanú fekauʻaki mo e taiká naʻá ne saiʻia ke sio ki ai. Hili ʻene lau ia ʻi ha kiʻi taimi siʻi, naʻá ne vaʻinga ʻaki ha ʻū poloka. Naʻe ʻikai fuʻu fuoloa, kuó na hū atu mo Taniela ʻo ʻalu ki he vaoʻakau ofi ki honau ʻapí.
Naʻe ʻeke ange ʻe Taniela, “Te ke fie vaʻinga tau ʻi he vavaá pe vaiʻinga ko ha ongo tangata fekumi ʻi he vaotaá?”
Naʻe talaange ʻe Petuliki, “Faʻahinga meʻa pē. ʻOku ou fiefia pē au he lava ke ta feohi fakatahá. ʻOku laka ange ia ʻi he ongoʻi taʻeoliʻiá.”
Naʻe mamali ʻa Taniela. “ʻOku fakafiefia ange ʻa e vaʻinga mo koé ʻi he ako ki ha siví.”
Naʻe ongoʻi fiefia ʻa Petuliki ʻi heʻene totolo mo Taniela ʻi he musié. Kuo tokoni ʻa ʻene ongoʻi nongá ke ne fakakaukau lelei ange ai kae lava ke ne fakaleleiʻi ʻene ngaahi palopalemá. Pea kuo tokoniʻi ia ʻe he Tamai Hēvaní ke ne hoko ʻo hangē ange ko Sīsū Kalaisí. Naʻe hoko ia ko ha ʻaho lelei moʻoni.
ʻŪ tā fakatātā ʻa Linh My Nyguyen