“Ko e Polōseki Saienisí,” Kaumeʻá, Sepitema 2024, 18–19.
Ko e Polōseki Saienisí
“ʻOku finangalo ʻa e Tamai Hēvaní ke tau feinga pē.”
Naʻe hoko ʻa e talanoa ko ʻení ʻi USA.
Naʻe huaʻi ʻe Peletilī ha ipu ʻoneʻone ʻe taha ki heʻene kané. ʻE fiemaʻu haʻane ʻoneʻone lahi!
Naʻe vave ke fai ʻa e polokalama fakaʻaliʻali saienisi ʻenau akó. Naʻe faʻu ʻe Peletilī ha fakatātā ʻoku ʻasi ai e anga ʻo e hoko ʻa e peau kulá. Naʻá ne ako ko e peau kulá ko ha peau lahi ʻoku fakatupu ʻe ha mofuike ʻi he tahí. Naʻá ne fiemaʻu ke ʻoua fakaʻofoʻofa ʻene polōsekí. Mahalo pē te ne maʻu ha pale!
ʻI he taimi naʻe fonu ai e kane ʻa Peletilií, naʻá ne tānaki ha fanga kiʻi vaʻakau. Naʻá ne maʻu leva ha kiʻi puha pelesitiki mo ha fanga kiʻi fale meʻavaʻinga ʻi he konga ki lalo ʻo e falé.
Naʻe lingi ʻe Peletilī ʻa e ʻoneʻoné ki he loto puhá ke faʻu ʻaki ʻa e fonuá. Naʻá ne fokotuʻu fakalelei ʻa e fanga kiʻi falé mo e ʻuluʻakaú. Naʻe hoko mai leva ʻa e konga fakafiefiá—ʻa e vaí! ʻI he taimi pē naʻá ne huaʻi hifo aí, naʻá ne lava ʻo teke ha laʻipepa fefeka ʻi he vaí ke faʻu ʻaki e peaú.
Ka naʻá ne fai ha fehalaaki lahi. Naʻe fuʻu lahi ʻa e vai naʻá ne lingí! Naʻe tāfea ʻa e fanga kiʻi falé—kuo teʻeki ai ke ne faʻu ʻa e foʻi peaú. Naʻe ʻasi pelepela mo matolu ʻa e ʻoneʻone vivikú.
Naʻe ui atu ʻa Peletilī ki heʻene faʻeé ki peito. “Ko e hā e meʻa te u fai he taimi ní? Naʻe fuʻu lahi e vai ne u lingí.”
Naʻe talanage ʻe Mami, “Sai pē ia. Toe kamata foʻou pē. Ta ngāue fakataha ʻo fua ha meʻi vai siʻisiʻi pē he taimi ʻe taha.”
“ʻIo.” Naʻe punou pē ʻulu ʻo Peletilií ʻi heʻene loto-mamahí peá ne ʻalu ki tuʻa ke toe tānaki mai ha ʻoneʻone lahi ange.
ʻI he taimi ko ʻení, naʻá na fua ʻa e lahi totonu ʻo e vaí pea lingi ki loto. Naʻe ʻunuakiʻi ʻe Peletilī ʻa e pepa fefeká peá ne sio ki he fasi ʻa e peaú ʻi he ʻoneʻoné. Ne ola lelei ia!
Naʻe hoko atu leva ʻa e ngāue ʻa Peletilī mo Mami ki heʻene pousitaá. Naʻá ne kamata tohi ha ngaahi moʻoniʻi meʻa fakafiefia fekauʻaki mo e peau kulá. Ka naʻe ʻikai hao e ngaahi foʻi leá ʻi he pēsí.
Naʻe talaange ʻe Peletilī, “ʻOku ʻikai ke u toe fie tohi foʻou ia ʻe au!” Naʻe kamata ke langa hono ʻulú.
Naʻe talaange ʻe Mami, “ʻOku ʻikai fiemaʻu ia ke ta toe tohi kotoa ia. Te ta lava pē ʻo toe fakalea foʻou ke hao ʻi he pēsí.”
Naʻe māpuhoi ʻa Peletilī. Naʻe ʻikai tatau ʻa e pousitaá mo e meʻa naʻá ne fakaʻamu ki aí. “ʻOku ʻikai ke u fie ʻai ia ʻe au. ʻE ʻasi palakū ia kapau he ʻikai hao lelei kotoa e ngaahi foʻi leá.”
“ʻOku malava pē ke faingataʻa ʻa e aká.” Naʻe fāʻofua ange ʻa Mami kiate ia. “Taimi ʻe niʻihi ʻoku tau fai ha ngaahi fehalaaki. Ka ko e meʻa mahuʻingá ke ʻoua naʻa tau foʻi. ʻOku finangalo e Tamai Hēvaní ke tau kei feinga pē. Ta kiʻi mālōlō leva ka ta toki fakaʻosi ʻi he pongipongí.”
ʻI he pongipongi hono hokó, naʻa na fakaʻosi ʻene pousitaá. Naʻe ʻikai ke haohaoa, ka naʻe kiʻi ongoʻi sai ange ʻa Peletilī.
Ne faifai pea aʻu ki he ʻaho ʻo e polokalama saienisí. Naʻe ʻave ʻe Mami ʻa Peletilī ki he akó. Naʻá ne talaange, “Manatuʻi, naʻá ke ngāue mālohi ʻi hoʻo polōsekí mo ako ha meʻa lahi. Pea ko e meʻa ia ʻoku mahuʻingá.”
Naʻe toʻotoʻo atu ʻe Peletilī ʻene polōsekí ki he fale faiʻanga vaʻingá. Naʻe fonu ai ha ʻū polōseki mo ha ʻū pousitā. Naʻe tangutu kotoa ʻa e fānau ako kalasi faá ʻo tatali ki honau taimi ke fakaʻaliʻali ai ʻenau polōsekí.
Ne ʻikai fuoloa kuo hokosia e taimi ʻo Peletilií. Naʻe tā vave hono mafú ʻi heʻene lue atu ki muʻá. Fēfē kapau ʻe fehālaaki e meʻa kotoa?
Naʻe tekeʻi atu ʻe Peletilī ʻa e pepa fefeká ʻi he vaí peá ne fakaʻaliʻali ki he kau fakamāú ʻa e founga naʻe fasi ai ʻa e ngaahi peaú ʻi he fonuá.
Naʻe fehuʻi ange ʻe ha taha ʻo e kau fakamāú, “Ko e hā e meʻa ʻokú ne fakatupunga e peau lalahi ko iá ʻi he ʻōsení?”
“ʻOku fakatupu ʻa e ngaahi peau lalahi ko iá ʻe he …” Naʻe hē ʻa e fakakaukau ʻa Peletilií. “ʻOku ʻikai ke u manatuʻi. Ka te u lava ʻo tala atu ha ngaahi moʻoniʻi meʻa fakafiefia fekauʻaki mo e peau kulá.” Naʻá ne lau kiate kinautolu ʻa e ngaahi moʻoniʻi meʻa ʻi heʻene pousitaá.
ʻI he tuku ʻa e akó, naʻe heka hake ʻa Peletilī ki he kaá mo ʻene polōsekí.
Naʻe fehuʻi ange ʻe Mami, “Naʻe fēfē?”
Naʻe malimali ange ʻa Peletilī, “Naʻe ʻikai ko e meʻa tonu ia ne u fiemaʻú. Ka naʻá ku fai hoku lelei tahá peá u kei feinga pē.”
Ngaahi tā fakatātā ʻa Adam Koford