“Ko e Poupou ki he Ongo Timí Fakatouʻosi,” Kaumeʻá, Sepitema 2024, 30–31.
Ko e Poupou ki he Ongo Timí Fakatouʻosi
Naʻe fakafulofula ʻa Sēini. Naʻe ʻikai ke ne loto ke ikuna e timi ʻe tahá!
Naʻe hoko ʻa e talanoa ko ʻení ʻi Kōlea Tonga.
Naʻe kai fakaʻosi ʻe Sēini ʻene nūtoló. Mmmm. Ifo!
Naʻe talaange ʻe faʻētangata Sīhoa. “Ta vaʻinga Yut Nori!”
Ko hono taimí ʻeni! Naʻe fakafiefiaʻi ʻe hono fāmilí ʻa e Chuseok, ko e Fakafetaʻi Faka-Kōleá. Kuo fakatahataha mai e fāmili ʻo Sēiní ke nau maʻu ha meʻatokoni lahi mo vaʻinga Yut Nori fakataha. Ko e Yut Nori, ko e vaʻinga ia ʻoku saiʻia taha ai ʻa Sēiní.
Naʻe tangutu fuopotopoto ʻa e tokotaha kotoa pē ʻi he falikí. Naʻe sio takai holo ʻa Sēini. Ko e hā e timi naʻá ne fie kau ki aí? Naʻá ne ʻunu atu ʻo tangutu he tafaʻaki ʻo ʻene faʻētangata ko Sīhoá. Naʻá ne talaange, “ʻOku ou fie kau ki hoʻo timí! Te tau ikuna kafakafa!”
Naʻe kata ʻa faʻētangata Sīhoa. “ʻOku lahi hotau faingamālie ke ikuná, ʻi hoʻo kau maí!”
Naʻe fokotuʻu ʻe he faʻē ʻa Sēiní ʻa e papa vaʻingá ʻi lotomālie he siakalé. Naʻe tokoni ʻa Sēini ke ne fokotuʻutuʻu ʻa e ʻū kongokongá. Naʻa nau paasi ʻa e vaʻakau ʻe faá ki he timi ʻe ʻuluaki vaʻingá.
Naʻe ʻuluaki kamata ʻa e kāsini ʻo Sēini ko ʻAná. Naʻá ne lī ʻa e vaʻakaú ki he ʻataá. Naʻe fakahaaʻi ʻe he anga e tō ʻa e ʻū vaʻakaú, ʻa e lahi ʻo e ngaʻunu ʻa e timi ko iá ʻi he papa vaʻingá. Naʻe foʻohifo kotoa ʻa e ʻū vaʻakau ʻe faá ki lalo, ʻa ia ʻoku ʻuhinga ia ʻoku maʻu ʻe ʻAna ha Yut! Naʻe pau ke ne ueʻi ki muʻa e pate ʻa ʻene timí tuʻo fā pea toe lī pē.
Ka naʻe ʻikai kau ʻa ʻAna ʻi he timi ʻa Sēiní.
Naʻe kūnima ʻa Sēini mo fakafulofula. Naʻá ne fanafana kia faʻētangata Sīhoa, “Naʻá ku fakaʻamu he ʻikai sai ʻene lií.”
Naʻe talaange ʻe faʻētangata Sīhoa, “Fiefia pē! Ko e toki kamata pē ʻeni ʻa e vaʻingá.” Naʻá ne malimali fakalotolahi kia [Sēini].
Hili e vaʻinga tuʻo ua ʻa ʻAná, naʻe lī leva ʻe he timi ʻa Sēiní ʻa e ʻū vaʻakaú. Ka naʻe ʻikai ke nau lava ʻo ueʻi ʻenau paté ke ofi hangē ko e timi ʻa ʻAná.
ʻI he takai kotoa pē, naʻe fiefia mo kakata e kau mēmipa ʻo e fāmili ʻo Sēiní. Naʻe sio ʻa Sēini ki he ngaʻunu takai ʻa e fanga kiʻi pate vaʻingá ʻi he papá. Naʻe fiefia ʻa e tokotaha kotoa pē.
Tukukehe pē ʻa Sēini. Naʻe kei foʻi pē ʻene timí.
Naʻe faifai pea hokosia e taimi vaʻinga ʻo Sēiní. Naʻá ne lī ʻa e vaʻakaú ki ʻolunga, ka ko e vaʻakau pē ʻe taha naʻe tō foʻohifó. Naʻe ʻunu ki muʻa ʻa e pate ʻene timí ʻaki ha foʻi ʻunu pē ʻe taha.
Na‘e kūnima ʻa Sēini. Naʻá ne kaila, “He ʻikai ke u toe vaʻinga au! Naʻá ku loto ke mau mālohi.”
Fakafokifā pē kuo fakalongolongo e taha kotoa. ʻI heʻene hanga haké, naʻe siofi ia ʻe hono fāmilí. Naʻa nau ʻohovale ʻi heʻene fuʻu ʻitá.
Naʻe kula mumū e fofonga ʻo Sēiní. Naʻá ne ongoʻi halaia ʻi he ʻikai ke ne fiefia maʻa hono fāmilí. Naʻe ʻikai ke ne faʻa ʻita. Naʻá ne tuʻu hake ke mavahe mei he siakalé.
Naʻe mafao atu e nima ʻo ʻene faʻētangata ko Sīhoá. Naʻá ne talaange, “ʻOku ʻikai fiemaʻu ke ke mavahe. ʻOku ʻikai ko e meʻa mahuʻingá ʻa e ikuná. Feinga pē ke ke fiefia.”
“ʻIo.” Naʻe tangutu hifo leva ʻa Sēini. Naʻá ne fiemaʻu ke fiefia ʻo hangē ko e niʻihi kehé. Naʻá ne mihiʻi ʻene mānavá peá ne sio ki hono kāsini ko Pení ʻi heʻene lī ʻa e ʻū vaʻakaú.
Naʻe pehē ʻe faʻētangata Sīhoa. “Tōatu Peni!” Naʻá ne ongo fiefia.
Naʻe sio ʻa Sēini ki heʻene faʻētangata ko Sīhoá mo e ʻohovalé. Naʻá ne poupou ki he timi ʻe tahá! Mahalo ko e ʻuhinga ia naʻá ne fuʻu fiefia lahi aí.
ʻI he kamata e takai hono hokó, naʻe fili ʻa Sēini ke poupou ki he tokotaha kotoa ʻi he ongo timí fakatouʻosi. Naʻe moʻoni ʻa faʻētangata Sīhoa. Naʻe ʻikai ko e meʻa mahuʻingá ʻa e ikuná. ʻE lava ke tokoniʻi ia ʻe Sīsū ke ne fiefia maʻá e kau mēmipa hono fāmilí neongo kapau ʻe foʻi ia.
ʻI he toe hoko mai e taimi ʻo ʻAná, naʻe malimali atu ʻa Sēini kiate ia. “Talamonū atu! Te ke lavaʻi ʻeni.”
Naʻe malimali mai ʻa ʻAna mei he tafaʻaki ʻe taha ʻo e siakalé. Naʻe ongoʻi loto-māfana ʻa Sēini. Kuó ne ʻosi ongoʻi ha fiefia lahi ange!
Tā fakatātaaʻi ʻe Uran Duo