ʻOku Fakafiefia ʻa e Fakatomalá!

Fai ʻe Palesiteni Dallin H. Oaks

Tokoni ʻUluaki ʻi he Kau Palesitenisī ʻUluakí

Toʻo mei he “Maʻa he Fakatomalá,” Liahona, Mē 2019, 91–94.

Ko ha fiefiaʻanga ʻa e fakatomalá. Ko ha konga mahuʻinga ia ʻo e palani ʻa e Tamai Hēvaní. ʻOku fiemaʻu ke tau fakatomala kotoa.

Ke fakatomalá, kuo pau ke tau kamata ʻaki ha tui kia Sīsū Kalaisi. Kuo pau ke tau siʻaki mo vete ʻetau ngaahi angahalá. ʻOku ʻuhinga ʻeni ke ʻiloʻi naʻa tau fai ha hala, kole fakamolemole kiate kinautolu ne tau fakamamahiʻí, pea fili ke fai ha ngaahi fili lelei ange. ʻOku totonu foki ke tau maʻu ʻa e sākalamēnití ʻi he ʻaho Sāpate kotoa.

ʻI he taimi ʻoku tau fakatomala aí, te tau maʻa. ʻOku talaʻofa mai ʻe he ʻEikí, “ʻe ʻikai te [Ne] toe manatu ki [heʻetau ngaahi angahalá]” (Tokāteline mo e Ngaahi Fuakava 58:42). Ko ha talaʻofa nāunauʻia moʻoni! Ko ha mana fakaofo ia! He toki tāpuaki moʻoni ʻeni!

ʻOku fakamafao mai ʻe hotau Fakamoʻui ʻofá ʻa Hono toʻukupú ke maʻu ʻa kinautolu kotoa pē ʻoku fakatomala pea muimui kiate Iá.

Toe Maʻa

Fakahoko ʻa e ʻekitivitī ko ʻení ke tokoni atu ke ke ako fekauʻaki mo e fakatomalá.

Fakafonu ha hina maʻa ʻaki ha vai. Pea laku leva ha fanga foʻi maka mo ha kelekele ki he vaí. ‘Oku fakafofongaʻi ʻe he meʻá ni e ngaahi fili hala ʻoku tau fakahokó.
Ke tau toe maʻá, ʻoku fiemaʻu ke taʻofi ʻetau fai ʻa e meʻa ʻoku halá. Ke fakafofongaʻi ʻení, toʻo ʻa e ngaahi foʻi maká mei he loto hiná. ʻOku fōtunga fēfē ʻa e vaí he taimí ni? ʻOku kei ʻuli pē?
Ke fakatomala kakató, ʻoku tau fiemaʻu ʻa Sīsū Kalaisi. ʻOku fiemaʻu ke tau tui kiate Ia mo ʻEne Fakaleleí. Puke ʻa e hina vaí ʻi ha loto pēsoni fanofano. Fakalele ʻa e vaí ki he loto hiná kae ʻoua kuo tafe kotoa ʻa e vai ʻulí ki tuʻa! ʻOku fakafofongaʻi ʻe he meʻá ni ʻa e mālohi ʻoku maʻu ʻe Sīsū Kalaisi ke tokoniʻi kitautolu ke tau maʻá.