Tohi ʻe Koe

ʻŪ Matalaʻiʻakau maʻa Hoku Kaungāʻapí

Fai ʻe Pita E., taʻu 10, ʻIutā, USA

ʻI he ngaahi taʻu siʻi kuo hilí, ne mālōlō ai e husepāniti hoku kaungāʻapí. Naʻá ne loto-mamahi ʻaupito.

Naʻá ku ʻiloʻi ʻa e ongo ʻoku maʻu ʻi he mole ha taha ʻokú ke ʻofa aí. Naʻe mālōlō ʻeku fineʻeikí ʻi hoku taʻu tolú. Hili ʻene mālōloó, naʻe hiki ʻe he fānau ʻi homau kaungāʻapí ha fanga kiʻi tohi kiate au mo hoku tokouá pea teuteuʻi homau ʻapí ʻaki ha ngaahi meʻa vaʻinga. Naʻá ku fie fai ha meʻa lelei tatau maʻa hoku kaungāʻapí.

Naʻá ku lotua ke ʻiloʻi e meʻa te u lava ʻo fai ke tokoní. Naʻe haʻu ki hoku ʻatamaí ʻa e fakakaukau ke ʻoange haʻane matalaʻiʻakau ʻi he ʻAho Valenitainé. Ka neongo ia, naʻe fiemaʻu ke u ngāueʻi ha paʻanga ke fakatau ʻaki e ʻū matalaʻiʻakaú. Naʻá ku fokotuʻu ia ko ha taumuʻa ʻi heʻeku Tohi Fakahinohino maʻá e Fānaú ke feinga ke maʻu ha paʻanga.

Naʻá ku maʻu ʻa e paʻangá ʻaki ʻeku fai ha ngaahi ngāue kehekehe maʻá e niʻihi kehé. Naʻe totongiʻi au heʻeku kui fefiné ke fakamaʻa ʻene ngoué mo e laʻiʻakau ʻi hono loto ʻataʻataá. ʻI ʻapí, ne u maʻu ha paʻanga ʻi hono taʻaki ʻa e vao ʻi mui ʻi homau kiʻi fale meʻangāué. Naʻe lau māhina ʻa e ngāue mālohi ke maʻu ha paʻanga feʻungá.

Fāifai peá u maʻu ha paʻanga feʻunga ke ʻalu ki ha falekoloa ʻo fakatau mai ʻa e ʻū matalaʻiʻakaú. Naʻe hokosia e ʻAho Valenitainé, peá u ʻoange ki hoku kaungāʻapí ʻa e ʻū matalaʻiʻakaú mo ha kiʻi tohi. Naʻá ne fuʻu fiefia ʻaupito. Naʻá ku ongoʻi māfana mo fiefia foki. Naʻá ku fakamālō ki he Tamai Hēvaní ʻi hono tokoniʻi au ke u fai ʻa e meʻa naʻá Ne finangalo ke u faí.

Tā fakatātā ʻa Dave Klüg