“Ko ha Fepōtalanoaʻaki mo Teanikumi fekauʻaki mo e Folofolá,” Kaumeʻá, Sepitema 2024, 40–41.

Ko ha Fepōtalanoaʻaki mo Teanikumi fekauʻaki mo e Folofolá

Ko Teanikumí mei Fisi. Naʻa mau ʻeke ange ha ngaahi fehuʻi fekauʻaki mo e founga naʻá ne ako ai mei he Tohi ʻa Molomoná.

Fakamatala fekauʻaki mo koe.

ʻOku ou taʻu hiva pea ko e siʻi taha au ʻi ha fānau ʻe toko ono. Ko e lanu ʻoku ou manako aí ko e lanu kulokulá, pea ko ʻeku meʻakai manakó ko e kale moa mo e laise. ʻOku ou manako ʻi he ʻakapulú! Ko e meʻa ʻoku makehe fekauʻaki mo aú, ko hoku hingoá. Ko hoku hingoa ʻuluakí mei ha taha ʻo e kau tau ʻi he Tohi ʻa Molomoná, ko hoku hingoa hono uá mei heʻeku faʻētangata ʻi Naisīliá, pea ko hoku hingoa fakaʻosí ʻoku Fakafisi.

Ko e hā ha meʻa ʻoku tokoni ke ke ako ai mei he folofolá?

ʻOku ou saiʻia ke lau ʻa e folofolá mo hoku fāmilí. ʻOku mau ako fakataha mei he ngaahi lēsoni Haʻu, ʻo Muimui ʻIate Aú. ʻOku ou saiʻia ke ako ha ngaahi talanoa foʻou he uike takitaha. ʻOku mau talanoa ki he meʻa ʻoku mau akó mo fevahevaheʻaki ʻemau fakamoʻoní. ʻI he taimi ʻoku ou lau ai e folofolá, ʻoku ou toe saiʻia foki ke fakakaukauloto ʻoku ou kau ʻi he ngaahi talanoá.

ʻOku tokoniʻi fēfē nai koe ʻe he folofolá?

ʻOku fakamanatu mai ʻe he folofolá ke u loto-toʻa mo loto-lahi pea lotua ha fakafiemālie. ʻI he taimi kotoa pē ʻoku ou ilifia pe taʻelata aí, ʻoku ou ʻiloʻi ʻe fakafiemālieʻi maʻu pē au ʻe he Laumālie Māʻoniʻoní.

Ko e hā ʻa e talanoa ʻokú ke saiʻia taha ai ʻi he Tohi ʻa Molomoná?

Ko e talanoa ʻoku ou manako taha ai mei he Tohi ʻa Molomoná ko e talanoa fekauʻaki mo Teanikumí koeʻuhí he ko ha taki mo ha tangata tau maʻongoʻonga ia. Naʻá ne tau maʻa hono fāmilí, ko hono ngaahi kaungāmeʻá, pea mo e Siasí. ʻOku ou ʻiloʻi te u lava foki ʻo hangē ko iá mo taukapoʻi maʻu pē ʻa e meʻa ʻoku ou ʻofa taha aí.

Ko e hā ha faleʻi te ke fai ki ha taha ʻoku faingataʻa ke mahino ki ai ʻa e folofolá?

Kapau ʻoku faingataʻaʻia ha taha ke ako mei he folofolá, te nau lava ʻo kole ki heʻenau faʻeé pe tamaí pe naʻa mo e niʻihi ʻi heʻenau fānaú ke tokoniʻi kinautolu. ʻOku tokoniʻi moʻoni au ʻe hoku fāmilí. Te ke lava foki ʻo kole ki ha faiako Palaimeli pe taki ʻi he siasí!