Ko Hai Moʻoni Koe

Fai ‘e ʻEletā Kevin W. Pearson

ʻO e Kau Fitungofulú

Mei ha ʻinitaviu mo ʻOlivia Kitameni mo Taiana ʻEvelini Nilasoni.

ʻOku ʻofa ʻa e Tamai Hēvaní ʻiate kitautolu. ʻOkú Ne finangalo ke tokoniʻi kitautolu ke tau ʻiloʻi ko hai kitautolu. Naʻá Ne fakatupu hotau laumālié kimuʻa pea tau toki haʻu ʻo nofo ʻi he māmaní. Ko ha ngaahi foha mo ha ngaahi ʻofefine kitautolu ʻo e ʻOtuá.

Mahalo te tau ongoʻi tuenoa he taimi ʻe niʻihi pe hohaʻa he ʻikai ha taimi te tau teitei feʻunga ai. ʻOku ʻafioʻi moʻoni ʻe Sīsū Kalaisi ʻa e ongo ʻoku tau maʻú. Te Ne tokoniʻi kitautolu ke tau ikunaʻi ha faʻahinga faingataʻa pē. ʻE lava ke tokoniʻi kitautolu ʻe he ngaahi meʻa faingataʻa ʻoku tau fehangahangai mo ia ʻi he moʻui ko ʻení, ke tau hoko ʻo hangē ko Sīsū Kalaisí ʻo kapau te tau tafoki kiate Ia.

ʻOku tokoniʻi kitautolu ʻe he ongoongoleleí ke tau vakai kiate kitautolu ʻo hangē ko e ʻafio mai ʻa e Tamai Hēvaní kiate kitautolú. ʻE lava ke hoko hotau ngaahi ʻahiʻahí ko ha ngaahi tāpuaki ʻo fakafou ʻi heʻetau tui kia Sīsū Kalaisí. ʻI hoʻo ʻiloʻi ko hai koé mo e founga ʻoku ʻafioʻi ai koe ʻe he ʻOtuá, te ke tāpuekina ha taha ʻi ha faʻahinga taʻu pē!

ʻI he fakaʻau ke mahino kiate kitautolu ko e fānau kitautolu ʻa e ʻOtuá, te tau lava leva ʻo tokanga taha ki he tuʻunga ʻoku finangalo ʻa e Tamai Hēvaní ke tau aʻusiá. Te tau fehangahangai fakataha mo Ia ʻi hotau ngaahi faingataʻaʻiá. Neongo ʻoku ʻikai ke tau haohaoa pea te tau fai ha ngaahi fehalaaki, ka te tau lava ʻo maʻu ha ʻamanaki lelei ʻi heʻetau ʻiloʻi ko e fānau kitautolu ʻa e ʻOtuá.

Kumi ʻa e Ngaahi Meʻa Manakó

ʻOku tau kehekehe kotoa pē. ʻOku kehekehe hotau ngaahi talēnití, manakó, mo e meʻa ʻoku tau fehiʻa aí. Ka ko e fānau kotoa kitautolu ʻa e ʻOtuá!

Fakaʻaongaʻi e fanga kiʻi fakaʻilonga tokoní ke fakafonu ʻaki e sātí pea kumi e meʻa ʻoku manako ai ʻa e kaungāmeʻa takitaha ko ʻení. Kiʻi tokoní: Tohiʻi ʻa e X ʻi he meʻa ʻokú ke ʻilo ʻoku ʻikai moʻoní. Kuo ‘osi fai ‘a e ‘uluakí maʻau. Ko hoʻo ʻosí pē, ʻoku totonu ke ʻi he kōlomu takitaha ha foʻi tapafā ʻatā ʻe taha!

Ko e tokotaha tā pianó ʻoku ʻikai ko ʻAmela pe ko Seiti.
ʻOku ʻikai saiʻia ʻa Mākisi he fiká.
ʻOku ʻikai ha taha ʻi he fānau tangatá te ne tā ha meʻalea pe kalate.
Ko e taʻahine ʻoku saiʻia he fanga monumanú ʻoku ʻikai ko ʻAmela.
Ko Kai pē ʻoku saiʻia he pasiketipoló.