Hello gikan sa Dominican Republic!

Pagkat-on mahitungod sa mga anak sa Langitnong Amahan sa tibuok kalibotan.

Ang Dominican Republic usa ka isla nga anaa sa Caribbean. Hapit sa 11 ka milyon ka tawo ang nagpuyo didto.

Pinulongan

Ang opisyal nga pinulongan sa Dominican Republic mao ang Kinatsila.

Buenos días!

Nagpasabot kana og “maayong buntag” sa Kinatsila!

Unang Templo sa Caribbean

Usa ka templo ang nakompleto sa kapital nga siyudad, sa Santo Dominggo, sa tuig 2000. Mao kadto ang una nga gitukod sa dapit sa Caribbean!

Usa ka Talagsaon nga Bandila

Ang bandila sa Dominican Republic mao lamang ang bandila sa nasod nga adunay Biblia niini. Ang Biblia anaa sa tunga sa bandila.

Humpback nga Balyena

Liboan ka humpback nga balyena ang molangoy padulong sa baybayon sa Dominican Republic matag tuig. Ang init-init nga tubig perpekto nga dapit alang kanila nga manganak.

Kalihokan

Paglingaw sa Baseball

Ang baseball mao ang labing ilado nga esport sa Dominican Republic! Ania ang yano nga paagi sa pagdula. Pagbutang og tulo ka timaan sa dako nga trayanggulo nga porma. Barog diha sa una samtang ang usa ka higala molabay og gamay nga bola padulong nimo. Paggamit og stick o bat aron sa pagsulay og igo sa bola ug dayon dagan padulong sa sunod nga timaan. Makadagan ka ba palibot sa tibuok trayanggulo sa dili ka pa madakpan sa imong higala?

Risipi

Ensalada Verde (Berde nga Salad)

Kini usa ka komon nga salad sa Dominican Republic. Aniay usa ka bersiyon nga mahimo nimong sulayan!

1. Hugasi ang 4 ka tasa (946 ml) nga petsay, 1 ka tasa (237 ml) nga repolyo, 1 ka tamatis, 1 ka pipino, ug 2 ka karot.

2. Paniti ang mga karot ug mga pipino kauban sa 2 ka abokado. Dayon hiwaa ang tanan nga sagol ug ibutang kini sa panaksan.

3. Sa lain nga sudlanan, pagbutang og 6 ka kutsara (88ml) nga olive oil, 3 ka kutsara (44ml) nga suka, ug 1 ka kutsara (5ml) nga asin. Uyoga og maayo ug ibubo sa salad. Dugangi og pepper aron sa pagtimpla.

Seguroha nga makapangayo og tabang sa usa ka hamtong!

Mga paghulagway ni Stephanie Mackay