Pagkat-on sa Pag-ampo

Ni Elder Michael A. Dunn

Sa Seventy

Gikan sa usa ka interbiyo uban ni Rebekah Jakeman ug Bradley Salmond III.

Niadtong bata pa ko, ang akong pamilya miadto og simbahan. Apan wala ako tudloi sa pag-ampo. Nakakat-on ko sa pag-ampo pinaagi sa pagpaminaw sa pag-ampo sa akong mga apohan.

Ang akong mga ginikanan nagdiborsyo niadtong gamay pa ko. Ang akong mga apohan kasagaran mangimbitar sa akong mama, akong mga igsoon, ug nako og panihapon sa Dominggo. Ganahan ko maminaw sa akong lola ug lolo nga mag-ampo sa dili pa mangaon. Ang ilang mga pag-ampo naghatag nako og usa ka mainit nga pagbati sa sulod.

Nahinumdom ko usa ka gabii niadtong mga singko anyos pa ko. Gusto kong mag-ampo sa Langitnong Amahan. Usahay ang mga butang nga akong nakat-onan bahin sa Dios lisod nga masabot. Apan nasayod ko nga tinuod Siya. Mao nga nag-ampo ko ngadto Niya. Nagpasalamat ko Niya sa akong mga panalangin ug naghangyo sa unsay akong gikinahanglan. Gibati nako ang kalig-on ug kalipay tungod kay nasayod ko nga gihigugma ko sa Langitnong Amahan.

Paglabay sa katuigan, nakakat-on ko mahitungod sa Ang Simbahan ni Jesukristo sa mga Santos sa Ulahing mga Adlaw. Gitudloan ko sa mga misyonaryo og dugang mahitungod sa Langitnong Amahan ug sa pag-ampo. Nasayod ko nga unsay ilang gisulti tinuod. Nabunyagan ko.

Hinaot nga motukod mo og relasyon sa Langitnong Amahan ug masayod nga Siya tinuod. Siya nakaila ninyo ug naminaw ninyo kon mag-ampo mo. Ang pagkasayod kon si kinsa kamo ug kinsa ang Langitnong Amahan motabang ninyo sa pagbati sa Iyang gugma.

Unsaon Nako Pag-ampo

Mahimo kang mag-ampo bisan kanus-a, bisan asa, ug ang Langitnong Amahan maminaw kanunay. Sunda ang mga pag-aghat aron sa pagdrowing ug pagsulat kon sa unsang paagi ang pag-ampo nagtabang nimo.

Asa mo ganahan nga mag-ampo?

Unsa ang inyong bation kon kamo mag-ampo?