“Ang Mapinanggaon nga mga Awit ni Macy,” Higala, Oktubre 2024, 14–15.
Ang Mapinanggaon nga mga Awit ni Macy
“Bisan gamay ka,” si G-pop miingon, “ikaw adunay dako nga kasingkasing nga puno sa gugma.”
Kini nga istorya nahitabo sa Pilipinas.
“Gimingaw ko ni G-pop,” giingnan ni Macy ang iyang lola. Iyang gitawag ang iyang mga apohan og G-pop ug G-mom. “Sukad siya miadto sa ospital, gusto gayod ko nga motabang niya. Apan dili ko kahibalo kon unsaon.”
Giduot-duot ni Macy ang iyang pagkaon sa iyang plato. Kini ang iyang paborito nga pamahaw—kan-on, mga itlog, ug mga hotdog. Apan naguol kaayo siya igo nga dili siya ganahan mokaon.
Gigakos ni G-mom si Macy. “Nakasabot ko. Usahay mobati kita nga walay mahimo kon ang usa ka tawo nga atong gihigugma moagi og lisod nga higayon. Apan hinumdomi, adunay duha ka tawo nga nahigugma kanato nga labaw pa sa atong mahunahunaan.”
“Kinsa?” Nangutana si Macy.
“Ang Langitnong Amahan ug si Jesukristo,” miingon si G-mom. “Kon kita adunay hugot nga pagtuo Kanila, Sila mogiya kanato ug mohatag kanato og kalig-on.”
Samtang naminaw si Macy, nagmalaomon ang iyang kasingkasing. Nakahibalo siya nga ang Langitnong Amahan ug si Jesus makatabang ni G-pop.
Nianang gabhiona, si Macy nagluhod kilid sa iyang higdaanan ug gipiyong ang iyang mga mata.
“Langitnong Amahan, palihog bantayi si G-pop ug tabangi siya nga moarang-arang ang pamati. Gihigugma nako siya, ug Ikaw gihigugma usab nako. Palihog tabangi ko nga makahibalo kon unsay akong mahimo para niya.”
Pagkasunod buntag, si Macy nakamata sa kahayag sa adlaw nga nilapos sa iyang mga kurtina. Aduna siyay ideya! Ang pagkanta og mga awit sa Primary ug mga himno sa Simbahan usa sa mga butang nga ganahan nilang buhaton ni G-pop. Tingali makahatag kana niya og kahupayan!
Mibangon siya, militok sa iyang buntagon nga pag-ampo, ug dayon mihangyo ni G-mom kon pwede siya makabisita ni G-pop. Sa wala madugay, nagkuyog na silang nagpadulong sa ospital. Mahinamon kaayo siya nga sa kataposan makakita na usab ni G-pop ug unta makahimo niya nga mopahiyom.
Sa dihang si Macy misulod sa kwarto sa ospital, si G-pop naglingkod sa higdaanan nga gihabolan ang mga tiil. Gikapoy siyang tan-awon. Apan sa dihang nakita niya si Macy, mihayag ang iyang panagway sa hingpit nga kalipay. Midagan si Macy padulong niya ug mainampingon siyang gigakos.
“Maayong buntag, G-pop!”
“Unsay hinungdan nga miari man ka, gamay nakong lang-lang Macy?”
Ang lang-lang nagpasabot og “gugma.” Mao kadto ang paboritong angga ni G-pop kang Macy.
“Gusto ko nga mokanta alang nimo,” miingon si Macy. Si Macy mitupad niya sa iyang higdaanan ug giablihan ang iyang songbook. “Ako anak sa Dios, gipadala dinhi …” siya misugod.
Ang mga mata ni G-pop napuno sa mga luha sa hingpit nga kalipay. Miapil siya ug nagsugod usab sa pagkanta.
“ … panimalay, ginikanan, ako gihatagan.”
Napuno sa ilang mga tingog ang gamay nga kwarto sa ospital. Sa wala madugay, si G-mom miapil usab. Si Macy adunay malinawon nga pagbati diha sa iyang kasingkasing samtang sila dungan nga nanganta.
Sa dihang nahuman sila, gituyhad ni Macy ang iyang kamot, ug hugot kining gikuptan ni G-pop.
“Mag-ampo kita, G-pop.”
Nagdungan sila og ampo, ug si Macy nangayo sa Langitnong Amahan nga panalanginan si G-pop og kalig-on ug pagkaayo.
Human sa pag-ampo, si G-pop mitan-aw ni Macy. “Salamat sa imong maanindot nga mga awit ug mga pag-ampo. Gitabangan ko nimo nga moarang-arang ang pamati. Bisan gamay ka, ikaw adunay dako nga kasingkasing nga puno sa gugma.”
Mipahiyom si Macy. Malipayon siya nga ang iyang gugma ug hugot nga pagtuo nakatabang ni G-pop nga moarang-arang ang pamati. Nakahibalo siya nga ang Langitnong Amahan ug si Jesukristo kanunay nga anaa aron sa pagtabang sa iyang pamilya sa lisod nga mga panahon.
Mga paghulagway pinaagi ni Chrisanne Serafin