“Usa ka Importanting Pagpangita,” Higala, Oktubre 2024, 36–37.
Usa ka Importanting Pagpangita
Ang kasaysayan sa pamilya ingon og may pagkapareha sa pagdula og bidyo nga may importante kaayong gipangita!
Kini nga istorya nahitabo sa Mexico.
Si Javi ganahan magkat-on sa pagbuhat og bag-ong mga butang. Ganahan siya nga magkat-on sa pagdula og baseball. Ganahan siya nga magkat-on sa gitara. Ganahan siya nga magkat-on sa pagdula og bag-ong mga dula sa bidyo. Mao nga sa dihang nangutana si Papá kon ganahan ba siya magkat-on og usa ka butang nga bag-o, andam na si Javi.
Nagtan-aw si Javi ni Papá miabli sa iyang laptop ug miadto og site nga gitawag og “FamilySearch.”
“Tudloan tika kon unsaon sa pagpangita sa mga ngalan sa atong katigulangan,” miingon si Papá. “Kadaghanan nila nagpuyo dugay na kaayo, ug wala silay ebanghelyo. Kon atong makit-an ang ilang mga ngalan, moadto kita sa templo aron magpabunyag alang kanila. Dayon aduna silay kahigayunan sa pagdawat sa ebanghelyo.”
Nakahinumdom si Javi kon unsa ka nindot ang iyang gibati sa dihang siya nabunyagan. Kon makatabang siya sa iyang katigulangan nga mobati sa samang paagi, gusto siya makat-on kon unsaon!
Gibantayan ni Javi si Papá nga nagpakita niya unsay buhaton. Dayon gipasa ni Papá ang laptop ngadto ni Javi. “Ikaw na!”
Mingisi si Javi. Nagpraktis siya og klik ug nagbasa sa mga ngalan ug mga petsa. Iya kadtong pamilya!
Sa misunod nga pipila ka gabii, si Mamá ug si Papá mitabang ni Javi sa pagkat-on og dugang mahitungod sa pagtrabaho sa kasaysayan sa pamilya. Ang iyang maguwang nga babaye si Lily misugod usab sa pagkat-on. Ingon kini og gadula og bidyo nga dula nga adunay importante nga gipangita!
Usa ka Dominggo, ang bishop mianunsyo nga ang stake adunay usa ka espesyal nga hagit. Ang mga miyembro sa stake adunay 60 ka adlaw sa pagpangita og mas daghang ngalan kutob sa ilang mahimo nga ipadala ngadto sa templo. Ang tumong mao ang 5,000 ka mga ngalan. Sa kataposan sa 60 ka adlaw, adunay dako nga party sa pagsaulog. Adunay ipanghatag usab nga mga ganti sa mga tawo nga makakita sa mas daghang ngalan.
“Gusto kong motabang,” miingon si Javi pagpamauli nila gikan sa simbahan.
“Ako sab!” Miingon si Lily.
“Unsa kaha kong magsugod mo karon?” Miingon si Papá. “Tan-awa kon pila ka mga ngalan ang inyong makit-an sa dili pa manihapon.”
Si Javi ug Lily naglumba sa atubangang lawak. Miabli si Lily sa FamilySearch sa iyang phone, ug si Javi mitrabaho sa laptop ni Papá. Sa wala madugay nakakita siya og rekord sa igsoon sa iyang apohan sa tuhod. Naglista usab kini og tulo ka anak nga wala pa mabunyagi. Misyagit si Javi. Nakakita siya og tulo ka ngalan nga ipadala ngadto sa templo!
Sulod sa 60 ka adlaw migahin si Javi kasagaran sa iyang libre nga oras sa pagbuhat og kasaysayan sa pamilya. Nagsiksik siya og mga ngalan hapit kada gabii human sa eskwela. Ma-Dominggo, ang iyang tibuok pamilya mitrabaho niini og dungan.
Sa kataposan sa 60 ka adlaw, si Javi ug ang iyang pamilya miadto sa gambalay sa simbahan alang sa party. Adunay mga tacos, musika, ug daghang mga tawo. Lingaw kaayo kadto!
Sa kataposan, ang presidente sa stake mibarog.
“Ako mapagarbohon sa tanan,” siya miingon. “Ang atong stake nakakita og 10,000 ka mga ngalan alang sa templo!”
Ang tanan nalipay. Misiga ang mga mata ni Javi. Kaduhaon kana sa ilang tumong!
Dayon ang presidente sa stake mianunsyo sa mga nakadaog. Ang hamtong nga nakadaog usa ka babaye nga wala kaila si Javi, apan ang batan-on nga nakadaog mao si Lily!
“Karon alang sa mga bata. Aduna kitay usa ka tawo nga mipadala og 216 ka mga ngalan,” miingon ang presidente sa stake. Namakpak og kusog ang pundok sa katawhan nga wala na kadungog si Javi sa sunod nga gisulti sa presidente sa stake.
Ang amahan ni Javi naniko niya. “Javi, iyang gisulti ang imong ngalan.”
Hapit dili makatuo si Javi niini. Nakapadala ba gyod siya og 216 ka ngalan?
Milakaw si Javi paingon sa atubangan. Dako ang iyang pahiyom samtang ang presidente sa stake milamano sa iyang kamot ug gitunol ngadto niya ang usa ka sertipiko. Kini adunay ngalan niya!
“Unsay gibati nimo nga nakadaog ka?” nangutana ang presidente sa stake.
“Nindot gayod kaayo,” miingon si Javi.
Nindot gyod kaayo ang pagbati sa makadaog. Ug nindot gyod kaayo ang pagbati nga nakat-on og paagi sa pagtabang og daghang mga tawo!
Paghulagway pinaagi ni Josh Talbot