“Pagkamabination didto sa Camp,” Higala, Oktubre 2024, 30–31.
Pagkamabination didto sa Camp
Nasayud si Kat unsay bation nga malahi.
Kini nga istorya nahitabo sa USA.
Gihapuhap ni Kat ang iyang dili tinuod [prosthetic] nga bukton tungod sa kanerbyos samtang gadrayb si Mama sa abogon nga dalan. “Ma, nahadlok ko.”
Mabinationg mipahiyum si Mama kaniya. “Nakahibalo ko. Apan nagtuo ko nga maganahan ka sa summer camp, langga. Hunahunaa ang tanang bag-o nga mga bata nga imong mailaila.”
Wala motingog si Kat, apan naghunahuna siya, Mao nay akong gikahadlokan.
Wala madugay naabot sila sa day camp. Misulod si Mama uban ni Kat aron sa pakig-istorya sa iyang camp nga magtatambag, si Brian. “Geputol ang bukton ni Kat niadtong bata pa siya,” misulti si Mama kaniya. “Dili kini makaapekto sa iyang pagdula, apan usahay nakapalisod kini sa pakig-ilaila og bag-ong mga tawo.”
“Ayaw kabalaka, Kat,” miingon si Brian. “Nalipay ming tanan nga ania ka dinhi.”
Nalingaw si Kat nga nakig-ilaila sa mga bata sa iyang grupo. Ilang ginganlan ang ilang kaugalingon nga ang Purple Tigers. Nagbaklay sila, nangaon og keso ug biskwit, ug adunay mga lumba sa dagan. Si Kat usa sa labing kusog sa grupo.
Sa kataposan sa adlaw, mianunsyo si Brian nga sila magkumpetensya sa laing grupo og lumba sa sako. Nanghinaot si Kat nga makadaog ang Purple Tigers!
Sa dihang iya nang turno, gibitad ni Kat ang sako libot sa iyang tuhod ug misugod sa paglukso. Apan lisod gunitan ang sako sa usa ra ka kamot, ug natumba siya tungod sa kabug-at sa sako. Natumba si Kat ug naligid ngadto sa sagbot. Sa pagbangon niya, ang laing team nakahuman na sa lumba. Napildi ang team ni Kat.
Nianang pagkagabii sa panihapon, misulti si Kat sa iyang mga ginikanan bahin sa lumba sa sako nga napildi. “Dili ko gustong mobalik sa camp,” miingon siya. “Napildi ang team tungod nako. Dili sila gusto nga mobalik ko.”
“Pasayloa ko, langga.” Gigakos ni Mama si Kat. “Segurado ko nga ang imong bag-ong mga higala nahigugma gihapon nimo. Ug nahibalo ka kinsay kanunay nahigugma nimo magkinaunsa man?”
“Kamo.” Mipahiyom og gamay si Kat.
“Oo. Nahigugma kami kanimo! Ug usab ang imong Langitnong Amahan. Anak usab ka Niya, kahinumdom ka?”
“Mura og nalingaw ka sa wala pa ang lumba sa sako,” miingon si Papa. “Nganong dili man nimo sulayan og kausa pa ang camp?”
Mitando si Kat. “OK.”
Mipahiyom si Papa. “Sulayi sa pagbantay kon ang mga tawo mabination nimo. Ug pangita og mga paagi nga magmabination ngadto sa uban. Kanunay kanang makatabang nako kon anaa kos kalisod.”
Pagkasunod adlaw sa camp, ang mga bata sa grupo ni Kat miabiabi niya og high-five ug migakos. Walay mihisgot sa lumba sa sako, ug si Kat nalimot unsa siya kabalaka. Nangomedya siya sa iyang bag-ong mga higala samtang nagpaabot sila sa kalihokan nga magsugod.
Dayon ang Magtatambag nga si Brian miduol sa grupo. Tapad niya usa ka lalaki nga kaedad ni Kat. “Paminaw, Purple Tigers,” miingon si Brian, “aduna kitay bag-ong higala karon. Ang iyang ngalan mao si Rodrigo. Si Rodrigo makasulti og Kinatsila lamang, mao nga naninguha mi og pangita og magtatambag nga makasulti og Kinatsila aron makatabang niya.”
Si Kat nagkat-on og Kinatsila sa iyang eskwelahan, apan gamay ra ang iyang nahibaloan. Hadlok siya kaayo mosulay og istorya ni Rodrigo.
Dayon mitan-aw siya kaniya. Nahadlok usab siya kaayo. Ang dili pagsulti sa samang pinulongan sa ubang mga bata lisod gyod tingali, naghunahuna siya. Nasayod siya unsa ang bation nga malahi.
Nahinumdom si Kat giunsa siya pag-abiabi sa iyang bag-ong mga higala ngadto sa grupo. Ilang gipabati nga gihigugma siya, sama sa gibuhat ni Jesus. Gusto siya nga mobuhat usab niana alang ni Rodrigo.
Nahinumdom si Kat unsaon pagsulti og “hello” sa Kinatsila. Mao miginhawa siya og lawom ug miduol ni Rodrigo. “Hola,” miingon siya nga nagpahiyom.
Nawala ang kabalaka sa nawong ni Rodrigo, ug mibawos siya og pahiyom. Gitunol ni Kat ang iyang dili tinuod nga kamot.
“¿Amigos?” nangutana siya. Managhigala?
Nagkadako ang pahiyom ni Rodrigo. Iyang gidawat ang iyang kamot ug milamano niini. “Amigos.”
Paghulagway pinaagi ni Flavia Drago