“Ang Party ni Ryan,” Higala, Oktubre 2024, 4–5.
Ang Party ni Ryan
“Nganong gidapit man nimo si Chad?” nangutana si Braden.
Kini nga istorya nahitabo sa USA.
Gisirad-an ni Ryan ang kataposang sobre ug mingisi. Ang iyang birthday hapit na, ug dili siya makahulat sa pagdapit sa iyang mga higala sa iyang party! Si Mama mitabang niya nga maghimo og mga imbitasyon nga adunay mga rocket ship ug mga bituon. Segurado siya nga mao kini ang mahimong labing nindot nga birthday.
Ang unang higala nga gustong dapiton ni Ryan mao si Chad. Buotan gayod kaayo si Chad, ug malingaw kanunay si Ryan uban niya. Usahay maglisod og istorya si Chad, ug dili siya kaayo maayo sa esport. Apan wala kini igsapayan ni Ryan. Si Chad maayo sa ubang butang. Ganahan siya nga maghimo og gagmayng mga hayop nga origami pinaagi sa pagpilo sa papel. Usa ka higayon gihimoan niya si Ryan og gamay nga oso [bear]. Gihipos kini ni Ryan sa tokador sa iyang kwarto.
Miadto si Ryan sa balay ni Chad ug gihatagan siya og imbitasyon. “Alang kana sa akong birthday party sa Sabado,” miingon siya. “Naghinaot ko nga makaadto ka!”
Mipahiyom og maayo si Chad. “Salamat. Mo-moadto ko.”
Sa wala pa mobiya si Ryan, gipakita ni Chad niya ang iyang bag-o nga origami. Siya adunay deer, mga chipmunk, mga squirrel, ug mga kuwago—usa ka tibuok kakahoyan sa gagmayng mga hayop nga papel. Nindot kaayo!
Sunod, nakit-an ni Ryan si Ty ug si Braden sa balay ni Ty. Sila gihatagan niya og tagsa ka imbitasyon.
“Kinsa pa ang moadto?” Nangutana si Ty.
“Akong giimbitar si Alex, Matt, Jacob, ug Chad.”
“Ayay,” miingon si Braden. “Nganong giimbitar nimo si Chad? Dili man siya normal.”
Nakurat si Ryan. “Tungod kay ako siyang amigo.”
“Apan, siya dili namo amigo,” miingon si Ty. “Kon moadto si Chad, dili ko moadto.”
“Dili pud ko,” miingon si Braden.
Mipauli si Ryan. Wala siya kahibalo unsa ang buhaton. Ganahan siya nga si Ty ug Braden moadto sa iyang party, apan ganahan usab siya nga moadto si Chad.
Sa pag-abot niya sa balay, gisultihan niya si Mama kon unsay nahitabo.
“Gikasubo ko nga sila mibati og ingon niana,” miingon si Mama. “Mura og wala nila hatagi og kahigayonan ang ilang kaugalingon nga maila-ila si Chad. Unsa kaha ang imong buhaton?”
Nahilom si Ryan og kadiyot. Si Mama ug Papa nagtudlo niya nga kon siya nagkinahanglan og tabang, ang Espiritu Santo makagiya niya. Miingon sila nga sama kini sa usa ka hilom nga tingog nga imong mabati diha sa imong kasingkasing.
Hilom nga nag-ampo si Ryan. Langitnong Amahan, unsa ang akong buhaton?
Kon maghunahuna siya mahitungod ni Ty ug ni Braden, mobati siya og kakulba ug gamay nga kasubo. Apan kon maghunahuna siya mahitungod sa pag-imbitar ni Chad, mobati siya nga kalmado ug malipayon. Siya nasayod nga ang Espiritu Santo misulti niya nga ang pag-imbitar ni Chad usa ka maayo nga pagpili.
Pagka Sabado, si Ryan mitabang ni Papa nga magpahimutang sa mga dulaon diha sa hawanan sa likod sa balay. Gipahimutang ni Mama ang paborito nga mga snack ni Ryan, popcorn ug mga pretzel. Tagsa-tagsa nga miabot ang mga higala ni Ryan.
Wala moabot si Ty ug si Braden. Apan si Ryan nalingaw og maayo kauban sa uban niyang mga amigo. Gipakita pa gani sila ni Chad unsaon sa paghimo og origami. Silang tanan namauli nga adunay ilang kaugalingon nga hayop nga papel.
Mao gayod kadto ang labing nindot nga birthday sukad! Si Ryan mibati og kalipay ug kamapasalamaton.
Gihatagan ni Ryan si Chad og high-five. “Salamat sa pag-anhi!” miingon siya. “Malipayon ko nga amigo ta.”
Mibalos og pahiyom si Chad. “Ako sab.”
Mga paghulagway pinaagi ni Colleen Madden